ROMA 10

1Kemuni na veiwekani, au sa gadreva mai na vu ni yaloqu taucoko ka masulaka vua na Kalou me ra vakabulai kece na kai noqu. 2Au sa rawa ni vakadinadinataka ni ra sa dau gumatua dina sara e na nodra qarava na Kalou, ia e sega ga ni maucokona vinaka sara na nodra kila me dodonu kina na nodra veiqaravi. 3Era se sega ni kila na sala e vakadonui ira kina na tamata na Kalou, ia era sa dau qara ga na nodra sala vaka i ira; ka ra sa mani sega kina ni vakamuria na sala sa dau veivakadonui kina na Kalou. 4Ka ni sa mai vakaotia na cakacaka ni Lawa ko Karisito; a sa yaco kina me ra vakadonui mai vua na Kalou ko ira kece ga era sa vakabauta. 5Sa i koya oqo na ka e a vola ko Mosese me baleta na nona veivakadonui na Kalou e na noda muria na Lawa: “Na tamata e vakayacora na ka e vakarota na Lawa e na bula kina.” 6Ia sa i koya oqo na ka e kainaki me baleta na noda vakadonui mai vua na Kalou e na vuku ni vakabauta: “Kakua ni kaya e lomamu, Ko cei e na lako cake ki lomalagi?” (Koya me la'ki kauti Karisito sobu mai.) 7“Kakua tale ga ni kaya, Ko cei e na lako sobu ki bulu?” (Koya me la'ki kauti Karisito cake tale mai na mate.) 8Sa i koya oqo na ka e kaya, “Sa tu volekati iko na vosa ni Kalou, sa tu sara ga e na gusumu kei na lomamu” -ia sa i koya ko ya na i tukutuku ni vakabauta keitou sa vunautaka. 9Kevaka ko na vakatusa e gusumu, ni sa Turaga ko Jisu, ka vakabauta e vu ni yalomu ni sa vakaturi koya cake tale mai na mate na Kalou, ko na vakabulai. 10Ni sa wilika na Kalou me dodonu na tamata e na vuku ni vakabauta ni yalona, ka sa vakabulai ko koya e na vuku ni vakatutusa ni gusuna. 11Ni sa kaya na i Vola Tabu, “Ko koya sa vakabauti koya e na sega ni vakamaduataki.” 12Oqo e da sa okati kece kina na tamata, ka ni sega na kedra duidui na Jiu kei ira na kai matanitu tani. Sa dua ga na noda Turaga na tamata kece ga ka sa vakalougatataki ira vakalevu era sa masu vua. 13Me vaka sa kaya na i Vola Tabu, “Ko ira yadua era masuta na yaca ni Turaga era na vakabulai.” 14Ia e na rawa vakacava me ra masu vua kevaka era sega ni vakabauta? Era na vakabauta rawa vakacava ke ra sa bera ni rogoca na i tukutuku? Era na rogoca rawa vakacava ke sega ni dua e la'ki vunautaka vei ira? 15Ka na la'ki vunautaka rawa vakacava vei ira na i tukutuku e dua na tamata ke sega ni talai? Ia me vaka e kaya na i Vola Tabu, “Sa lagilagi dina na nodra yaco mai ko ira era kauta mai na i Tukutuku Vinaka!” 16Ia era a sega ni ciqoma kece na i Tukutuku Vinaka; ka ni a kaya kina vaka i koya ko Aisea, “Kemuni na Turaga, ko cei e vakabauta na neitou i tukutuku?” 17Eda sa qai kila gona eke ni sa yaco na vakabauta e na vuku ni kena rogoci na i tukutuku, ka sa yaco mai na i tukutuku e na kena vunautaki na Karisito. 18Ia au taroga mada; e dina beka li ni ra a sega ni rogoca na i tukutuku? Sega, e sega ni dina, ka ni ra a sa rogoca ko ira me vaka ni a kaya na i Vola Tabu, “Na rorogo ni domodra sa yaco yani ki na veiyasa i vuravura kece ga; sa yaco na nodra vosa ki na i yalayala kei vuravura” 19Au sa qai taroga tale: Era a sega beka ni kila na Isireli? A i matai ni tamata me sauma na taro ko Mosese, ni a kaya e na vuku ni Turaga, “Au na vakavuna mo ni vuvutaka e dua na matatamata era sega ni dua na matanitu. Au na vakacudrui kemuni e na vukuna e dua na matanitu lialia.” 20Ia ko Aisea e a doudou cake sara e nona kaya e na vuku ni Turaga, “Era sa kunei au ko ira era a sega ni vakasaqarai au tiko, au sa rairai vei ira era a sega ni vaka tarogi au tiko.” 21Ia me baleti Isireli, e a kaya, “au sa dodoka tu na ligaqu ruarua e na siga taucoko ki na dua na matatamata dau talaidredre ka yalo kaukauwa.”

will be added

X\