VAKATAKILA 13

1Au sa qai raica e na noqu raivotu e dua na manumanu, sa cabe cake mai wasawasa. Sa tini na kena i leu, ka vitu na uluna. Sa toka e yadua na i sala vakatui e na kena i leu, ka sa volai tu e na uluna kece e yadua na yaca sa vosa vakacacataki kina na Kalou. 2Na manumanu ka'u sa raica sa vaka na lepate, ia na yavana era vaka na yava ni pea, ka sa vaka na gusu ni laione na gusuna. A sa solia vua na gata na nona kaukauwa, na nona i dabedabe vakatui kei na nona kaukauwa vakatui. 3E dua vei ira na uluna e vaka e a sa vakamatei oti ia sa mavo tale na vanua e a mavoa. Era sa kurabui kece ga ko ira na lewe i vuravura ka ra sa vakamuria na manumanu. 4Era sa doka na gata na tamata ni sa solia na nona kaukauwa vua na manumanu. Era sa qai vakarokorokotaka na manumanu ka kaya, “O cei sa tautauvata kei na manumanu? O cei sa rawa ni rau vala kaya?” 5Sa qai soli vua na manumanu me vosa vakacacataka na Turaga ka sa soli tale ga vua me veiliutaki me vuIa vasagavuIukarua. 6Sa qai dalaga ka vosa vakacacataka na Kalou, ka vosataka na yacana kei na nona i tikotiko kei ira kece era tiko mai lomalagi. 7Sa vakatarai vua me valuti ira na tamata yalosavasava ka rawai ira. Sa soli tale ga vua me lewai ira na veiyavusa, kei na veimataqali tamata, na veimataqali vosa kei na veimatanitu. 8Ia era na qaravi koya ko ira kece era sa tiko e vuravura, ko ira kece e sega ni volai na yacadra ni sa bera ni tauyavu na vuravura e na i vola ni bula ni Lami ka a vakamatei. 9“Kevaka e dua e vakadaligana me rogo kina me rogoca sara na ka oqo! 10O koya sa nakiti me vesu e na vesu ga; o koya sa nakiti me na vakamatei e na i seleiwau, e na mate dina ga e na i seleiwau. E na ka oqo sa vinakati kina na nodra vosota kei na nodra yalodina na tamata yalosavasava” 11Oti koya au sa qai raica e dua tale na manumanu, sa lako cake mai na qele ka sa rua na kena i leu me vaka e dua na lami; ka sa vaka na domo ni gata na rorogo ni nona vosa. 12Sa vakayagataka na i karua ni manumanu na kaukauwa kece ni matai ni manumanu ni sa rai tu ko koya ka sa vakasaurarataki vuravura taucoko me cuva ki na i matai ni manumanu, na kena ka e sa mavo tale na nona mavoa. 13Sa cakava na cakacaka mana lelevu na i karua ni manumanu ka bau yacova sara me lutu mai lomalagi ki vuravura na bukawaqa ni ra rai tu na tamata. 14Ia sa lawakitaki ira era tiko e vuravura ko koya e na vuku ni veicakacaka mana sa soli me kitaka e na mata ni matai ni manumanu, ka kaya vei ira me ra bulia e dua na i vakatakarakara ni manumanu ka a vakamavoataki e na i seleiwau, ka sa bula tiko ga. 15A sa soli vua na i karua ni manumanu me solia na bula ki na i vakatakarakara ni matai ni manumanu, me vosa rawa tale ga na i vakatakarakara ni manumanu, ka me vakamatei ira era sega ni via vakarokorokotaki koya. 16A sa vakasaurarataki ira kece tale ga na tamata na manumanu; koya ko ira na tamata wale kei ira na ceeere, ko ira na vutuniyau kei ira na dravudravua, ko ira na galala kei ira na bobula, me ra vakatakilakilataki e na ligadra i matau kei na yadredra. 17E na sega ni rawa ni volivoli se volitaki ka e dua na tamata vakavo ga ke sa tiko vua na i vakatakilakila koya na yaca ni manumanu se na i wiliwili ni yacana. 18Sa ganita oqo na vuku. O koya sa yalomatua sa rawa ni wilika na i wiliwili ni manumanu; ni sa i wiliwili ni dua na tamata. Ia na kena i wiliwili e 666 .

will be added

X\