ROMA 15

1O i keda sa kaukauwa na noda vakabauta me da vukei ira na malumalumu me ra colata na nodra i colacola. Me da kakua ni cakava na ka e vinaka ga vei keda. 2Ia sa dodonu me da cakava na ka mera vinaka ka vakatataki cake kina e na vakabauta ko ira na tani. 3Ni ko Karisito sara tale mada ga e a sega ni cakava na ka ga e vinaka vua. Ia e cakava ga me vaka e kaya na i Vola Tabu: “Sa mai tau vei au na veivakasewasewani era cakava mo ni vakasewasewani kina” 4Ni veika kece e volai e na i Vola Tabu sa volai me da vakatavulici kina, me noda kina na i nuinui sa rawa e na vosota kei na vei vakayaloqaqataki sa solia vei keda na i Vola Tabu. 5Ia me vakarawarawataka mada ga vei kemuni na Kalou, o koya na i vurevure ni vosota kei na yaloqaqa, mo ni yalovata e na nomuni muria na i vakarau i Karisito. 6Me duavata kina na lomamuni kei na domomuni e na nomuni vakacaucautaka na Kalou, na Tama ni noda Turaga ko Jisu Karisito. 7O koya gona mo ni qai veivakadonui vakai kemuni me vaka sa vakadonui kemuni ka ciqomi kemuni na Karisito; ni kitaka oqo me vakalagilagi kina na Kalou. 8Au via tukuna vei kemuni ni a mai dua na dauveiqaravi vei ira na Jiu ko Karisito me vakaraitaka na yalo dina ni Kalou, me vakayacori kina na vosa ni yalayala ni Kalou vei ira na pateriaki, 9me rawa tale ga kina ni ra vakacaucautaka na Kalou na kai veimatanitu tani e na vuku ni nona loloma levu. Me vaka sa kaya na i Vola Tabu: “Au na vakavinavinaka vei kemuni na Turaga e na kedra maliwa na kai veimatanitu tani. Au na vakacaucautaka e na sere na yacamuni” 10E a kaya tale ga: “Ni reki na kai veimatanitu tani vata kei ira na tamata digitaki ni Kalou!” 11Ka a kaya tale ga: “Ni vakacaucautaka na Turaga ko i kemuni kece ga na kai veimatanitu tani; ni vakacaucautaki koya vakalevu sara na tamata kece ga” 12E a kaya tale ga ko Aisea: “E na lako mai e dua na kawa I Jese; e na vakaturi cake ko koya me liutaki ira na kai veimatanitu tani, ka ra na vakanuinui vua” 13Ia me vakasinaiti kemuni mada ga na Kalou, na vu ni noda vakanuinui, e na marau kece ga kei na vakacegu e na vuku ni nomuni vakabauti koya, me na tubu cake tiko ga kina na nomuni vakanuinui e na kaukauwa ni Yalo Tabu. 14Kemuni na wekaqu, o i au vaka i au, au sa vakabauta ni ko ni sa sinai tu e na yalo vinaka, kei na kila ka, ka sa rawa kina mo ni veivakavulici vaka i kemuni. 15Ia e na i vola oqo au sa doudou sara me'u tukuna tale yani kina vei kemuni e vica na ka. Au sa doudou e na vuku ni solisoli sa solia vei au na Kalou, 16me'u dua na tamata i Karisito ka me'u veiqaravi vei kemuni na kai matanitu tani. Au sa cakacaka me vaka e dua na bete e na noqu vunautaka na i Tukutuku Vinaka, mai vua na Kalou, me ra yaeo kina na kai veimatanitu tani me ra i soro e vakabau e na mata ni Turaga, ni sa vakacabori ira vua na Yalo Tabu. 17O koya gona oya e na noqu sa sema tu vei Jisu Karisito sa rawa kina me'u cibitaka na noqu cakacaka vua na Kalou. 18Au sa doudou me'u tukuna na ka sa cakava na Karisito e na noqu bula koya me'u kauti ira mai kina na kai veimatanitu tani me ra sa mai talairawarawa vua na Kalou e na nodra vosa kei na nodra cakacaka. 19E a yaco rawa oya e na kaukauwa ni veika mana kei na veika veivakurabuitaki kei na kaukauwa ni Yalo Tabu. Au a vunautaka voli na i Tukutuku Vinaka kei Jisu Karisito e na noqu a lako mai Jerusalemi ki Ilirikumi. 20Na ka au gadreva sa i koya me'u vunautaka na i Tukutuku Vinaka e na veivanua e sa sega ni bau rogoci kina na i tukutuku kei Karisito, me'u kakua kina ni la'ki cakacaka e na yavu sa tara oti tu e dua tale na tamata. 21Me vaka e kaya na i Vola Tabu: “Era na raica ko ira ka se sega mada ni tukuni vei ira; ka ra na kila ko ira era se sega mada ni rogoca.” 22Sa i koya oya na vuna sa tarovi kina vakavuqa na noqu lako yani vei kemuni. 23Ia oqo sa oti na noqu cakacaka e na yasayasa oqo; ia me vaka ni sa sivi oqo e vica na yabaki na noqu gadreva tiko me'u lako yani vei kemuni, 24au sa nakita me'u sa na cakava e na gauna oqo. Au gadreva me'u na sikovi kemuni e na noqu i lakolako ki Sipeini, ka mo ni na qai bau vukei au tale ga meʼu yaco rawa ki kea, ni sa na oti na noqu veisiko lekaleka vei kemuni. 25Ia e na gauna oqo au sa tei lako mada ki Jerusalemi me'u kauta na ka ni loloma vei ira na tamata ni Kalou mai kea. 26Ni ra sa lomasoli na i vavakoso lotu mai Masitonia kei Kirisi ka solia e dua na i solisoli me vukei ira na tamata lotu dravudravua mai Jerusalemi. 27Era nakita sara ga vakataki ira me ra cakava na ka oqo. Ia sa tu dina tale ga na nodra i tavi me baleti ira na dravudravua koya; me vaka ni ra sa vota na Jiu na nodra veivakalougatataki vakayalo vei ira na kai veimatanitu tani, sa dodonu kina vei ira na kai veimatanitu tani me ra vota vei ira na Jiu na nodra veivakalougatataki vakayago. 28Ia ni'u sa na vakaotia na i tavi oqo, ka'u sa na solia oti vei ira na ka kece e a soli mai vei au, au sa na qai gole ki Sipeini, ka la'ki sikovi kemuni sara yani kina. 29Ia au kila ni'u sa na lako yani oqo vei kemuni au sa na lako vata tiko yani kei na veivakalougatataki taucoko i Karisito. 30Au sa vakauqeti kemuni na veiwekani e na vuku ni noda Turaga ko Jisu Karisito kei na loloma sa solia vei kemuni na Yalo Tabu mo ni duavata kei au e na nomuni masu vagumatua vua na Kalou e na vukuqu. 31Ni masulaka me'u vakabulai mai vei ira era sega ni vakabauta mai Jutia, ka me ra ciqoma na noqu veiqaravi na tamata lotu mai Jerusalemi. 32O koya gona oya ke sa vaka kina na loma ni Kalou au sa na qai lako yani kina vei kemuni e na marau levu ka la'ki vakabulabulataki e na kemuni maliwa. 33Me tiko vata mada ga kei kemuni kece sara na Kalou sa vu ni noda vakacegu. Emeni.

will be added

X\