VAKATAKILA 1

1E na i vola oqo sa volai kina na veika e a vakatakila ko Jisu Karisito, na veika a solia vua na Kalou me vakaraitaka vei ira na nona tamata ni sa voleka ni yaco. E a tala na nona agilosi ko Jisu me vakatakila na veika oqo vei Joni, na nona dauveiqaravi. 2A sa tukuna ko Joni na veika kece ga e a raica ka sa i koya oqo na nona i tukutuku me baleta na vosa ni Kalou kei na veika dina sa mai vakatakila ko Jisu Karisito. 3Sa kalougata ko koya sa wilika ka rogoca na vosa ni parofisai oqo, ka vakabauta na veika sa volai tu kina; ni sa roro mai na gauna me vakayacori kece kina. 4Mai vei Joni ki vei ira na i soqosoqo lewe ni lotu e vitu mai Esia: Me nomuni mada ga na loloma kei na vakacegu mai vei koya sa bula tu e daidai, ka a bula e liu, ka na bula tale ga e muri: mai vei iratou tale ga na yalo e vitu e ratou sa tiko e na mata ni nona i dabedabe vakatui; 5mai vei Jisu Karisito tale ga, na dautukutuku yalodina, na ulumatua vei ira na tu cake tale mai na mate, ka nodra Turaga levu na tui e vuravura. Ki vei koya sa lomani keda ka sa sereki keda mai na noda i valavala ca e na nona dra, 6sa qisi keda ko koya me dua na yavusa tui ka bete ni nona Kalou ka Tamana. Me ia vei koya na vakarokoroko kei na lewa ka sega ni mudu! Emeni! 7Raica, sa lako mai ko koya e na o ka na raici koya na mata kece ga; ko ira tale ga era a suwaki koya. Era na tagi tale ga na veimataqali kece e vuravura e na vuku ni ka era a kitaka vua. Me sa vaka gona kina! Emeni! 8“Ko i au na Alifa kei na Omeka, na i vakatekivu kei na i vakataotioti,” sa kaya na Turaga na Kalou Kaukauwa, o koya sa bula e daidai, ka a bula e liu ka na bula tale ga e muri. 9Ko i au ko Joni na wekamuni, au sa vakaivotavota vata kei kemuni e na nomuni vakararawataki kei na nona matanitu kei na vosota sa noda e na vuku i Jisu. Au a biu e na yanuyanu ko Patimo ni'u sa vunautaka na vosa ni Kalou kei na dina sa mai vakatakila ko Jisu. 10E a vakasinaiti au na Yalo Tabu e na siga ni Turaga, ka'u a rogoca mai dakuqu e dua na domo levu me vaka na rorogo ni davui, 11ni kaya vakaoqo “Vola e na dua na i vola na ka ko raica, ka qai vakauta ki na i soqosoqo lewe ni lotu e vitu, mai Efeso, Simurina, Perikamo, Caetira kei Sariti, Filadelafia kei Leotisea” 12Au sa qai rai vuki me'u raici koya ka vosa tiko mai vei au, ka'u raica e vitu na i tutu ni cina koula 13ka tu cake tu e na kedra maliwa donu e dua, ka vaka na i rairai ni tamata. E vakaisulu tu e na sulu vakatui balavu ka yaco sara ki yavana, ka vau na lomaserena e na dua na i vau koula. 14E vulavula na drau ni uluna me vaka na vuti ni sipi se uca cevata; ka vaka na yameyame ni buka na yaloka ni matana. 15Sa makumakualiliva na yavana me vaka na parasa sa vakaririgi e na kena kuro, ka sa vakere na domona me vaka e dua na savu levu. 16Sa taura tiko e ligana i matau e vitu na kalokalo. Sa basika mai gusuna e dua na i seleiwau gata ka bati rua, ka sa vaka na i serau ni matanisiga e na sigalevu tutu na matana. 17Ia ni'u sa raici koya, au sa bale sara ki yavana me vaka e dua sa ciba. Ia sa qai tabaki au e na ligana i matau, ka kaya, “Kakua ni rere, ko i au na i matai kei na i otioti; 18sa i au ka'u sa bula tiko. Au a mate e liu, ia oqo au sa bula ka tawa mudu. Sa tu vei au na lewa kei mate kei na nodra vuravura na mate. 19Ia mo vola na veika ko sa raica, na veika sa tu oqo kei na veika e na yaco mai muri. 20Ia sa vakaoqo na i balebale vuni ni kalokalo e vitu ko sa raica e ligaqu i matau, kei na i tutu ni cina koula e vitu: na kalokalo e vitu sa i iratou na agilosi ni soqosoqo lewe ni lotu e vitu, kei na i tutu ni cina e vitu sa i ira na i soqosoqo lewe ni lotu e vitu.

will be added

X\