ROMA 14

1Kevaka e dua na tamata e sega soti ni kaukauwa na nona vakabauta sa dodonu mo ni vakacurumi koya ga yani ka kakua ni veileti vata kaya me baleta na nona vakabauta. 2Na nona vakabauta e dua na tamata sa vakatara vua me kania na ka kece ga, ia na tamata malumalumu na nona vakabauta e na kana kakana draudrau wale ga. 3Ko koya e rawa ni kania na ka kece ga me kakua ni beci koya sa kana kakana draudrau wale ga, ia me kakua tale ga ni beci koya sa rawa ni kania na ka keee ga ko koya sa dau kana kakana draudrau wale ga, ka ni sa vakadonui koya oti na Kalou. 4O eei o iko mo vakaeala na nona tamata e dua tani tale? Na nona turaga ga e rawa ni kaya se sa rawata tiko na nona i tavi se sega. Ia e na rawa ni rawata me vaka koya na nona i tavi ni sa rawa vua na Turaga me solia vua na kena kaukauwa. 5E dua na tamata e na okata me ra bibi cake e so na siga mai na kena vo ni siga, ka dua tale e okata me ra tautauvata kece ga na siga. Ia me dui vakadeitaka na tamata yadua na ka e nanuma. 6Ko koya sa nanuma ni bibi cake e dua na siga mai na kena vo sa kitaka tale ga e na nona doka na Turaga, ka ni sa dau vakavinavinaka vua na Kalou e na vuku ni kakana. Ko koya sa bese ni kania e so na ka sa cakava e na nona doka na Turaga, ka ni sa dau vakavinavinaka tale ga vua na Kalou. 7Ni sega ni dua vei keda e bula e na vukuna ga, se dua e mate e na vukuna ga. Kevaka eda bula, eda sa bula vua na Turaga, 8ia kevaka eda mate, eda sa mate vua na Turaga. Se da bula se da mate eda sa nona tiko ga na Turaga. 9Ka ni sa mate na Karisito ka tucake tale me yaco kina me noda Turaga na bula ka nodra tale ga era sa mate. 10A cava o iko mo vakalewa na wekamu? Se na cava o iko mo beca kina na wekamu? O keda kece eda na la'ki tu e na mata ni Kalou me lewai keda ko koya. 11Ni sa kaya na i Vola Tabu, “ʻMe vaka ni'u sa bula tiko,ʼ sa kaya na Turaga, ʻe na tekiduru e mataqu ma tamata kece ga ka ra na vakadinadina ni'u sa Kalou ko i au!ʼ “ 12O i keda kece sara eda sa dui vakamacalataka na noda bula vua na Kalou. 13O koya gona me da sa muduka mada na noda veivakalewai tiko, ka mo ni qarauna ga: mo ni kakua ni cakava e dua na ka me tarabe se mani bale sara kina na wekamuni na i valavala ca. 14Na noqu tu vata kei Karisito sa vakavuna me'u kila dina kina ni sega na ka e dukadukali vaka i koya; ia ke dua na tamata e vakabauta ni sa sega ni savasava e dua na ka, sa na sega ga ni savasava vua. 15Kevaka ko vakararawataka na lomai na wekamu e na nomu kania e dua na ka, sa sega ni yavu ni nomu cakacaka na loloma. Kakua ni laiva wale ga na kakana ko kania me vakacala na tamata e a mai mate e na vukuna na Karisito. 16Kakua ni laiva me kainaki ni ca na ka ko sa okata me vinaka. 17Ni sa sega ni ka ni kana se gunu na matanitu ni Kalou, ia sa ka ga ni yalododonu, vakacegu kei na marau sa vakavuna na Yalo Tabu. 18Ko koya yadua sa qaravi Karisito vakaoqo sa vinakati koya na Kalou ka ra sa vinakati koya tale ga na tamata. 19Sa i koya gona oya me da sa dau sasagataka tiko ga kina na veika e kauta mai na veilomani kei na veivakatataki cake. 20Kakua ni vakarusa wale ga na ka sa cakava na Kalou e na vuku ni kakana. Sa tara me laukana na veimataqali kakana kece ga, ia sa cala ga me da kania e dua na ka e vakavuna me la'ki i valavala ca kina e dua tani tale. 21Na ka e dodonu me da cakava oya me da kakua ni kana lewe ni manumanu, gunu waini se cakava e dua na ka e na vakavuna na nona bale na wekada. 22Mo drau kila vata ga kei na Kalou na ka ko vakabauta e na ka oqo; kakua ni vakaraitaka. Sa kalougata na tamata e sega ni beitaki koya na lomana e na gauna e cakava kina na ka e dodonu vua. 23Ia ke sa vakatitiqa e na vuku ni ka e kania, sa vakacalai koya na Kalou baleta ni sega ni yavutaki na ka e cakava e na vakabauta. Ni sa i valavala ca na ka kece ga e sega ni caka e na vakabauta. Cakava na ka e Vinaka vei Ira na Tani ka Segai vei Iko Ga

will be added

X\