VAKATAKILA 4

1Ni sa oti koya au sa qai rai ki lomalagi ka raica sara e dua na katuba sa tadola tu. Ia sa qai kaya na domo ka'u a rogoca taumada ni sa vosa tiko mai vei au vaka na domo ni davui, “Lako cake mai ki ke me'u na vakatakila vei iko na veika e na yaco e na gauna mai muri” 2Sa qai curumi au vakasauri na Yalo Tabu, ka'u sa raica sara e dua na i dabedabe vakatui mai lomalagi ka sa dabe toka kina e dua, 3e vaka na i rairai ni vatu jasipa kei na kaneliani na kena i rairai. Sa vakavolivolita na i dabedabe vakatui e dua na drodrolagi ka vaka na emeralita na kena i rairai. 4Sa vakavolivolita tale ga na i dabedabe vakatui e ruasagavulukava tale na i dabedabe vakatui ka ra dabe tiko kina e ruasagavulukava na qase, era vakaisulu vulavula ka ra tokara na i sala vakatui e uludra. 5Sa basika mai na i dabedabe vakatui na tibi ni liva, na rorogo domo i levu kei na vadugu ni kurukuru. E na mata ni dabedabe koya sa tiko kina e vitu na cina sa caudre tu. Sa i ira oqo na Yalo ni Kalou e lewe vitu. 6Ia sa tu e na mata ni tikotiko vakaturaga na ka e vaka e dua na wasawasa iloilo, sa makare vinaka sara mai na karisitala. Ia e ratou sa tu e va na ka bula e na yasa ni tikotiko vakatui, ka sa robo na yagodratou taucoko, na matadratou kei na dakudratou, e na yaloka ni mata. 7Sa vaka na laione na i matai ni ka bula. Sa vaka na luve ni bulumakau na i karua ni ka bula. Sa mata vakatamata na i katolu ni ka bula, ka sa vaka na ikeli sa vuka tiko na kena i ka va. 8Ia ko iratou na ka bula e va oqo e ratou sa tauya ono na tabadratou, ka sa robo na yagodratou kei na ruku ni tabadratou e na yaloka ni mata, ka ratou sa sega ni cegu e na siga kei na bogi ni ratou lagata tiko vakaoqo: “Sa Savasava, sa Savasava, sa Savasava na Kalou Kaukauwa, o koya ka a bula e liu, ka sa bula tiko e daidai; o koya tale ga ka na lako mai!” 9Ia e na veigauna kece ga era sa vakacabora kina na ka bula na nodra veivakalagilagi kei na vakarokoroko kei na vakavinavinaka vei koya sa tiko e na i dabedabe vakatui o koya sa bula tu ka tawa mudu, 10era sa tekiduru ka cuva na qase e lewe ruasagavulukava e na mata i koya sa tiko e na i dabedabe vakatui ka ra vakarokoroko vei koya sa bula ka tawa mudu. Era sa biuta na nodra i sala vakatui e na mata ni dabedabe vakatui ka ra lagata tiko, 11“Sa ganiti kemuni, na neimami Turaga ka neimami Kalou, me cabo vei kemuni na neimami veivakalagilagi kei na vakarokoroko kei na kaukauwa. Ni ko ni a bulia na veika kece; era sa buli ka ra sa tu dei tu e na nomuni lewa.”

will be added

X\