VAKATAKILA 20

1Au sa qai raica e dua na agilosi sa lako sobu tiko mai lomalagi, ka taura tiko e ligana na i dola ni qara sega ni katumi rawa kei na dua na sinucodo levu. 2Sa qai taura na gata levu ko koya, na gata makawa, na Tevoro ko Setani, ka vesuki koya me dua na udolu na yabaki. 3A sa biuti koya na agilosi ki na qara ka sogota ka dregata, me kakua kina ni temaki ira tale na veimatanitu me yacova ni sa oti na dua na udolu na yabaki. Ni sa oti koya e na sereki vakalailai tale. 4Ia au sa qai raica e so na i dabedabe vakatui era sa dabe tiko kina e so sa soli vei ira na kaukauwa me ra turaganilewa. Au sa raica tale ga na yalodra na tamata e a tamusuki na uludra ni ra sa vakatusai Jisu kei na vosa ni Kalou. Era a sega ni vakarokorokotaka na manumanu se na kena i vakatakarakara ka sega tale ga ni volai na kena i vakatakilakila e na yadredra se e na ligadra. Era sa bula tale ka veiliutaki vata kei Karisito me dua na udolu na yabaki. 5Era sa sega ni bula tale ko ira na vo ni mate ka yacova ni sa oti e dua na udolu na yabaki. Sa i koya oqo na i matai ni tu cake tale mai na mate. 6Sa kalougata ka sa yalosavasava ko koya sa vakaturi cake e na i matai ni tu cake tale mai na mate. Sa sega ni kaukauwa vei ira vakaoqo na i karua ni mate, ia era sa na bete ga ni Kalou ka bete i Karisito ka ra na lewa vata kei koya me dua na udolu na yabaki. 7Ia ni sa na cava na dua na udolu na yabaki, sa na qai sereki ko Setani mai na valeniveivesu ka tiko kina. 8Sa na qai lako yani ko koya me temaki ira na veimatanitu era sa tiko e na veiyasa i vuravura kece ga, koya ko Koki kei Mekoki, ka vakasoqoni ira vata me ra ia na i valu. Na kedra i wiliwili sa vaka na mata ni nuku ni matasawa. 9Era na roboti vuravura raraba ka vakavolivolita na nodra i tikotiko na yalododonu kei na koro lomani. Ia e na qai lutu mai lomalagi na bukawaqa ka vakarusai ira. 10Sa na qai viritaki na tevoro e dau vakaisini ira ki na loma ni drano ni bukawaqa kei na sulifure e na vanua e rau tiko kina na manumanu kei na parofita lasu, ia e ratou na vakararawataki e na siga kei na bogi ka tawa mudu. 11Au sa qai raica e dua na i dabedabe vulavula levu vakatui kei koya sa dabe tiko kina. E rau sa dro tani mai vua ko lomalagi kei vuravura, ka sa sega na vanua e kune me rau tiko kina. 12Au a raici ira tale ga na mate, ko ira na cecere kei ira na tamata wale, ra tu e na mata ni dabedabe vakatui, ka ra sa tevuki na i vola vivigi. Sa qai tevuki tale ga e dua tale na i vola ka sa i koya na i vola ni bula. A ra sa lewai na mate mai na veika era sa kitaka me vaka sa volai tu e na veivola koya. 13Sa qai soli ira mai na mate ka ra tu kina na wasawasa; ko mate tale ga kei na nodra vuravura na mate e rau sa soli ira mai na mate era sa tu vei rau; ka ra sa lewai na tamata yadua me vaka na nodra i valavala. 14E rau sa qai viritaki ki na drano bukawaqa ko mate kei na nodra vuravura na mate. Sa i koya oqo na i karua ni mate, na drano bukawaqa. 15Ia ko koya yadua sa sega ni volai na yacana e na kedra i vola na bula, sa viritaki ki na drano bukawaqa!

will be added

X\