ROMA 16

1Au sa tataunaka yani vei kemuni na ganeda ko Fipe, o koya sa dauqarava na i vavakoso lotu mai Kenikiria. 2Ni ciqomi koya e na yaca ni Turaga, me vaka sa dodonu me ra dau cakava na tamata ni Kalou. Ni qai vukei koya e na veika e leqa kina ka ni sa dua na i tokani ko koya vei ira, e lewe vuqa ka vaka kina vei au tale ga. 3Au sa loloma yani vei Pirisila kei Akuila, ko i rau na noqu i tokani vinaka e na cakacaka i Jisu Karisito, 4ka rau a bolea na mate e na vukuqu. Au sa vakavinavinaka vei rau, ka sega ni ko i au taudua ga, era sa vakavinavinaka tale ga vei rau ko ira na veisoqosoqo lewe ni lotu mai na veimatanitu tani. 5Au sa loloma tale ga ki na i vavakoso lotu era sa dau sosoqoni tiko e na nodrau vale. Au sa loloma tale ga yani vua na noqu i tokani dredre ko Epinito, o koya na i matai ni tamata me vakabauti Karisito e na yasana ko Esia. 6Au sa loloma tale ga vei Meri, o koya ka a cakacaka sara vakaukauwa e na vukumuni. 7Au loloma tale ga vei Adroniko kei Junaisi ko i rau na Jiu keitou a biu vata e na vale ni veivesu; e ratou kilai rau vinaka na i apositolo, ka rau a yaco me rau vakabauti Karisito taumada mai vei au. 8Au sa loloma yani vei Apiliato na noqu i tokani vinaka e na vuku ni Turaga. 9Au loloma yani vei Urupeni na noqu i tokani e na vuku ni cakacaka ni Turaga, ka vaka kina na noqu i tokani vinaka ko Siteki. 10Au sa loloma vei Apeli, o koya sa vakadinadinataki na nona yalodina vei Karisito. Au sa loloma yani vei ira na lewe ni matavuvale i Arisitopulosi. 11Au loloma yani vei Erotiani e dua na noqu i tokani Jiu, kei ira na noqu i tokani vakarisito e na vuvale i Nakisusi. 12Au sa loloma yani vei Taraifina kei Tarivosa, e rau sa cakacaka e na cakacaka ni Turaga; kei na noqu i tokani ko Perisia, o koya sa levu sara na nona cakacaka e na vuku ni Turaga. 13Au sa loloma tale ga yani vei Rufo, e dua na daucakacaka yalodina e na cakacaka ni Turaga, kei na tinana, o koya sa dau okati au sara ga me vaka e dua na luvena. 14Au loloma yani vei Asinikirito, Felekoni, Erimi, Patiropa, Emasi kei ira era sa lotu era tiko vata kei iratou. 15Au loloma yani vei Filoloko kei Julia, vei Neresi kei na ganena, vei Olimipia kei ira kece na tamata lotu era tiko vata kei iratou. 16Ni veikidavaki vaka i kemuni e na veireguci vakaveitacini. Era sa loloma kece tu yani na veisoqosoqo lotu kece i Karisito. 17Au sa vakamasuti kemuni na veiwekani mo ni qarauni kemuni mai vei ira era dau vakavuna na veisei ka vakacacana na nodra vakabauta na tamata; ko ira era dau saqata na i vakavuvuli ko ni sa ciqoma oti. Ni tawasei kemuni tani mai vei ira. 18Ni ko ira era dau cakava na veika vaka oya era sa sega ni qaravi Karisito tiko na noda Turaga, ia era sa vakalou ga ki na ketedra. Era sa vakacalai ira na tamata yalododonu e na nodra vosa vinaka kei na veicavilaki. 19Ia era sa rogoca na tamata kece na nomuni yalodina ki na i Tukutuku Vinaka; oya na vuna au sa rekitaki kemuni tiko kina. Au vinakata mo ni yalomatua e na ka vinaka, ia mo ni yalowai e na ka e ca. 20Ia na Kalou, na vu ni noda vakacegu, sa na vakarau butuqaqi Setani e na ruku ni yavamuni. Ka me sa tiko vata kei kemuni na vakacegu ni noda Turaga ko Jisu! 21Sa loloma yani vei kemuni na noqu i tokani vakacakacaka ko Timoci, ka vaka kina ko iratou na wekaqu na Jiu ko Lusiu, Jesoni kei Sosipeta. 22Ko i au ko Teritui, o koya e vola na i vola oqo, au sa loloma tale ga yani vei kemuni. 23Sa loloma yani ko Keio, o koya au mai tiko oqo vua, o koya tale ga ka sa dua soqoni ira na i vavakoso me ra lotu e na nona vale. E rau sa loloma tale ga yani ko Erasito, na dauniyau ni koro, kei na wekada ko Kuaretusi. 24Me sa tiko kei kemuni kece sara na loloma ni noda Turaga ko Jisu Karisito! Emeni.] 25Me da sa qai vakalagilagia na Kalou! O koya sa rawa vua me vakadeitaki kemuni e na nomuni vakabauta me vaka na i Tukutuku Vinaka au sa vunautaka, na i tukutuku kei Jisu Karisito; me vaka tale ga na kena vakatakilai mai na ka dina ka a vunitaki tu mai liu sara. 26Ia sa qai vakaraitaki mai na ka dina oqo e na nodra volavola na parofita. Ka sa vakatakilai me kilai ki na veimatanitu kece ga e na lewa ni Kalou sa tawa mudu na nona bula me rawa ni ra vakabauta ka talairawarawa kina na tamata kece ga. 27Me ia vua na Kalou sa tu vua na vuku kece ga, na veivakalagilagi e na vuku i Jisu Karisito, ka sega ni mudu! Emeni.

will be added

X\