VAKATAKILA 3

1“Mo vola tale ga oqo vua na agilosi ni soqosoqo lewe ni lotu mai Sariti ka kaya: “Sa tukuna na veika oqo ko koya sa tu vua na Yalo ni Kalou e vitu kei na kalokalo e vitu. Au sa kila na veika ko sa kitaka tiko; ko sa kilai tu ni ko sa bula tiko, ia sa yacamu wale ga na bula ko sa mate ga! 2Mo yadra mai ka vakaukauwataka na ka sa vo tiko vei iko ka sa vovoleka ni mate vakadua sara. Au sa kunea ni sa sega ni dua na nomu cakacaka e vakacavari vakavinaka sara e na mata ni noqu Kalou. 3Ia mo nanuma na ka ko sa vakatavulici kina kei na ka ko a rogoca; mo taura matua ka veivutuni. Ia kevaka ko na sega ni yadra mai, au na yaco yani me vaka e dua na daubutako, ka ko na sega ni kila na tiki ni gauna au na lako yani kina vei iko. 4Ia e se tiko vei iko e Sariti e lewe vica era sa sega ni vakadukadukalitaka na nodra i sulu, ko ira oqo era na lako vata kei au ka ra na vakaisulu vulavula, ni sa ganiti ira. 5E na vakaisulu vulavula vaka kina ko koya sa qaqa, ka'u na sega ni bokoca laivi na yacana mai na kedra i vola na bula. Au na vakatusa na yacana e na mata i Tamaqu kei na matadra na nona agilosi ni sa noqu ko koya. 6“O koya sa vakadaligana, me rogoca sara na ka sa kaya na Yalo Tabu vei ira na veisoqosoqo lewe ni lotu! 7“Mo vola tale ga oqo vua na agilosi ni soqosoqo lewe ni lotu mai Filadelafia ka kaya: “Sa tukuna na veika oqo ko koya sa yalo savasava, ka dina; o koya sa taura tu na ki i Tevita, o koya ni sa dolava e na sega ni rawa vua e dua me sogota, ia ni sa sogota e na sega ni rawa vua e dua me dolava. 8Au sa kila na veika ko sa cakava tiko. Au sa kila ni sa vo vakalailai ga na nomu i cegu, ia ko sa muria tiko ga na noqu vosa ka sega ni cakitaka na yacaqu. Raica au sa dolava e matamu e dua na katuba ka na sega ni rawata e dua na tamata me sogota. 9Raica, au na vakayacora me ra lako mai ka mai cuva e yavamu, ka kila ni'u sa lomani iko. Ko ira na i vavakoso i Setani, ko ira era kaya ni ra sa Jiu, ia era sega ni Jiu, era sa lasu ga. 10Ni ko sa vakayacora na noqu vosa e na yalo vosota, au na maroroi iko e na gauna ni rarawa sa rorova tiko mai na vuravura taucoko me vakatovolei ira era tiko e vuravura. 11Au na lako yani e na dua na gauna wale ga oqo. Maroroya vinaka na ka sa tu vei iko, me kakua ni dua e kovea vei iko na nomu i covi. 12O koya sa qaqa, au na qisi koya me dua na duru e na vale tabu ni noqu Kalou; e na sega sara ni lako tani mai kina. Au na vola vua na yaca ni noqu Kalou, kei na yaca ni koro ni noqu Kalou, ko Jerusalemi vou, na kena ka na lako sobu mai lomalagi mai vua na noqu Kalou. Au na vola tale ga vua na yacaqu vou vakai au. 13“O koya sa vakadaligana, me rogoca sara na ka sa tukuna na Yalo Tabu vei ira na veisoqosoqo lewe ni lotu! 14“Mo vola tale ga oqo vua na agilosi ni soqosoqo lewe ni lotu mai Leotisea ka kaya: “Sa kaya na veika oqo na Emeni, na i vakadinadina dina ka yalodina, na i vakatekivu ni veika kece sa bulia na Kalou. 15Au sa kila na veika ko sa kitaka tiko. Ko sa sega ni batabata ka sega tale ga ni katakata. Au vinakata mo batabata se mo katakata. 16Ia me vaka ni ko sa katakata vakalailai ga ka sega ni batabata se katakata, au na luaraki iko laivi mai gusuqu. 17Ni ko sa kaya tiko, ʻAu sa vutuniyau, au sa rawati au, ka sa sega na noqu leqa,ʼ ia ko sa sega ni kila ni ko sa malumalumu ka vakaloloma! Ko sa dravudravua ka mataboko ka luvawale! 18O koya gona au sa vakasalataki iko kina mo mai volia vei au na koula sa vakatovolei e na buka waqa, mo vutuniyau kina; kei na i sulu vulavula mo vakaisulu kina, ka me vunitaki kina na nomu luvawale e veivakamaduataki; kei na i sui ni mata, me sui kina na matamu, mo rai rawa kina. 19Au sa cudruvi ira ka vakanakuitataki ira ka'u sa lomana. O koya mo gumatua sara kina ka veivutuni. 20Raica, au sa tu e na mata ni katuba ka tukituki; kevaka sa rogoca na domoqu e dua na tamata, ka dolava na katuba, au na curu vua ka vakayakavi vata kaya ka na vakayakavi vata kei au ko koya. 21Vei koya sa qaqa au na vakadonuya me dabe e tikiqu e na noqu i dabedabe vakatui me vaka au a sa qaqa ko i au ka dabe vata kei Tamaqu e na nona i dabedabe vakatui. 22“O koya sa vakadaligana me rogoca sara na veika sa tukuna na Yalo Tabu vei ira na veisoqosoqo lewe ni lotu!”

will be added

X\