ROMA 11

1Au sa qai taroga, sa biuti ira dina li na nona tamata na Kalou? E sega sara! O i au vakataki au e dua na Isireli, au kawa i Eparaama, ka'u lewe ni yavusa i Pemjamini. 2E sega ni sa biuti ira na nona tamata na Kalou, ko ira a digitaki ira mai na i vakatekivu ko koya. Ko ni kila na tiki ni Vola Tabu e a tukuna kina ko Ilaija vua na Kalou na veika era cala kina na Isireli: 3“Kemuni na Turaga era sa vakamatei ira na nomuni parofita ka talaraka sobu na nomuni i cabocabo ni soro. O i au taudua ga au sa vo tiko ka ra sa tovolea tiko me ra vakamatei au.” 4A cava e a qai sauma kina vua na Kalou? “Au sa maroroi ira tiko me ra noqu era lewe vitu na udolu na tamata ka ra sega ni qarava na kalou ko Peali” 5E vaka tale ga kina e na gauna oqo: era sa vo tiko e dua na i lala lewe lailai, sa digitaki ira na Kalou e na nona yalo loloma. 6Na nona digidigi e yavutaki e na loloma ka sega ni yavutaki e na ka era cakava. Kevaka e yavutaki na digidigi ni Kalou e na ka e cakava na tamata, sa qai sega ni wili vaka i loloma dina na nona loloma. 7Sa qai vakaevei? Era a sega ni kunea na Isireli na ka era a vakasaqara tiko. Era a kunea ga ko ira na i lala lailai sa digitaki ira na Kalou; a ra sa yaco na kena vo me ra didivara ki na veikacivi ni Kalou. 8Me vaka e kaya na i Vola Tabu, “Sa cakava na Kalou me wele na yalodra kei na nodra vakasama; me yacova mai e daidai era sa sega ga ni rai e matadra se rogo e daligadra” 9Me vaka tale ga e kaya ko Tevita, “Me yaco me kedra i cori ka kedra dai na kedra magiti. Me yaco me ra lutu kina ka me ra totogitaki kina. 10Me boko mada ga na matadra me ra kakua ni rai rawa; ke me ra vakalairoro tiko ga e na veigauna kece e na bibi ni nodra i colacola” 11Au sa qai taroga tale, “Ni ra sa tarabe na Jiu, era sa mani bale ka rusa sara beka kina vakadua? E sega sara! Ka ni nodra sa i valavala ca na Jiu, sa qai kau kina na veivakabulai vei ira na kai matanitu tani, me ra vuvu kina na Jiu. 12Na nodra i valavala ca na Jiu sa kauta mai na veivakalougatataki levu ki vuravura; kei na nodra dravudravua vakayalo sa kauta mai na veivakalougatataki levu ki vei ira na kai matanitu tani. Sa na qai wacava li na levu ni veivakalougatataki ni ra sa wiliki kece kina na Jiu. 13Ia na ka au via kaya oqo au via kaya vei kemuni na kai veimatanitu tani: e na gauna kece ga au i apositolo tiko kina vei kemuni na kai veimatanitu tani, au na sakitaka tiko ga na noqu cakacaka. 14De lakolako au mani rawa ni vakavuna me ra vuvu na kai noqu me rawa ni ra vakabulai kina e so. 15Ni kevaka e yaco me rau veivinakati tale ko vuravura kei na Kalou e na nodra biu tani na Jiu, sa na wacava na nodra sa na vakadonui tale! E na sega li ni vaka na bula tale mai na mate? 16Ia kevaka sa soli vua na Kalou na i matai ni tiki ni buli madrai sa kena na i buli taucoko; ia kevaka sa soli vua na Kalou na waka ni kau sa nona kece tale ga na tabana. 17Ia kevaka era sa musuki laivi mai na vu ni olive tei e so na tabana ka ko ni sa mai sema kina ko i kemuni na kai veimatanitu tani me vaka e dua na taba ni olive ni veikau; ko ni sa mai vakaivotavota e na nodra kaukauwa kei na bula sautu na Jiu, 18sa sega ni dodonu vei kemuni mo ni beci ira na taba ni olive era sa musuki laivi. E rawa vakacava mo mai vaqoroqoroi iko? Ko iko ko tabana wale ga, ko sega ni vakabula na vuna, na vuna ga e vakabulai iko tiko. 19Ia ko na kaya tale, “Io e ra sa musuki laivi na tabana dina, me rawa ni'u sema kina ko i au” 20Sa dina koya. Era sa musuki laivi mai baleta ni ra sega ni vakabauta na Kalou ia ko ni sa la'ki toka dei ko i kemuni baleta ni ko sa vakabauta. Mo kakua ni dokadoka kina, ia mo rere ga. 21Ni kevaka e a sega ni vosoti ira na Jiu na Kalou, ko ira era sa vaka na taba ni olive dina; ko nanuma beka me na qai vosoti iko ko koya? 22E ke eda sa raica kina na yalovinaka kei na voravora ni lewa ni Kalou. Na voravora ni nona lewa vei ira era sa bale kei na nona yalovinaka vei iko kevaka ko sa tudei tiko e na nona loloma; ia kevaka ko na sega ni tudei tiko ko na musuki tani tale ga. 23Ia ko ira na Jiu, kevaka era na biuta tani na nodra sega ni vakabauta, era na kau lesu tale mai ki na nodra i tutu e liu, ni sa rawa vua na Kalou me semati ira tale. 24Ko i kemuni na kai matanitu tani ko ni sa vaka na taba ni olive ni veikau ka sa musuki tani. Ko ni sega ni mataqali vata kei na olive tei ko ni sa mai sema kina. Ia ko ira na Jiu era sa vaka na olive tei, ka sa sega ni dua na kena dredre vua na Kalou me semai ira lesu tale ki na vudra dina. 25Kemuni na veiwekani, oqo e dua na ka vuni ka'u vinakata mo ni kila, ka ni na vakabulai kemuni mai na nanuma ni ko ni sa tamata vukei. Na kaukauwa ni lomadra na Jiu e na sega ni ka tudei sara; e na yacova ga ni ra sa lako kece mai vua na Kalou na i wiliwili ni kai veimatanitu tani ka a dodonu me ra vakabulai. 26Ia e na vaka oqo na nodra vakabulai kece na Isireli. Me vaka e kaya na i Vola Tabu, “E na lako mai na i Vakabula mai Saioni, ka na kauta laivi na ca kece ga mai vei ira na kawa i Jekope. 27Keimami na cakava vata na veiyalayalati oqo, ni'u sa kauta tani na nodra i valavala ca .” 28E na vuku ni nodra cata na i Tukutuku Vinaka na Jiu, era sa mani yaco kina me ra meca ni Kalou, ka sa la'ki nomuni kina na kai veimatanitu tani na kena vinaka. Ia e na veidigitaki ga ni Kalou era sa wekana kina na Jiu e na vukudra na Pateriaki. 29Ka ni sega ni dau veisautaka na Kalou na nona vakasama vei koya sa digitaka ka vakalougatataka. 30Ko i kemuni na kai veimatanitu tani ko ni a talaidredre vua na kalou e liu, ia oqo sa yaco vei kemuni na nona loloma e na vuku ni nodra talaidredre na Jiu. 31E vaka tale ga kina ko ira na Jiu, e na vuku ni loloma sa yaco vei kemuni, era sa talaidredre kina vua na Kalou e na gauna oqo, ia oya me rawa ni yaco tale ga kina vei ira na loloma soli wale ni Kalou. 32Ni sa lewa na Kalou me da bobula kece na tamata ki na talaidredre, me rawa ni qai vakaraitaka na nona loloma soli wale vei keda kece ga. 33Sa uasivi dina na vinaka ni Kalou ki vei keda kece! Sa titobu sara ua nona vuku kei na nona kila ka! Ko cei ena rawa ni vakamacalataka na lomana? Ko cei e rawa ni kila na nona i vakarau? 34Me vaka sa kaya na i Vola Tabu: “Ko cei sa kila rawa na vakasama ni Turaga? Ko cei sa rawa me na soli i vakasala vua? 35Ko cei e sa bau solia vua e dua na ka me na sauma lesu tale ko koya?” 36Ni sa bulia na ka kece ga ko koya. E ra sa bula rawa tu e na nona kaukauwa, ka ra sa bula tale tu ga e na vukuna. Me ia mada ga vua na Kalou na veivakalagilagi ka sega ni mudu! Emeni.

will be added

X\