ROMA 13

1Me talairawarawa na tamata kece ga vei ira era veiliutaki e na matanitu, ni sega ni dua e veiliutaki rawa ke sega ni vakatara na Kalou. Ko ira era sa veiliutaki tiko oqo sa lesi ira kina na Kalou. 2Ko koya e saqati ira era veiliutaki tiko sa saqata tiko na ka sa lesia na Kalou; ka sa na vakavuna ga na nona cudruvi. 3Ka ni sega ni dodonu me ra rerevaki ira na i liuliu ko ira era caka dodonu tiko, ko ira ga era dau caka ca. Ko gadreva li mo kakua ni rerevaka na i liuliu? Ia cakava na ka vinaka, ka na qai vakacaucautaki iko ko koya. 4Ni sa i talai ni Kalou ko koya ka sa dau cakava na ka mo vinaka kina. Ia kevaka ko sa i tovo ca, mo rerevaki koya, ni sa tu dina na nona kaukauwa me veitotogitaki kina. Sa i koya na i talai ni Kalou ka sa nona i tavi me vakayacora na cudru ni Kalou vei ira era sa caka ca. 5Sa i koya oqo na vuna e dodonu mo ni talairawarawa kina vei ira era veiliutaki, sega ni baleta wale ga na cudru ni Kalou, e baleta sara tale mada ga ni na sota vata oya kei na nomuni lewa e loma. 6Sa i koya tale ga oqo na vuna mo ni soli i vakacavacava kina. Ia ni ra sa vakayacora na nodra i tavi ko ira na veiliutaki era sa cakava tiko na cakacaka ni Kalou. 7Sauma kece na ka e dodonu me saumi vei ira na tamata, sauma na i vakacavacava vei ira e dodonu me saumi vei ira, na soli lavaki vei ira e dodonu me soli vei ira na soli lavaki, na vakarokoroko vua e dodonu me vakarokorokotaki, kei na veivakalagilagi vei koya e dodonu me vakalagilagi. 8Me kakua ni dua na ka mo dinau tu kina vua e dua na tamata, na ka ga me qai vo oya mo ni veilomani. Ko koya yadua sa lomana na kai nona sa vakayacora tiko na Lawa. 9Sa i koya oqo na Lawa: “Mo kakua ni ia na veibutakoci; mo kakua ni laba, mo kakua ni butako, mo kakua ni kocokoco” ; ia na veika kece oqo, se tiko tale e dua na lawa, sa kena i soqoni ga na i vakaro oqo: “Mo lomana na kai nomu me vakataka na nomu lomani iko” 10Ko koya yadua sa lomana na kai nona e na sega ni cakava vua e dua na ka ca. O koya gona oya ni da sa loloma eda sa talairawarawa ki na Lawa taucoko. 11Sa dodonu mo ni cakava na ka oqo ni ko ni sa kila sara tiko ga ni sa gauna oqo mo ni yadra mai kina mai na moce. Ni sa voleka sara oqo na gauna meda vakabulai kina mai na gauna eda a sa qai vakabauta kina. 12Sa voleka ni oti na bogi ka sa voleka sara ni kida mai na rarama. Me da sa luvata laivi mada na i valavala ni butobuto ka tokara na i yaragi ni vala e na rarama. 13Me da sa vakaitovotaki keda mada e na i tovo ni rarama. Me kakua na i soqosoqo ca ni kasou se na dau mateni; me kakua na veimoceri butako se veilasamaki vakasisila; me kua na veileti se na vuvu. 14Ni tokara na Turaga ko Jisu Karisito me nomuni i yaragi, ka kakua ni vakasamataka tiko na sala mo ni vakayacora kina na vei gagadre ca ni yagomuni.

will be added

X\