ROMA 12

1O koya gona oya, kemuni na veiwekani, e na vuku ni kena levu na loloma ni Kalou ki vei keda, au sa vakamamasu kina vei kemuni mo ni vakacabori kemuni vua na Kalou, mo ni madrali bula, me savasava ka vinaka vua. Sa i koya oqo na lotu dina vakayalo mo ni vakayacora vua. 2Ni kakua ni vakaitovotaki kemuni e na veimataqali i tovo ni vuravura oqo. Ia ni vakadonuya ga vua na Kalou me vakavouya taucoko sara na nomuni vakasama ka me veisautaki kina na nomuni bula e loma. Ko ni na qai kila rawa kina na loma ni Kalou, ka kila tale ga na ka yaga, ka vinaka, ka uasivi sara. 3Ia e na vuku ni loloma sa solia wale mai vei au na Kalou, au sa kaya kina vei kemuni kece sara: Me kakua ni dua vei kemuni me sivia na nona nanuma me baleti koya vaka i koya. Ia me vakarauta ga na nomu vakasama me baleti kemuni ka mo ni dui lewai kemuni vakavinaka me vaka na i vakarau ni vakabauta sa vota vei kemuni yadudua na Kalou. 4Sa vuqa na veitiki ni yagoda, ia sa dua bau ga na yago; ia na veitiki ni yago kece oqo sa duidui na nodra i tavi. 5Sa vaka kina ko i keda, e dina ni da sa lewe vuqa, ia e da sa lewe ni dua ga na yago e na noda sa tu vata kei Karisito, ka da sa sema vata kei na veitiki ni yago yadua e na dua ga na yago. 6Ia me da vakayagataka na veisolisoli e duidui sa soli vei keda me vaka na loloma ni Kalou. Kevaka e noda i solisoli me da vunautaka na vosa ni Kalou, me da vakayacora me vaka na vakabauta sa vota vei keda na Kalou. 7Kevaka e noda i solisoli na dauveiqaravi me da ia na veiqaravi. Ke veivakavulici, me da ia na veivakavulici. 8Kevaka me da dau veivakauqeti vei ira na kena vo ni vakabauta, me da kitaka vaka kina. O koya e dau solisoli me cakava e na yalovinaka; o koya sa dau veiliutaki, me cakava vakadodonu; o koya sa dauloloma me vakayacora e na marau. 9Me dina ka maucokona vinaka na nomuni loloma. Mo ni cata na ca ka taura matua na ka vinaka. 10Ni veilomani sara me vaka ni ko ni sa veitacini e na vuku i Karisito; ka mo ni veiuasiviti e na veivakarokorokotaki. 11Ni cakacaka vakaukauwa, ka kakua ni dau vucesa. Ni qarava na Turaga e na yalodina. 12Mo ni reki tiko e na vuku ni vakanuinui sa tiko vei kemuni; ni dau vosota na rarawa; ka ia tiko ga na masu e na veigauna kece. 13Ni solia na veika e tu vei kemuni vei ira na wekamuni vakayalo era leqa tu, ka dau dolava na nomuni vale vei ira na vulagi. 14Ni masulaka vua na Kalou me vakalougatataki ira era vakacacani kemuni, io, me vakalougatataki ira ka me kua ni cudruvi ira. 15Ni marau vata kei ira era marau, ka tagi vata kei ira era tagi. 16Ni veinanumi vakatautauvata. Ni kakua ni dau viavia levu, ia ni makutu ga ni vakayacoro na veitavi. Ni kakua ni nanuma ni ko ni sa vuku. 17Ke dua e cakava e dua na ka ca vei kemuni, ni kakua ni sauma lesu e na dua tale na ka ca. Ni tovolea mo ni cakava na ka e vinaka e na matadra na tamata kece ga. 18Ni cakava na ka kece ga ko ni rawata mo ni veilomani tiko ga kina kei ira na tamata kece ga. 19Ni kakua ni sauma na ca sa caka vei kemuni. Laiva vua na Kalou me sauma. Ni sa volai tu e na i Vola Tabu: “Sa noqu i tavi me'u cudruvaka, au na sauma o i au,” sa kaya na Turaga. Ni sa kaya tale ga na i Vola Tabu: 20“Kevaka sa viakana na nomu meca, mo vakani koya; kevaka sa viagunu, mo vagunuvi koya; ni ko sa cakava koya, ko sa na vakamadualaki koya kina.” 21Ni kua ni laiva na ca me vakadrukai kemuni, ia mo ni vakadruka ga na ca e na vinaka.

will be added

X\