VAKATAKILA 8

1Ia ni sa cecega na i kavitu ni drega na Lami sa qai vakanomodi tu ko lomalagi me rauta e veimama ni aua. 2Au sa qai raici iratou na agilosi e vitu e ratou sa tu e na mata ni Kalou, ka sa soli vei iratou e vitu na davui. 3Sa qai lako mai e dua tale na agilosi sa taura tu e dua na miqa koula, ka la'ki tu e na mata ni cabocabo ni soro; sa soli vakalevu vua na veika boi vinaka me wakia vata kei na nodra masu na tamata yalosavasava e na dela ni cabocabo ni soro koula e na mata ni tikotiko vakaturaga. 4A sa tubu cake na kubou ni veika boi vinaka kei na nodra masu na tamata yalododonu mai na liga ni agilosi e na mata ni Kalou. 5Sa qai kauta na miqa na agilosi ka vakasinaita e na qilaiso waqa mai na i cabocabo ni soro ka viritaka ki vuravura; a sa lutu na kurukuru, ka rogo e dua na rorogo levu, ka tatatibitibi na liva ka yaco e dua na uneune. 6E ratou sa qai vakarautaki iratou na agilosi e vitu me ratou uvuca na davui sa tu vei iratou. 7Sa qai uvuca na nona davui na i matai ni agilosi, ka sa mimiri mai na uca cevata kei na bukawaqa, sa waki vata tu kei na dra, ka mira ki vuravura. A sa vakamai e dua na i katolu ni vuravura, kei na dua na i katolu ni wiliwili ni vunikau. Sa vakamai kece tale ga na veico drokadroka. 8Sa qai uvuca na i karua ni agilosi na nona davui, ka sa kolotaki ki wasawasa e dua na ka e vaka e dua na ulunivanua levu, sa caudre tu e na bukawaqa; 9ka sa vuki ka yaco me dra e dua na i katolu ni wasawasa. A sa mate e dua na i katolu ni veika bula e wasawasa, ka sa vakacacani e dua na i katolu ni wiliwili taucoko ni waqa. 10Sa qai uvuca na nona davui na i katolu ni agilosi, ka sa lutu mai lomalagi e dua na kalokalo vakaitamera, ka sa caucaudre tu me vaka na cina sasa, ka sa lutu ki na dua na i katolu ni wiliwili ni veiuciwai kei na veimataniwai. 11Na yaca ni kalokalo koya ko Duvagaga. Sa vagagai kina na i katolu ni wasewase ni wai, ka ra sa mate e lewe levu na tamata, ni sa vagagai na wai. 12Sa qai uvuca na nona davui na i ka va ni agilosi, a sa ravuti e dua na i katolu ni matanisiga, kei na dua na i katolu ni vula kei na dua na i katolu ni veikalokalo. A sa vakabutobutotaki kina e dua na i katolu ni siga; ka vaka tale ga kina e dua na i katolu ni bogi. 13Ni oti koya au qai rai tale, ka'u sa rogoca e dua na ikeli sa kaci tiko vakadomoilevu ni sa vuka tiko e na maliwa lala, ka kaya, “Na leqa! Na leqa! Na leqa vakadomobula e na vakarau yaco vei ira era tiko e vuravura ni sa na rogo na davui ka ratou sa vakarau uvuca tiko na agilosi e tolu!”

will be added

X\