VAKATAKILA 15

1Au sa qai raica tale e dua na vakatakilakila levu ka veivakurabuitaki mai lomalagi: e vitu na agilosi kei na vitu na rarawa. Sa i ira oqo na i otioti ni verka rarawa, ka ni ra sa i cavacava ni vakaraitaki ni cudru ni Kalou. 2Au sa qai raica na ka e vaka na i rairai ni dua na wasawasa iloilo sa veiwaki kei na bukawaqa; ka'u raici ira tale ga era sa qaqa vua na manumanu, kei na kena i vakatakarakara kei koya sa vaka i wiliwili na yacana. Era sa duri tu e na yasa ni wasawasa iloilo ka ra dui taura tu na api ni Kalou e ligadra. 3Era sa lagata na sere i Mosese, na tamata ni Kalou, kei na sere ni Lami ka ra kaya: “O i kemuni na Turaga, na Kalou Kaukauwa Sara! Sa cecere ka veivakurabuitaki na nomuni cakacaka. O i kemuni na Tui ni veitaba gauna kece ga! Sa dodonu ka dina na nomuni i vakarau. 4Turaga! O cei li me na sega ni rerevaki kemuni, ka sega ni vakalagilagia na yacamuni? Ni sa i kemuni duadua ga ko ni sa yalosavasava. Era na lako kece mai na veimatanitu me ra cuva e matamuni; ni sa vakatakilai mai na nomuni cakacaka dodonu.” 5Ni sa oti koya au sa qai rai yani ka raica, sa dola tu na vale ni soro mai lomalagi ka tiko kina na vale laca tabu ni veiyalayalati. 6E ratou sa qai curu mai ki tautuba ni vale ni soro ko iratou na agilosi e lewe vitu ka sa tiko vei iratou na i otioti ni veika rarawa e vitu. E ratou sa vakaisulu e na i sulu lineni vulavula savasava, ka sa vakaioro na lomaseredratou e na i oro koula. 7Sa qai solia e dua vei iratou na ka bula e va vei iratou na le vitu na agilosi, e vitu na sedre koula sa sinai tu e na cudru ni Kalou, o koya sa bula ka tawa mudu. 8A sa sinai na vale ni soro e na kubou sa lako mai na lagilagi kei na kaukauwa ni Kalou. A sa sega ni rawa me curu e dua ki na vale ni soro me yacova ni sa vakayacori oti na veika rarawa e vitu mai vei iratou na agilosi e vitu.

will be added

X\