VAKATAKILA 14

1Au sa qai raica, e dua na Lami sa tu cake tu e na ulunivanua ko Saioni, ka ra sa tu vata kaya e lewe 144,000 na tamata sa volai e na yadredra na yacana kei na yaca i Tamana. 2Au sa qai rogoca e dua na domo mai lomalagi e vaka na vakere ni savu ka vaka na domo ni kurukuru levu. E vaka na rorogo ni vakatagi era cakava na dau ni api ni ra qiria na nodra api. 3A ra sa lagata e dua na sere vou e na mata ni tikotiko vakaturaga kei na matadra na ka bula e va kei na matadra na qase. E sega ni dua e rawa ni vulica na sere koya, ko ira ga na lewe 144,000 era sa voli oti mai vuravura. 4Sa i ira oqo era sa sega ni vakadukadukalitaki ira e na yalewa, ni ra sa sega ni veiyacovi kaya e dua. Sa i ira oqo era sa dau muria na Lami e na veivanua kece ga e lakova. Sa i ira oqo era sa voli mai vei ira na tamata me ra i sevu vua na Kalou kei na Lami. 5Sa sega ni kune na lasu e na gusudra ka sa sega sara na nodra cala. 6Au sa qai raica e dua tale na agilosi, ni sa vuka tu e macawa, ka sa tu vua e dua na i Tukutuku Vinaka tawa mudu, me kacivaka vei ira era tiko e vuravura, ki vei ira kece ga na veimatanitu kei na veiyavusa, kei na veimataqali vosa kei na veimataqali tamata. 7Sa qai kaya e na domo levu ko koya, “Mo ni rerevaka na Kalou ka vakalagilagia, ni sa yaco mai na gauna ni nona veilewai. Mo ni cuva vei koya ka a buli lomalagi kei vuravura, na wasawasa kei na veivurevure ni wai!” 8Sa qai muria na i karua ni agilosi, ka kaya, “Sa bale! Sa bale ko Papiloni levu! O koya ka a vagunuvi ira kece ga na veimatanitu e na waini ni nona veigagadre dukadukali” 9Sa qai muri rau mai na i katolu ni agilosi ka sa kaya e na domo levu, “Kevaka e dua na tamata e qarava na manumanu kei na kena i vakatakarakara ka sa soli vua na i vakatakilakila e yadrena se ligana, 10sa gunuva tale ga ko koya na waini ni eudru ni Kalou, sa sova e na kena kaukauwa taucoko ka sega ni vakawai ki na bilo ni nona cudru! E na vakararawataki na tamata koya e na bukawaqa kei na sulifure e na matadra na agilosi yalosavasava kei na mata ni Lami. 11Sa kuvu cake na kubou ni buka era sa vakararawataki kina ka sega ni mudu. Era sa sega ni vakacegu rawa e na siga kei na bogi, ko ira era qarava na manumanu kei na kena i vakatakarakara, kei ira keee ga sa tiko vei ira na i vakatakilakila ni yacana.” 12Sa yaga kina me ra vosota tiko na tamata ni Kalou, ko ira era sa muria tiko na veivakaro ni Kalou ka ra sa yalodina tiko vei Jisu. 13Oti koya au sa qai rogoca e dua na domo mai lomalagi ni kaya, “Vola mada oqo: era sa kalougata ko ira era sa mate ni ra sa tu vata kei na Turaga, e na gauna oqo ka lako yani!” “Era sa kalougata dina!” sa kaya na Yalo Tabu. “Era sa vakacegu kina mai na nodra cakacaka, ka sa muri ira na nodra i valavala!” 14Au sa qai rai yani ka raica, e dua na o vulavula, ka dabe toka e delana e dua e vaka na i rairai ni tamata, e vakaisala tu e na i sala koula vakatui ka taura tu e dua na i sele ni tatamusuki gata sara. 15Sa qai curu mai ki tuba mai na vale ni Kalou e dua tale na agilosi ka kacivaka vei koya ka dabe toka e na dela ni o, “Vakayagataka na nomu i sele ni tatamusuki ka ia na tatamusuki, ka ni sa yaco mai na gauna ka sa matua vinaka tu na vuata kei vuravura!” 16Sa qai walilicaka na nona i sele ni tatamusuki ko koya ka dabe toka e na o ka tamusuka na vuata kei vuravura. 17Sa qai curu mai ki na tautuba ni vale ni Kalou sa tu mai lomalagi e dua tale na agilosi, ka sa taura tale tu ga ko koya e dua na i sele ni tatamusuki gata. 18Sa qai lako mai na i cabocabo ni soro e dua tale na agilosi, na agilosi sa lewa na bukawaqa; ka sa kaci vakadomoilevu vua na agilosi ka taura tiko na i sele ni tatamusuki ka kaya, “Vakayagataka na nomu i sele ka cebeta na veisoso ni vaini kei vuravura, ka ni ra sa dreu vinaka tu!” 19Sa qai walilicaka na nona i sele ni tatamusuki na agilosi ka cebeta na veisoso ni vaini kei vuravura, ka viritaki ira ki na davuke levu ni waini ni cudru ni Kalou. 20A sa butubuturaki na vua ni vaini e na davuke ni waini, e na i bili ni koro, ka sa dave na dra mai na davuke ni waini me tolu na drau na kilomita na kena balavu ka rua na mita na kena titobu.

will be added

X\