VAKATAKILA 16

1Ia au sa rogoca e dua na domo levu mai na vale ni soro ni a kaya vei iratou na agilosi e vitu: “Dou lako ka sovaraka ki vuravura na sedre ni cudru ni Kalou e vitu!” 2Sa mani lako na i matai ni agilosi ka sovaraka na nona sedre ki vuravura, ka sa tauvi ira ga na tamata sa tu vei ira na i vakatakilakila ni manumanu ka ra dau qarava tale ga na kena i vakatakarakara na vidikoso ca ka rarawa sara. 3Sa qai sovaraka na nona sedre ki na wasawasa na i karua ni agilosi, ka sa vuki na wai me vaka na dra ni tamata mate, ka sa mate na veika bula kece ga sa tu e wasawasa. 4Sa qai sovaraka na nona sedre ki na veiuciwai kei na vei mataniwai na i katolu ni agilosi ka sa vuki na wai me dra. 5Ia ka'u sa qai rogoca ni kaya na agilosi sa lewa na wai: “Ko ni sa dodonu e na nomuni lewa oqo, o i kemuni na Yalo Dodonu, kemuni ko ni sa bula e daidai ko ni bula tale ga e liu! 6Era a vakadavea na nodra dra na yalosavasava kei ira na parofita ko ira oqo ka ko ni sa solia vei ira na dra me ra gunuva. Sa rauta vinaka me ra sota kaya na ka oqo.” 7Au sa qai rogoca e dua na domo mai na i cabocabo ni soro, ni kaya, “Io, kemuni na Turaga, na Kalou Kaukauwa sara, sa dina ka dodonu na nomuni lewa!” 8Sa qai sovaraka na nona sedre ki na matanisiga na i ka va ni agilosi, ka sa soli vua me vakamai ira na tamata e na kena katakata kaukauwa sara. 9Era sa kama vakaca sara na tamata e na katakata vakadomobula, ka ra sa vosa vakacacataka na yaca ni Kalou o koya sa lewa na veika rarawa oqo; ia era sa sega ni veivutuni se vakalagilagi koya. 10Sa qai sovaraka na nona sedre na i kalima ni agilosi ki na i tikotiko vakaturaga ni manumanu, ka sa yaco me butobuto na matanitu ni manumanu. Era sa kati yamedra na tamata e na vutugu; 11ia era sa vosa vakacacataka na Kalou ni lomalagi e na vuku ni nodra rarawa kei na nodra vidikoso ka ra sa sega ni veivutunitaka na nodra i vakarau. 12Sa qai sovaraka na nona sedre ki na uciwai levu na Euferetisi na i kaono ni agilosi, ka sa maca na kena wai, me caramaka kina na sala vei ira na tui mai na tokalau. 13Ka'u sa qai raica e tolu na yalo velavela e ratou vaka na i rairai ni boto ka ratou sa lako mai na gusu ni gata vakaitamera, na gusu ni manumanu kei na gusu ni parofita lasu. 14Sa i iratou oqo na yalo ni tevoro e ratou sa dau caka mana; e ratou sa veilakoyaki vei ira na tui ni veivanua e vuravura taueoko, me vakasoqoni ira vata ki na i valu e na siga bibi koya, na siga ni Kalou Kaukauwa. 15“Raica, au sa lako yani me vaka na daubutako! Sa kalougata ko koya sa yadra tiko, ka maroroya tiko na nona i sulu, me kakua kina ni veikaloyaki luvawale voli ka vakamaduataki e na matana levu” 16A ratou sa vakasoqoni ira vata mai na tui ki na vanua sa vakatokai vaka-Iperiu ko Amaketoni. 17Sa qai sovaraka na nona sedre ki na maliwa lala na i kavitu ni agilosi, ka sa rogo mai na i tikotiko vakaturaga mai na vale ni soro e dua na domo levu, ka kaya, “Sa vakayacori oti!” 18A sa rorogo na domo kei na kurukuru, ka tibi na livaliva, ka sa yaco e dua na uneune levu. E sega ni sa bau dua na uneune me vakaoqo na kena ca me vakatekivu mai na gauna e tawana kina na vuravura na tamata! 19A sa kavida i tolu na koro levu ka ra sa vakarusai na veikoro lelevu e na veimatanitu. Ia sa qai nanuma na koro levu ko Papiloni na Kalou ka sa totogitaka me gunuva taucoko na lewe ni bilo ni nona cudru waqawaqa. 20A ra sa takali tani na veiyanuyanu kece ga ka ra sa sega ni kune e dua na ulunivanua. 21Sa qai lutu mai lomalagi ki vei ira na tamata na uca cevata lelevu sa yacoyacova na 50 na kilokaramu na bibi ni mata ni uca yadudua. A ra sa vosa vakacacataka na Kalou na tamata e na vuku ni ka rarawa oqo, na uca cevata, ni sa vakadomobula dina.

will be added

X\