VAKATAKILA 5

1Au sa qai raica e na liga i matau i koya sa tiko e na i dabedabe vakatui e dua na i vola vivigi sa volai tu e loma, e dakuna tale ga ka sa dregati e na vitu na drega kama. 2Au qai raica tale ga e dua na agilosi kaukauwa sa kaci tiko e na domo levu, ka kaya: “O cei sa ganiti koya me cecega na drega ka tevuka na i vola vivigi?” 3Ia e a sega ni kune e dua mai lomalagi se e vuravura se e ruku i vuravura me tevuka rawa na i vola vivigi se raica na lomana. 4Ka'u sa tagi vakalevu ni sa sega ni kune e dua e ganita me tevuka na i vola vivigi se me raica na lomana. 5Sa qai kaya vei au e dua vei ira na qase, “Kakua ni tagi; raica, sa qaqa na Laione ni yavusa i Juta, na weka i Tevita, ka sa rawa kina ni cecega na drega e vitu ka tevuka na i vola vivigi .” 6Ia e na maliwa ni dabedabe vakatui kei iratou na ka bula e va kei ira na qase, au raica ni duri tu kina e dua na Lami me vaka e a sa vakamatei oti. E vitu na kena i leu ka vitu na matana; koya ko ira na yalo ni Kalou e vitu era sa talai ki vuravura taucoko. 7Sa qai lako na Lami ka la'ki taura na i vola vivigi mai na liga i matau i koya ka dabe tiko e na i dabedabe vakatui. 8Ia ni sa kauta na i voIa vivigi e ratou sa qai cuva sobu e na mata ni Lami ko iratou na ka bula e va kei ira na qase e ruasagavulukava ka ra sa taura tiko e yadua na api ka so na sedre koula sa sinai e na ka boi vinaka, koya na nodra masu na tamata yalosavasava. 9Era sa lagata e dua na sere vou, ka kaya: “Sa ganiti kemuni mo ni taura na i vola vivigi ka cecega na kena drega. Ni ko ni a sa vakamatei, ka ni ko ni sa volia na tamata e na nomuni dra me ra nona na Kalou; mai vei ira kece ga na veiyavusa, na duivosavosa, na veimataqali tamata kei na veimatanitu. 10Ko ni sa qisi ira me ra lewe ni dua na matanitu vakabete me ra qarava na nodra Kalou, ka ra na veiliutaki e vuravura” 11Au sa qai rai tale, ka rogoca na domodra e milioni vaka milioni ka udolu vakaudolu na agilosi era vakavolivolita na i dabedabe vakatui kei iratou na ka bula kei ira na qase, 12ka ra kaya tiko e na domo levu, “Sa ganiti koya na Lami ka a vakamatei me soli vua na kaukauwa, na i yau, na vuku, na qaqa, na veidokadokai, na lagilagi kei na vakavinavinaka!” 13Au sa qai rogoci ira na ka bula kece mai lomalagi e vuravura, e na ruku i vuravura kei na wasawasa kei ira kece ga era sa tiko kina ni ra kaya tiko, “Me ia vei koya sa tiko e na i tikotiko vakaturaga kei na Lami na vakavinavinaka, na veidokai, na veika lagilagi kei na qaqa, ka sega ni mudu!” 14E ratou sa qai kaya na ka bula e va, “Emeni!” ka ra sa qai tekiduru na qase ka vakarokoroko.

will be added

X\