VAKATAKILA 2

1“Mo vola oqo vua na agilosi ni soqosoqo lewe ni lotu mai Efeso ka kaya: “Oqo na i tukutuku i koya sa taura tu e ligana i matau na kalokalo e vitu, o koya sa lako voli e na kedratou maliwa na i tutu ni cina koula e vitu. 2Au sa kila na veika ko sa cakava, au sa kila na kaukauwa ni nomu cakacaka, kei na nomu dau vosota. Au sa kila tale ga na nomu sega ni vosoti ira na tamata ca. Ia ko sa vakatovolei ira era sa kaya ni ra sa i apositolo, ka ra sega ni apositolo. Ko sa kunei ira ni ra sa lasulasu ga. 3Au kila ni ko sa colata na veika oqo e na yalo vosota ka tu dei tiko e na vukuqu; ko sega tale ga ni datuvu mai. 4Ia na ka ga oqo au cata vei iko: ko sa sega ni lomani au e daidai me vaka e liu. 5Mo vakasamataka mada na i tovo ni nomu loloma e liu kei na nomu sa yawa tani sara mai kina e na gauna oqo; mo veivutuni sara ka kitaka na ka ko a dau kitaka e liu. Kevaka e sega, au na lako yani vei iko ka kauta tani na nomu i tutu ni cina mai na kena i tikotiko, vakavo ga kevaka ko veivutuni. 6Ia na ka vinaka ga ka tu vei iko oqo: ko sa cata na nodra i vakarau na i tokani i Nikola, me vaka ka'u sa cata. 7“O koya sa vakadaligana, me rogoca sara na ka sa tukuna na Yalo Tabu vei ira na veisoqosoqo lewe ni lotu! “Vei koya sa qaqa au na solia vua me kania na vua ni kau ni bula sa tu e na loma ni Parataisi ni Kalou. 8“Mo vola tale ga oqo vua na agilosi ni soqo vua na agilosi ni soqosoqo lewe ni lotu mai Simurina ka kaya: “Sa tukuna na veika oqo ko koya sa i matai ka i otioti sara tale ga, o koya ka a mate ka qai bula tale. 9Au sa kila na nomu vakararawataki kei na nomu dravudravua, ia ko sa vutuniyau ga vakayalo. Au sa kila na nodra vosa vakacataki iko ko ira era kaya ni ra Jiu, ia ka ra sega ni Jiu, era sa i vavakoso i Setani. 10Kakua ni rerevaka na veika ko na vakarau sota kaya. Raica, sa vakarau me na biuti ira e so vei kemuni ki na vale ni veivesu na Tevoro, mo ni vakatovolei kina. Ko ni na vakararawataki me tini na siga. Mo ni yalo dina tiko ka yacova sara na mate, ka'u na qai solia vei kemuni na i sala ni bula. 11“O koya sa vakadaligana, me rogoca sara na ka sa tukuna na Yalo Tabu vei ira na veisoqosoqo lewe ni lotu! “O koya e na qaqa e na sega ni vakacacani koya na i karua ni mate. 12“Mo vola tale ga oqo vua na agilosi ni soqosoqo lewe ni lotu mai Perikamo ka kaya: “Sa tukuna na veika oqo ko koya sa tu vua na i seleiwau gata batirua. 13Au sa kila na vanua ko tiko kina. Sa tiko tale ga e keri na i tikotiko cecere i Setani. Ia ko sa yalodina tiko vei au ka sega ni cakitaka na nomu vakabauti au e na gauna sara mada ga e a vakamatei kina ko Anitipasa na noqu i vakadinadina yalo dina e na kemuni maliwa, e na vanua e vaka i tikotiko kina ko Setani. 14Ia e tiko e vica na nomu cala. E tiko vei kemuni e keri e so era muria tiko na i vakavuvuli i Pelami, ko koya ka a vakavulici Pelaki me vakacalai ira na luve i Isireli, me ra kania na kakana e sa vakacabori oti ki vei ira na matakau ceuceu, ka ia tale ga na veidauci. 15Sa tiko tale ga kei kemuni e so era muria tiko na i vakavuvuli i Nikola. 16Mo veivutuni sara. Ke sega, au na lako yani e na dua na gauna wale ga oqo ka valuti ira e na i seleiwau sa basika mai gusuqu. 17“O koya sa vakadaligana, me rogoca sara na ka sa tukuna na Yalo Tabu vei ira na veisoqosoqo lewe ni lotu! Ka'u na solia tale ga vua e dua na vatu vula sa volai kina e dua na yaca vou sa sega ni dua e kila, ko koya duadua ga sa soli vua. 18“Mo vola tale ga oqo vua na agilosi ni soqosoqo lewe ni lotu mai Caetira ka kaya: “Sa tukuna na veika oqo na Luve ni Kalou, o koya sa vaka na yameyame ni buka na yaloka ni matana ka sa vaka na parasa sa vakaririgi e na kena kuro na yavana. 19Au sa kila na nomu cakacaka, na nomu loloma na nomu yalodina, na nomu veiqaravi, na nomu yalo vosota kei na kena uasivi cake na nomu cakacaka e na gauna oqo mai na kena e liu. 20Ia sa i koya oqo na ka au cata vei iko: oya ni ko vosota tiko na yalewa ko Jesepeli, o koya ka vakatokai koya me parofita, ka sa vakatavulici ira ka lawakitaki ira tiko na noqu tamata me ra ia na veidauci, ka kania na kakana e sa vakacabori oti ki vei ira na matakau. 21Au a sa solia vua na gauna me veivutuni kina, ia sa bese ni veivutunitaka na nona i tovo vakasisila. 22Raica, au na kolotaki koya kei ira era daubutako kaya ki na dua na i davodavo ni tauvimate, ka ra na vakararawataki vakalevu sara kina, vakavo ga kevaka era veivutunitaka na veika vakasisila era a kitaka vata kei koya. 23Au na vakamatei ira tale ga na luvena. Era na kila kina na veisoqosoqo lewe ni lotu kece ga ni sa i au ka'u sa dau dikeva na vakasama kei na loma ni tamata ka'u na sauma vei ira yadudua na i sau e veiganiti kei na nodra cakacaka. 24“Ia vei kemuni na kena vo mai Caetira, ko ni sega ni vakabauta na i vakavuvuli ca koya, ko ni sega ni kila na ka era vakatoka e so me ʻveika vuni titobu i Setani.ʼ Au sa kaya vei kemuni oqo ni'u na sega ni vakataqara vei kemuni e dua tale na i colacola; 25ia mo ni taura dei ga na ka sa tu vei kemuni me yacova na noqu lako yani. 26O koya sa qaqa ka taura dei tiko na noqu cakacaka me yacova na i vakataotioti, au na solia vua na kaukauwa me lewa na veimatanitu, 27me vaka na kaukauwa sa solia mai vei au ko Tamaqu. E na lewai ira ko koya e na i titoko kaukamea ka na vorolaki ira me vaka sa vakavurumemeataki na kuro qele, 28ka'u na solia tale ga vua na kalokalo i volasiga. 29“O koya sa vakadaligana, me rogoca sara na ka sa tukuna na Yalo Tabu vei ira na veisoqosoqo lewe ni lotu!

will be added

X\