VAKATAKILA 10

1Au sa qai raiea e dua tale na agilosi kaukauwa sa lako sobu tiko mai lomalagi; sa vakaisulu e na o, ka sa vakaisala e na drodrolagi; sa vaka na matanisiga na matana ka rau sa vaka na duru bukawaqa na yavana. 2Sa taura tu e ligana e dua na i vola vivigi lailai ka sa tadede tu. Sa tu e na dela ni wasawasa na yavana i matau ka tu e na vunua mamaca na yavana i mawi. 3A sa kaci e na domo levu me vaka na laione sa tagi tiko. Ia ni sa kaci yani ko koya e ratou sa qai sauma mai na kurukuru e vitu e na dua na rorogo levu. 4Ia ni sa oti na nodratou kuru na kurukuru e vitu, sa vakarau me'u volavola, au sa qai rogoca e dua na domo mai lomalagi ni kaya vei au, “Mo dregata na ka era kaya na kurukuru e vitu ka kakua ni vola” 5Sa qai dodoka cake ki lomalagi na ligana i matau ko koya na agilosi au raica tiko ni tu cake tu e na dela ni wasawasa kei na vanua mamaca, 6ka sa bubului vei koya sa bula ka tawa mudu, ko koya ka a buli lomalagi kei na veika sa tu kina, kei vuravura kei na veika sa tu kina, kei na wasawasa kei na veika sa tu kina, ka kaya, “Sa na sega tale ni wawa! 7Ia e na gauna sa uvuca kina na nona davui na i kavitu ni agilosi, sa na qai vakacavari kina na i naki vuni ni Kalou me vaka e a sa vakadeitaka oti vei ira na nona bobula, ko ira na parofita” 8Sa qai vosa tale vei au na domo mai lomalagi au rogoca tiko, ka kaya, “Lako, la'ki taura na i vola vivigi sa tadede tu e na liga ni agilosi sa tu cake tu e na dela ni wasawasa kei na vunua mamaca .” 9Au sa qai lako vua na agilosi ka kaya vua me solia vei au na i vola vivigi lailai. Sa qai kaya vei au ko koya, “Taura ka kania; e na gaga e ketemu, ia e na kamikamiea vaka na oni e gusumu.” 10Au sa qai taura mai e na liga ni agilosi na i vola vivigi lailai ka kania: a sa kamikamica me vaka na oni e gusuqu. Ia ni'u sa kania oti sa qai yaco me gaga e ketequ. 11Sa qai kainaki vei au, “O na parofisai tale me baleta e lewe vuqa na tamata, na veimatanitu, na veimataqali vosa, kei na tui e so.”

will be added

X\