VAKATAKILA 21

1Au sa qai raica e dua na lomalagi vou kei na dua na vuravura vou, ka ni sa takali tani na lomalagi makawa kei na vuravura makawa, ka sa sega ni tiko tale na wasawasa. 2Au sa qai raica na koro tabu, ko Jerusalemi vou, sa lutu sobu tiko mai lomalagi, mai vua na Kalou, sa ukucavu tu me vaka na yalewa vou sa uku me kau vua na watina. 3Au sa qai rogoca e dua na domo levu mai na i tikotiko vakaturaga sa kaya: “Raica, sa tiko na vale ni Kalou, sa tiko vei ira na tamata! E na tiko vata kei ira ko koya ka ra sa na nona tamata. Na Kalou vaka i koya e na tiko vata kei ira ka na nodra Kalou ko koya. 4E na tavoya tani na wai ni mata kece ga mai na matadra ko koya, ka sa na sega tale na mate; sa na sega tale ga na rarawa se na tagi se na vutugu, ni ra sa takali tani na veika makawa.” 5Sa qai kaya ko koya sa tiko e na i tikotiko vakaturaga, “Raica, au sa vakavouya na veika kece ga.” Sa qai kaya tale: “Vola mada oqo, ni ra sa vosa dina na veivosa oqo ka rawa ni ra vakadinati.” 6Sa qai kaya vei au: “Sa vakayacori oti! Ko i au na Alifa kei na Omeka, na i vakatekivu kei na i vakataotioti. Ki vei ira ka via gunu au na solia wale vei ira na wai mai na i vurevure ni wai ni bula. 7O koya sa qaqa e na nona na veika oqo: au na nona Kalou ka na luvequ ko koya. 8Ia ko ira na dadatuvu, na tawa vakabauta, ko ira e vakasisila na nodra i vakarau, ko ira na daulaba na dautagane kei na dauyalewa, na dauvakatevoro, na dauqaravi kalou tani kei ira kece na lasulasu, sa na nodra i votavota na drano sa kama tu kina na buka kei na sulifure. Sa i koya oqo na i karua ni mate.” 9Ka sa qai lako mai e dua vei iratou na agilosi e vitu ka ratou taura tiko na sedre e vitu sa sinai tu kina na i otioti ni veika rarawa e vitu, ka vosa vei au ka kaya: “Lako mai. Au na vakatakila vei iko na Yalewa vou, na wati ni Lami.” 10Au sa qai vakasinaiti e na Yalo Tabu ka sa kauti au na agilosi ki na dela ni dua na ulunivanua cecere sara, ka vakaraitaka vei au na koro tabu ko Jerusalemi ni sa lutu sobu tiko mai lomalagi, mai vua na Kalou. 11Sa sinai e na i serau ni Kalou. Na kena rarama e vaka na vatu talei kunekune dredre sara, e vaka na vatu jasipa, ka e vakaraitayaloyalo me vaka na karisitala. 12Sa dua na kena bai eecere levu ka tinikarua na kena matamata, ka ratou sa tu e na matamata e tinikarua na agilosi. A sa volai e na matamata na yacadra na nodra yavusa na luve i Isireli e tinikarua. 13Sa tolu na matamata e na tokalau, tolu na matamata e na vualiku, tolu na matamata e na ceva ka tolu na matamata e na ra. 14Sa tinikarua na vatu ka yavu ni bai ni koro, ka sa volai kina na yacadra na i apositolo ni Lami e lewe tinikarua. 15Ia sa tu vei koya e vosa tiko vei au e dua na gasau koula ni vakarau me vakarautaka na koro kei na kena matamata kei na kena bai. 16Sa va na yasa ni koro sa tautauvata na kena balavu kei na kena raba. Sa qai katuma na koro ko koya e na nona gasau ni vakarau. Sa 2,400 na kilomita na kena balavu ka sa tautauvata na kena balavu kei na kena raba kei na kena cecere. 17A katuma tale ga ko koya na kena bai: Sa onosagavulu na mita na kena cecere, koya ni taurivaka ko koya na i vakavakarau vakatamata ga. 18Sa caka e na vatu jasipa na kena bai, ia na koro sa caka e na koula dina ka sa makare sese me vaka na iloilo savasava. 19Sa vakaiukuukutaki na yavu vatu ni koro e na veivatu talei kece ga. A i matai na jasipa. A i karua na safaya. A i katolu na aketi. A i kava na emeralita. 20Ai kalima na onikisi. A i kaono na kaneliani. A i kavitu na karisilaite. A i kawalu na perili. A i kaciwa na topasi. A i katini na karaisoperesi. A i katinikadua na jeisinici. A i katinikarua na amecisita. 21Ia sa caka na mataniciva na matamata e tinikarua; na matamata yadua sa caka e na dua na mataniciva. Ia na sala ni lomanikoro sa caka e na koula dina, sa makare sese me vaka na iloilo. 22Ia au a sega ni raica e dua na valenisoro e na lomanikoro, ka ni sa kena valenisoro ga na Turaga na Kalou Kaukauwa kei na Lami. 23Sa sega ni yaga e na koro oqo na matanisiga se na vula me cila kina ka ni sa vakararamataki e na i serau ni Kalou ka sa kena cina na Lami. 24Era na lako voli e na kena rarama ko ira na lewe ni veimatanitu, ka ra na yauta yani kina na nodra i yau ko ira na tui kei vuravura. 25E na sega ni sogo e na siga na kena matamata, ka sa na sega tale ga na bogi e kea. 26Era na kauta yani kina na veimatanitu na nodra i yau kei na nodra lagilagi. 27Ia e na sega sara ni curu kina e dua na ka tawa savasava se dua e kitaka na veika vakasisila se dau lasulasu; ko ira ga era sa volai tu e na i vola ni bula ni Lami.

will be added

X\