VAKATAKILA 11

1Sa qai soli vei au e dua na gasau ni vakarau vaka na i titoko, ka tukuni vei au, “Tu cake ka vakarautaka na vale ni Kalou kei na i cabocabo ni soro kei ira era sa lotu tiko kina. 2Ia kakua ni vakarautaka na lomanibai e na taudaku ni vale; kakua ni vakarautaka koya, ka ni sa soli oti koya ki vei ira na veimatanitu. Ia era na buturaka na Koro Tabu ka vula vasagavulu ka rua. 3Ka'u na solia na kaukauwa vei rau na noqu i vakadinadina e rua me rau vunau me dua na udolu rua na drau ka onosagavulu na siga, ka rau na vakaisulu e na sulu taga” 4Sa i rau oqo na vu ni olive e rua kei na i tutu ni cina e rua e rau sa tu e na mata i koya na Turaga kei vuravura. 5Ia kevaka e dua e vinakata me vakacacani rau, e na lako mai gusudrau na bukawaqa ka vakarusai ira na nodrau meca; e na vakamatei vakaoqo ko koya e na via vakacacani rau. 6Sa tu vei rau na kaukauwa me rau sogoti lomalagi kina, me kakua ni tau na uca e na gauna e rau vunau voli kina. E rau sa lewa tale ga na wai me rau vukica kina me dra, ka me rau yaviti vuravura tale ga e na veimate ea keee ga e na veigauna ga e rau vinakata kina. 7Ia ni sa eava na nodrau vunau e na qai valuti rau na manumanu ka a cabe cake mai na loma ni qara sega ni katumi rawa, ka na rawai rau, ka vakamatei rau. 8Ia e na biu wale tu ga na yagodrau e na saqata ni koro levu ka vakatokai vakaibalebale ko Sotoma se ko Ijipita, na koro e a lauvako kina ki na kauveilatai na nodrau Turaga. 9Era na la'ki vakaraica tu na yagodrau me tolu veimama na siga ko ira mai na veimataqali tamata, na veiyavusa, na duivosavosa kei na veimatanitu, ka ra na sega ni laiva me buluti na yagodrau e na i bulubulu. 10Ia ko ira era tiko e vuravura era na rekitaka na nodrau mate ka ra na mamarau ka veisoli ka ni loloma; ka ni rau a dau vakararawataki ira ka tiko e vuravura ko i rau na parofita oqo. 11Ia ni sa oti e tolu veimama na siga sa qai ceguvi rau na Kalou e na i cegu ni bula; ka rau sa qai tu cake; ka sa ka levu na rere sa curumi ira era raici rau. 12E rau sa qai rogoca e dua na domo levu mai lomalagi sa kaya vei rau, “Drau lako mai ki ke!” A rau sa qai lako cake ki lomalagi e na o ni ra sa rai tu na nodrau meca. 13E na gauna sara ga koya sa qai yaco kina e dua na uneune levu, ka sa bale e dua na i katini ni koro, ka ra sa mate kina e lewe vitu na udolu na tamata. Ia ko ira na kena vo era sa rere ka ra sa vakarokoroko vua na Kalou ni lomalagi. 14Sa qai takali yani na i karua ni ka rarawa; ka raica, sa voleka sara mai na kena i katolu. 15Sa qai uvuca na nona davui na i kavitu ni agilosi, ka sa rorogo e so na domo levu mai lomalagi, ka ra kaya, “Sa qai yaco me nona na noda Turaga kei na nona Karisito na matanitu ni vuravura oqo, ka na veiliutaki tiko ko koya ka sega ni mudu!” 16Era sa qai tekiduru na qase e lewe ruasagavulukava ka ra dabe tiko e na nodra i tikotiko vakaturaga e na mata ni Kalou ka ra vakarokoroko vua na Kalou, 17ka kaya: “Keimami vakavinavinaka vei kemuni na Turaga na Kalou Kaukauwa Sara, kemuni ko ni sa bula tiko e na gauna oqo, ko ni sa bula talega e liu, ni ko ni sa qai vakayagataka na nomuni kaukauwa levu ka vakatekivu veiliutaki. 18Era sa cudrucudru na veimatanitu ia, sa yaco mai na nomuni cudru kei na gauna me ra sa veilewaitaki kina na mate. Na gauna me ra saumi kina na nomuni bobula, ko ira na parofita kei ira na yalosavasava, kei ira era rerevaka na yacamuni, se ra tamata wale se ra cecere. Sa kena gauna me ra vakarusai kina ko ira era sa vakarusai vuravura tiko!” 19Sa qai dolavi na vale ni Kalou mai lomalagi, ka sa rairai e na loma ni vale na Kato ni nona veiyavalati; a sa tarava na tibi ni liva, na veirorogo levu so, na vadugu ni kurukuru, na uneune kei na tau bi ni uca cevata.

will be added

X\