VAKATAKILA 22

1Sa qai vakatakila vei au na agilosi na uciwai ni bula sa makare sese me vaka na karisitala, sa drodro tiko mai na i tikotiko vakaturaga ni Kalou kei na Lami 2ka drodro mai ki na loma donu ni gaunisala e na loma ni koro. Sa tu tale ga e na bati ni uciwai ruarua na kau ni bula, ka sa vuataka na vuana vakatinikarua e na dua na yabaki, vakadua e na dua na vula; ia na drauna sa medra wai ni bula na lewe ni veivanua. 3E na sega ni kune tale e na loma ni koro e dua na ka vakasisila. Ia e na tiko kina na i dabedabe vakatui ni Kalou kei na Lami, ka ra na qaravi koya ko ira na nona tamata. 4Era na raica na matana, ka na volai e na yadredra na yacana. 5Sa na sega tale na bogi, ka sa na sega ni yaga vei ira na cina se na rarama ni siga, ka ni sa na nodra rarama na Turaga na Kalou, ka ra na veiliutaki tiko ka tawa mudu. 6Sa qai kaya vei au na agilosi: “Sa dina na vosa oqo ka sa dodonu me vakadinati. Ia na Turaga na Kalou O koya ka sa solia na Yalona vei ira na parofita, sa tala mai na nona agilosi me vakatakila vei ira na nona bobula na ka sa na vakarau sara me yaco.” 7“Raica!” sa kaya ko Jisu. "Sa voleka sara ni'u lesu tale yani! Sa kalougata ko koya sa talairawarawa ki na vosa ni parofisai ni vola oqo!” 8Ia, ko i au ko Joni ka'u sa rogoca ka raica na veika oqo. Ia ni'u sa rogoca ka raica oti au sa qai cuva sobu e na yava ni agilosi ka vakatakila vei au na veika oqo me'u vakarokoroko vua. 9Ia e a qai kaya vei au ko koya: “Kakua ni cuva vei au! Ko i au e dua na nomu i tokani bobula ka nodra i tokani na wekamu, na parofita, kei ira era muria na vosa ni vola oqo. Vakarokoroko ga vua na Kalou!” 10Ia sa qai kaya vei au: “Kakua ni dregata na vosa ni parofisai ni vola oqo, ni sa voleka na kena gauna. 11Laiva na daucaka ca me caka ca tiko ga, ko koya sa dukadukali me dukadukali tiko ga, ko koya sa yalo dodonu me caka dodonu tiko ga kei koya sa yalosavasava me savasava tiko ga.” 12Sa qai kaya ko Jisu, “Raica! Sa voleka sara ni'u lesu tale yani! Au na kauta tiko yani na noqu i covi me'u solia vua na tamata yadua me vaka na veika e sa kitaka. 13Ko i au na Alifa kei na Omeka, na i vakatekivu kei na i vakataotioti!” 14Sa kalougata ko ira era sa savata na nodra i sulu, me nodra kina na dodonu me ra kania na vua ni kau ni bula ka curu ki na koro e na kena matamata. 15Ia e taudaku ni koro era sa tu kina ko ira era sa dau vakatanitaka na bula, na dauvakatevoro, na dauyalewa kei na dautagane, na daulaba, na dauqaravi kalou matakau, kei ira na dau lasu. 16“Ko i au ko Jisu, ka'u sa tala vei iko na noqu agilosi me vakatakila na veika oqo ki na veisoqosoqo lewe ni lotu. Ko i au na coke kei na kawa i Tevita, na kalokalo i vola siga serau.” 17A rau sa kaya na Yalo Tabu kei na yalewa vou, “Lako mai!” Laivi koya sa rogoca oqo me kaya tale ga, “Lako mai!” Ka laivi koya sa via gunu me lako mai. Laivi koya ga sa vinakata, me lako mai, ka mai gunuva na wai ni bula, ka kakua ni sauma. 18Ko i au ko Joni au sa vakasalataka na tamata yadua sa rogoca na vosa ni parofisai ni vola oqo: kevaka e na vakuria kina e dua na ka e dua na tamata, e na vakuria vua na Kalou na veika rarawa sa vakamacalataki tiko e na i vola oqo. 19Ia kevaka e na kauta tani e dua na tamata e dua na ka mai na vosa ni parofisai sa tu e na i vola oqo, e na kauta tani na Kalou na nona i votavota mai na kau ni bula kei na koro tabu me vaka sa vakamacalataki tu e na i vola oqo. 20Ia sa kaya ko koya sa vakatakila na veika oqo: “Sa dina sara! Sa voleka sara ni'u lesu tale yani!” Emeni! Ni lako mai Turaga Jisu! 21Me tiko mada ga kei kemuni kece na loloma ni Turaga ko Jisu Karisito! Emeni.

will be added

X\