VAKATAKILA 18

1Ni sa oti na veika oqo, au sa raica e dua tale na agilosi ni lako sobu mai lomalagi, sa ka levu na nona kaukauwa, ka sa rarama ko vuravura e na nona i serau. 2A sa kaci e na domo levu sara ko koya ka kaya: “Sa bale! Sa bale ko Papiloni Levu! Sa yaco me nodra i tikotiko na tevoro, ka nodra qara tale ga na manumanu vuka, duka vakasisila. 3Ni ra sa gunuva na waini ni nona veidauci ko ira kece na veimatanitu, ka ra sa cala vata kei koya ko ira na tui kei vuravura, ka ra sa tubu me ra vutuniyau ko ira na dauveivoli kei vuravura e na i yau ni nona garogaro ca” 4Au sa qai rogoca e dua tale na domo mai lomalagi, sa kaya: “Ni lako tani mai vua, kemuni na noqu tamata! De ko ni na qai vakayacora tale ga na nona i valavala ca, ka ko ni na qai vaka i votavota e na veika rarawa e na yaco vua. 5Ni sa veibinibini na nona i valavala ca me yaco ki lomalagi, ka sa nanuma na Kalou na nona caka cala kece ga. 6Kitaka vua me vaka e a kitaka vei kemuni ko koya, ka sauma vua me vakaruataki na veika ca e a kitaka. Vakasinaita na mena bilo e na gunu sa vakaruataki na kena kaukauwa me vaka na kena e vakarautaka vei kemuni ko koya. 7Me vaka na nona vakalagilagi koya kei na nona tiko vinaka, ni solia vua na i votavota ni yaluma kei na rarawa e veirauti kaya. Ni sa kaya e lomana ko koya, ʻSa i au oqo na ranadi. Au sega ni yada ko i au, Ka'u na sega ni kila na rarawa!ʼ 8O koya oqo e na yaco kece kina vua e na dua ga na siga na nona i votavota ni veika rarawa, na tauvi mate, kei na rarawa kei na dausiga. Ka na vakamai ko koya e na bukawaqa; ni sa kaukauwa na Turaga na Kalou sa cudruvi koya.” 9Ia ko ira na tui kei vuravura era a cala ka dau veibutakoci kaya era na tagieaka ka yasovaka ni ra sa raiea na kubou ni kena kama. 10Era na tu vakayawa ni ra sa rerevaka na nona vakararawataki ka kaya, “Isa! Isa! Papiloni! O iko na koro levu! O iko na koro kaukauwa! E na dua bauga na aua sa yaco kina na nomu cudruvi!” 11O ira tale ga na dauveivoli kei vuravura era sa tagi ka yasovaki koya, ni sa sega tale ni dua me qai volia na nodra i voli. 12Sa sega tale e volia na nodra koula, na siliva, na veivatu talei, na mataniciva, na lineni matailalai, na i sulu lokaloka, na silika, na i sulu damudamu, na veimataqali kau boi vinaka, na veimataqali yaya e caka mai na vatu tabua, na veimataqali i yaya kau sau dredre, kei na parasa, na kaukamea kei na vatu mapolo; 13na sinamoni, na macou, na i saluwaki mamaca, na mura, na drega boi vinaka, na waini, na waiwai na falawa matailalai kei na witi, na bulumakau kei na sipi, na ose kei na qiqi, kei na tamata bobula, kei na yalo ni tamata. 14Era sa kaya vua na dauveivoli: “Sa takali mai vei iko na vuata ka a garova na yalomu, ka ra sa yali mai vei iko na nomu i yau kece kei na kemu totoka, ia ko na sega ni kunei ira tale!” 15Ko ira na dauveivoli era a vakavutuniyautaki e na nodra veivoli e na koro koya era na tu vakayawa e na nodra rerevaka na nona yaluma ka ra na tagi ka qolouvaka: 16ʻTsa! Isa! Na koro levu ka a vakaisulu e na lineni matailalai, na i sulu lokaloka kei na i sulu damudamu rarama ka vakaiukuuku e na koula kei na veivatu talei kei na mataniciva! 17E na dua ga na aua sa takali kece kina na veika oqo!” O ira kece na kavetani ni waqa kei na pasidia, na dausoko kei ira kece ga na kai wai era na tu vakayawa 18ka ra na qolouvaka ni ra sa raica na kubou ni kena kama: “A koro cava beka e na tautauvata kaya na koro levu oqo?” 19Era na qai biuta na kuvu ni qele ki uludra ni ra sa tagi ka qolouvaka tiko: “Isa! Isa! Na koro levu era vakavutuniyautaki kina ko ira kece sa tu na nodra waqa e wai! E na dua ga na aua sa vakarusai kina ko koya. 20“Mo reki e na vuku ni nona rusa ko iko lomalagi! Mo ni reki tale ga na tamata ni Kalou kei kemuni na i apositolo kei kemuni na parofita! Ni sa qai totogitaki koya na Kalou e na vuku ni veika e a kitaka vei kemuni!” 21Sa qai taura cake e dua na agilosi kaukauwa e dua na vatu sa vaka na vatu i qaqi levu ka viritaka ki loma ni wasawasa, ka kaya: “E na viritaki sobu vakaukauwa vaka kina ko Papiloni na koro levu, ka na sega sara ni kune tale. 22Na domodra na dau ni api kei na dauvakatagi, na dau uvu vakatagi bitu kei na biukila sa na sega ni rogo tale mai vei iko. E na sega tale ni kune vei iko e dua na matai se daubuli ka. Sa na sega tale ga ni rogo na domo ni qaqi vatu. 23Sa na sega ni kune tale vei iko na rarama ni cina, ka sa na sega ni rogo tale na domo ni tagane se yalewa vou. Ni sa i ira na nomu dauveivoli era tamata kaukauwa sara e vuravura, ka ra sa vakacalai na veivanua kece ga e na nomu i lawaki.” 24A sa kune e loma i Papiloni na nodra dra na parofita kei ira na tamata yalosavasava, kei ira kece ga era sa vakamatei e vuravura.

will be added

X\