VAKATAKILA 12

1Sa qai rairai mai lomalagi e dua na ka veivakurabuitaki levu, koya e dua na yalewa e vakaisulu tu e na matanisiga, ka tu na vula e ruku ni yavana ka sa vakaisala e na tinikarua na kalokalo. 2Sa bukete tiko ko koya ka sa qoqolou ni sa taratara me vakasucu. 3A sa dua tale na ka veivakurabuitaki sa rairai mai lomalagi koya e dua na gata damu vakaitamera; e vitu na uluna ka tini na kena i leu; sa tokara e uluna e vitu na i sala vakatui. 4Sa yarataka e dua na i katolu ni kalokalo ni lomalagi e na buina, ka kolotaki ira sobu ki vuravura. Sa qai tu vakadua na gata e na mata ni yalewa ni sa vakarau me vakasucu, ka me kania sara na luvena ni sa qai sucu mai. 5A sa vakasucuma na yalewa e dua na gone tagane, o koya e na liutaki ira kece na veimatanitu e na i titoko kaukamea. Ia e a kau vakasauri na luvena ki vua na Kalou, ki na nona i tikotiko vakaturaga. 6Sa qai dro na yalewa ki veikau, ki na tikina sa vakarautaka tu na Kalou me na vakani tiko kina me 1,260 na siga. 7Sa qai kacabote na i valu mai lomalagi. Sa veivala ko Maikeli kei ira na nona agilosi vata kei na gata. A sa vala lesu na gata kei ira na nona agilosi. 8Ia era a vakamalumalumutaki ka sa sega tale na vanua me ra tiko kina mai lomalagi. 9Sa qai viritaki sobu na gata vakaitamera oqo. Sa i koya na gata makawa, sa vakatokai na Tevoro se ko Setani, o koya sa dau vakaisina na vuravura taucoko. A sa viritaki sobu mai ki vuravura ko koya kei ira kece na nona agilosi. 10Ia au sa qai rogoca e dua na domo levu mai lomalagi, sa kaya, “Sa qai yaco mai oqo na veivakabulai kei na kaukauwa, kei na matanitu ni noda Kalou, kei na kaukauwa ni nona Karisito, ka ni sa viritaki sobu ko koya sa dau beitaki ira na wekada, e na veisiga kei na veibogi e na mata ni Kalou. 11Era sa qaqa vua na wekada e na vuku ni dra ni Lami kei na nodra vakadinadina, ka ni ra a sega ni bureitaka na nodra bula, ia era a solia ga e na vukuna. 12Mo reki gona kina ko iko lomalagi kei kemuni ka vakaitikotiko kina! Ia drau sa kalouea ko i kemudrau vuravura kei wasawasa; ni sa lako sobu yani vei kemudrau na Tevoro e na eudru levu, ni sa kila ni sa lekaleka sara na nona gauna!” 13Ia ni sa kila na gata ni sa kolotaki sobu ki vuravura, sa qai vakacemuria na yalewa ka a vakasucuma na gone tagane. 14Ia sa qai soli e rua na taba ni ikeli levu vua na yalewa me vuka Iaivi kina mai vua na gata ki na loma ni veikau, ki na vanua me na la'ki maroroi tiko kina me rauta e tolu veimama na yabaki me kua ni tarai koya rawa na gata. 15A sa qai luaraka na wai mai na gusuna na gata me dave muria na yalewa me vakacirima tani e na ualuvu. 16Ia sa qai vukea na yalewa na vuravura, ni sa dalaga ka tiloma na wai sa luaraka mai na gata. 17A sa cudruva na yalewa na gata, ka la'ki veivala kei ira na kena vo ni nona kawa era muria tiko na veivakaro ni Turaga ka taura tikoga na veika dina e vakatakila ko Jisu. 18A sa tu na gata e na vanua veinukunuku ni matasawa.

will be added

X\