ROMA 1

1Oqo na i vola i Paula, na dauveiqaravi ka i apositolo i Jisu Karisito, o koya ka a lesi ka kacivi mai vua na Kalou me vunautaka na nona i Tukutuku Vinaka. 2Na i Tukutuku Vinaka oqo e sa yalataka makawa sara tu na Kalou e na gusudra na parofita me vaka ka volai tu e na i Vola Tabu. 3Sa tukuni tiko kina na ka e baleta na Luvena, na noda Turaga ko Jisu Karisito, o koya ka a mai sucu vakatamata e na kawa i Tevita. 4Ia e na tikina vaka yalo sa vakaraitaki e na kaukauwa levu ni sa Luve ni Kalou e na nona vakaturi cake tale mai na mate. 5E na vukuna ga sa solia kina vei keitou na Kalou na i lesilesi vaka i apositolo me keitou vakaraitaka kina na sala vei ira na lewe ni veivanua kece ga me ra vakabauta ka talairawarawa vua na Kalou. 6Ko ni sa okati tale ga kina mai Roma, ko i kemuni sa kacivi kemuni na Kalou mo ni sa nei Jisu Karisito. 7O koya gona au sa volavola yani kina oqo vei kemuni kece mai Roma, o i kemuni sa lomani kemuni ka kacivi kemuni na Kalou mo ni nona tamata: Me sobuti kemuni na loloma kei na vakacegu ni Kalou na Tamada kei na noda Turaga ko Jisu Karisito. 8Na kena i matai, au sa vakavinavinaka vua na Kalou e na vuku i Jisu Karisito me baleti kemuni taucoko sara, ni sa rogovaki e vuravura taucoko na nomuni vakabauta. 9Sa noqu i vakadinadina na Kalou, o koya au sa qarava e na yaloqu taucoko e na kena vunautaki na i Tukutuku Vinaka me baleta na Luvena. Sa kila na Kalou ni'u sa dau nanumi kemuni tiko ga, 10e na veigauna kece e na noqu masu. Au sa dau kerea tiko ga vua na Kalou me na bau solia e dua na gauna kevaka e rawa me'u sikovi kemuni kina. 11Ni'u sa gadreva vakalevu me'u raici kemuni ka vota vei kemuni e so na ka ni veivakalougatataki vakayalo me vakaukauwataki kemuni. 12Oya e kena i balebale, me da vukei kece kina, mo ni vukei au e na nomuni vakabauta, ka me'u vukei kemuni tale ga e na noqu vakabauta. 13Au vinakata mo ni kila na wekaqu ni sa vuqa na gauna au nakita kina me'u la'ki sikovi kemuni yani, ia e qai dau yaco ga e dua na ka me'u tarovi kina. Au gadreva tu me bau so tale ga vei kemuni me ra vuki me ra vakabauta na Turaga ko Jisu e na vuku ni noqu cakacaka me vaka e sa yaco vei ira e so tale na kai matanitu tani. 14Ni sa tu e dua na noqu i tavi ki vei ira na tamata kece ga, vei ira sa rarama kei ira na butobuto, vei ira na vuli kei ira tale ga na lecaika. 15Sa i koya oqo au sa gadreva vakalevu kina me'u vunautaka tale ga na i Tukutuku Vinaka vei kemuni ko ni tiko mai Roma. 16Ni'u sa sega ni maduataka ni Tukutuku Vinaka, ni sa i koya oqo na kaukauwa ni Kalou me vakabulai ira kece kina era sa vakabauta; sa liu vei ira na Jiu ka vaka kina vei ira na kai matanitu tani. 17Sa vakaraitaki e na i Tukutuku Vinaka na sala sa rawa ni vakadonui keda kina na tamata na Kalou, oya ni sa ia na veivakadonui na Kalou e na vuku ni vakabauta duadua ga. Me vaka sa volai tu e nai vola Tabu, “E na vakabulai ko koya sa vakadonui koya na Kalou e na vuku ni nona vakabauta.” 18Sa vakaraitaki mai lomalagi na cudru ni Kalou me baleta na nodra i valavala ca kei na nodra i tovo dukadukali kece ga na tamata era sa dau tarova na kena kilai na i vakavuvuli dodonu e na nodra i valavala. 19Sa totogitaki ira na Kalou baleta ni sa matata vinaka tu vei ira na veika kece e rawa ni kila na tamata me baleta na Kalou, ka ni a vakatakila ga vei ira na Kalou na veika oya. 20Me tekivu mai na gauna e sa qai buli kina na vuravura sa laurai vinaka tu na veika vuni ni Kalou e na nona kaukauwa e sega ni vakaiyalayala kei na nona i tovo ni bula vakalou. Sa rawa ni ra raica oya na tamata e na veika e bulia na Kalou, ka sa sega kina na nodra i ulubale. 21Era sa kila tiko na Kalou, ia era sega ga ni vakarokorokotaki koya me vaka na kena dodonu, ka ra sega tale ga ni vakavinavinaka vua. Ia sa yaco me lialia kina na nodra vakanananu, ka butobuto na nodra vakasama. 22Era kaya ni ra sa vuku, ia era sa lialia ga. 23Era sa sega ni qarava na Kalou dina, ia era sa qarava ga na veivakatakarakara e caka me vaka na tamata se manumanu vuka, se na manumanu yava i va se na veika sa dau qasi. 24Oya gona na vuna sa laivi ira kina na tamata na Kalou me ra vakayacora na veika dukadukali e gadreva na lomadra, ka cakava vakataki ira na veika e veivakamaduataki. 25Era sa biuta na i vakavuvuli dina me baleta na Kalou ka maroroya me nodra na veika lasu. Era sa cuva ka qarava na ka e bulia na Kalou ka sega ni so-kalou vua na Dauveibuli, o koya sa dodonu me vakacaucautaki ka sega ni mudu! Emeni. 26O koya gona sa laivi ira kina na Kalou me ra vakayacora na veigagadre ca e veivakamaduataki. Ko ira sara mada ga na yalewa era sa vakayagataka vakatani na tikidra vakayalewa. 27Sa vaka tale ga kina ko ira na tagane, era sa biuta na nodra dau veidomoni kei ira na yalewa ka ra sa veivinakati ga vaka i ira. Era sa vakayacora vaka tagane na veika e veivakamaduataki; o koya gona era sa sota kaya kina na i totogi sa dodonu me tau vei ira. 28Ia ni ra sa bese ni kila na tamata na veivakavuvuli dina e baleta na Kalou, sa mani laivi ira kina na Kalou me ra kitaka na veika ca vakasisila kece ga era rawa ni vakasamataka. 29A ra sa vakasinaiti e na veika ca kece ga, na veika dukadukali, na kocokoco, na veicati, na vuvu, na laba, na veivala, na lasu, na yalo cudrucudru kei na dauvakaucaca. 30Era veikaseti vakataki ira, era cata na Kalou, veivakasewasewani, dokadoka ka qaciqacia; era sa dau vakasamataka e vuqa na sala me ra cakava kina na ka ca, ka ra sa sega ni muria na nodra vosa na nodra i tubutubu. 31Era sa yalowai; era sega ni dau vakayacora na nodra vosa ni yalayala, ka sega ni dau veikauwaitaki se lomani ira na tani. 32Era sa kila na lewa ni Kalou ni sa dodonu me ra mate ko ira na tamata vakaoqo. Ia e sega wale ga ni ra cakava tiko ga, era vakadonui ira tale ga na tani era vakayacora tiko.

will be added

X\