VAKATAKILA 9

1Sa qai uvuca na nona davui na i kalima ni agilosi, ka'u sa qai raica e dua na kalokalo sa lutu mai lomalagi ki vuravura, ka sa soli vua na i dola ni qara sega ni katumi rawa na kena titobu. 2Sa qai dolava na qara ko koya ka sa kuvu mai kina na kubou me vaka na kubou ni dua na lovo levu; a sa vakabutobutotaki na matanisiga kei na maliwa lala e na kubou mai na qara. 3Ia mai na kubou ko ya era sa basika mai kina ki vuravura na vodre, ka sa soli vei ira na kaukauwa me vaka na nodra kaukauwa na batibasaga ni vuravura. 4Sa vakaroti vei ira me ra kakua ni vakaeaeana na eo e vuravura, se na vunikau me vaka na kau; ko ira ga na tamata e sega ni volai e na yadredra na i vakatakilakila ni Kalou. 5Sa soli vei ira me ra vakararawataki ira na tamata me lima na vula, ia me ra kakua ga ni vakamatei ira, ia na vutu ni nodra veivakararawataki e vaka na vutu ni kata ni batibasaga vua e dua na tamata. 6Ia e na loma ni gauna ko ya era na vakasaqara na mate ko ira na tamata ko ya ka ra na sega ni kunea; era na gadreva me ra mate ia e na dro tani mai vei ira na mate. 7Ia na kedra i rairai na vodre e vakataki ira na ose era sa vakarautaki tu ki na i valu; e uludra sa toka kina na ka era vaka na i sala vakatui koula; na matadra e vaka na mata ni tamata. 8Na drau ni uludra e vaka na drau ni uludra na yalewa, ka sa vaka na bati ni laione na batidra. 9Na i ubi ni lomaseredra e vaka na i sasabai kaukamea ni sereda, ia na rorogo ni tabadra e vaka na domo ni vuqa na qiqi ni valu dreta na ose ni ra sa cici ki na i valu. 10Na buidra e vaka na bui ni batibasaga, sa tiko kina na batidra gaga; ka sa tiko e na buidra na kaukauwa me vakararawataki ira kina na tamata me vula lima. 11Sa nodra tui ko koya na agilosi ni qara sega ni katumi rawa; a yacana vaka-Iperiu ko Apatoni, ka va-Kirisi ko Apolioni e kena i balebale na dauveivakarusai. 12Sa takali yani na i matai ni ka rarawa, ka raica sa vo tale e rua. 13Sa qai uvuca na nona davui na i ka ono ni agilosi, ka'u sa rogoca e dua na domo mai na i leu e va e na i eabocabo ni soro koula e na mata ni Kalou; 14sa kaya tiko vua na i ka ono ni agilosi o koya sa tiko vua na davui, “Sereki iratou na agilosi e va e ratou sa vesu tu e na uciwai levu na Euferetisi.” 15E ratou sa qai sereki na agilosi e va, ko iratou e ratou sa vakarautaki tu me baleta na aua, na siga, na vula kei na yabaki me ratou vakamatea kina e dua na i katolu ni wiliwili ni tamata taucoko. 16Ia au sa rogoca na kedra i wiliwili na mataivalu ose: era lewe rua na drau na milioni. 17Ia sa vakaoqo na noqu raiei ira na ose e na noqu raivotu: ko ira era vodo ose era vakaisasabai roka damudamu vaka na bukawaqa ka karakarawa vaka na safaya, ka dromodromo vaka na sulifure. Na uludra na ose e vaka na ulu ni laione, ka sa lako mai gusudra na bukawaqa, na kubou kei na sulifure. 18A ra sa vakamatei e dua na i katolu ni wiliwili ni tamata e na ka ca tolutolu sa lako mai na gusudra na ose ko ya, na bukawaqa, na kubou kei na sulifure. 19E tiko na nodra kaukauwa na ose e na gusudra kei na buidra. Sa vaka na gata na buidra; era sa vakauludra ka ra sa dau veivakamavoataki kina. 20Ia ko ira na vo ni tamata ka ra sega ni vakamatei e na veimate ca ko ya, era sega ni veivutunitaka na cakacaka ni ligadra ka ra sega tale ga ni biuta na qaravi tevoro kei na veimatakau koula, na siliva, na parasa, na vatu, kei na kau, na ka era sega ni rawa ni rai se rogo se lako. 21Era sega tale ga ni veivutunitaka na nodra laba, se na nodra cakacaka vakatevoro, se na nodra dauyalewa kei na dautagane, se na nodra daubutako.

will be added

X\