VAKATAKILA 19

1Ia ni sa oti koya au sa qai rogoea na ka e vaka na vakere ni domodra e dua na i vavakoso levu mai lomalagi, ka ra sa kaya: “AIeluya! Sa nona na noda Kalou na veivakabulai, na lagilagi kei na kaukauwa; 2ni sa dina ka dodonu na nona lewa. Sa tauca na nona lewa ko koya vua na yalewa dautagane o koya ka a vakadukadukalitaki vuravura e na nona dautagane, ka sa sauma vua na nodra dra na nona tamata.” 3Era sa qai kaya tale, “Aleluya! Sa kuvu cake tiko ga na kubou ni koro levu koya ka sega ni mudu!” 4A ra sa qai cuva sobu na qase e le ruasagavulukava kei ira na ka bula e va ka ra vakarokorokotaka na Kalou sa tiko e na i tikotiko vakaturaga ka ra kaya: “Emeni! Aleluya!” 5Sa qai rogo mai na i tikotiko vakaturaga e dua na domo ka kaya: “Ni vakacaucautaka na noda Kalou ko i kemuni kece na nona bobula, ko i kemuni na tamata kece ga ko ni sa dokai koya se ko ni cecere se lolovira” 6Au sa qai rogoca na ka e vaka na domodra e dua na i vavakoso levu, me vaka na vakere ni dua na savu levu ka vaka na domo ni kurukuru levu ni sa kaya: “Aleluya! Ni sa veiliutaki tiko vakatui na Turaga na noda Kalou Kaukauwa Sara! 7Me da sa mai reki ka marau ka vakalagilagi koya e na nona cecere ni sa qai yaco mai na gauna me vakamau kina na Lami, ka sa vakarautaki koya tu na watina. 8E a sa vakadonui vua me vakaisulu e na lineni matailalai sa sekavula ka savasava.” Ia na lineni matailalai na nodra i valavala dodonu na tamata yalosavasava ni Kalou. 9Sa qai kaya vei au na agilosi: “Vola na ka oqo: Sa kalougata ko ira era sa sureti ki na kana ni vakamau ni Lami.” Sa kaya tale vei au: “Oqo kece na vosa dina ni Kalou” 10Au sa qai cuva sobu e yavana me'u vakarokoroko vua, ia sa qai kaya vei au ko koya: “Kakua sara ni kitaka oqori! Ko i au na nomu i tokani bobula ka nodra tale ga na wekamu, ko ira kece era sa taura dei tiko na dina sa vakatakila ko Jisu. Vakarokorokotaka ga na Kalou!” Na dina ga a mai vakatakila ko Jisu, era a vakauqeti kina na parofita. 11Au sa qai raica ni sa tadola na lomalagi ka sa rairai e dua na ose vula. Sa vakatokai ko koya sa vodoka tiko me ko Yalodina ka Dodonu ka sa vakataulewa ka ia na i valu e na dodonu. 12Sa vaka na yameyame ni buka na yaloka ni matana, ka sa vakaisala na uluna e na vuqa na i sala vakatui. Sa volai tu vua e dua na yaca, ka sa sega ni dua tale e kila, ko koya duadua ga. 13Sa vakaisulu tu ko koya e na dua na i sulu sa somoti e na dra. Ia na yaca sa vakatokai vua koya, “Na Vosa ni Kalou” 14Era sa muri koya ka vodo ose vula na mataivalu kei lomalagi; era sa vakaisulu e na lineni matailalai sa vulavula ka savasava. 15Sa basika mai na gusuna e dua na i seleiwau gata me ravuta kina na veivanua. E na lewai ira ko koya e na i titoko kaukamea, ka na butulaka ko koya na i qaqi ni waini ni cudru waqawaqa ni Kalou Kaukauwa. 16Ia sa volai tu e na nona i sulu kei na sagana na yaca oqo, “A nodra Tui na tui, ka nodra Turaga na turaga” 17Au sa qai raica e dua na agilosi, sa tu cake tu mai na matanisiga ka sa kaci vei ira na manumanu vuka ni macawa e na domo levu ka kaya: “Ni lako mai! Ni soqoni mai ki na i vakayakavi levu ni Kalou, 18mo ni kania na lewedra na tui, na turaganivalu, na qaqa, na ose kei ira era vodoka, na lewedra na tamata kece ga, na bobula kei na galala, na lolovira kei na cecere!” 19Ka'u a qai raica na manumanu ni sa soqoni ira na veimatanitu e vuravura kei na nodra dui mataivalu me ra valuti koya sa vodo tiko e na ose kei na nona i mataivalu. 20A sa vesu na manumanu vata kei na parofita lasu o koya e a dau cakava na veika mana e mata ni manumanu, na veika e a lawakitaki ira kina ko ira sa tu vei ira na i vakatakilakila ni manumanu kei ira era qarava na kena i vakatakarakara. Ko i rau oqo e rau sa viritaki bulabula ki na drano bukawaqa sa kama tu kina na sulifure. 21Ia ko ira na kena vo era sa vakamatei e na i seleiwau, sa basika mai na gusu i koya sa vodo tiko e na ose. A ra sa kania na lewedra ko ira na manumanu vuka kece ga.

will be added

X\