FILIMONI 1

1Oqo na i vola i Paula, e dua sa kaivesu tu e na vuku i Karisito Jisu, vata kei Timoci na wekada. Ki vei Filimoni na wekai keirau, ka nerrau i tokani e na cakacaka 2kei na i soqosoqo lewe ni lotu sa dau soqoni tiko e nomu vale, vata kei rau tale ga ko Afia na ganeda kei Akipa na noda i tokani e na i valu oqo. 3Me nomuni na vakacegu mai vua na Kalou ko Tamada kei na Turaga ko Jisu Karisito. 4Au sa dau vakavinavinaka tiko ga vua na Kalou e na gauna au dau cavuti iko kina e na noqu masu 5ni'u sa mai rogoca tiko na nomu lomani ira kece ga na tamata ni Kalou kei na nomu vakabauta na Turaga ko Jisu. 6Au sa masulaka na noda veitokani e na vakabauta me vakatitobutaka na noda kila na veika vinaka e da sa taukena e na noda tu vata kei Karisito. 7Ni sa ka levu na noqu reki kei na vakacegu e na nomu loloma na wekaqu ka ni sa vakabulabulataki na lomadra na tamata ni Kalou e na vukumu. 8Me vaka au sa wekamu e na vuku i Karisito sa rawa me'u doudou sara kina me'u vakarota vei iko na ka e kilikili mo cakava. 9Ia e na vuku ga ni noqu lomani iko e vinaka cake kina vei au me'u vakamamasu ga vei iko, ko i au ko Paula na i talai i Karisito Jisu, ka'u sa vesu tu edaidai e na vukuna. 10Au sa vakamasuti iko e na vuku ni luvequ vakayalo ko Onisimo o koya sa mai yaco me luvequ e na noqu tu vakavesu oqo. 11E a tamata tawa yaga vei iko e liu ko koya, ia oqo sa tamata yaga vei iko kei au tale ga. 12Au sa talai koya lesu tale yani oqo vei iko, ka sa sala vata yani kei koya na yaloqu. 13Au a via tauri koya me keirau sa tiko ga me kemu i sosomi, me qaravi au tiko ga e na noqu tu vakavesu tu oqo e na vuku ni tukutuku vinaka. 14Ia au sa sega ni via cakava e dua na ka, ni sa bera ni macala na lomamu, me kakua kina ni ka ni veivakasaurarataki wale ga na nomu caka vinaka; ia me ka sara ga ni nomu lewa galala e loma. 15De sa i koya oqo na vuna e biuti iko tu mada kina vakalailai ko Onisimo, o koya me qai tiko vata kei iko ka tawa mudu. 16Ni sa sega ni tamata bobula wale ga ko koya, ia sa uasivi cake mai na bobula ni sa taeida lomani. Sa bibi dina vei au ko koya ia e na vakauasivi cake sara vei iko ni sa nomu bobula ka tacimu e na vuku ni Turaga. 17Ia, kevaka ko sa okati au dina me'u nomu i tokani, mo qai ciqomi koya sara me vaka na nomu ciqomi au. 18Ia ke a cakava e dua na ka ca vei iko, se a dinautaka e dua na ka, mo qai vola vei au. 19Ko i au ko Paula, au sa vola vei iko na ka oqo e na ligaqu dina, au na sauma lesu vei iko. Ia e sega beka ni yaga me'u tukuna tale vei iko ni ko dinautaka tu na nomu bula vakayalo vei au. 20O koya gona ko ya na wekaqu, yalovinaka mo vakayacora mada na noqu kerekere oqo e na vuku ni Turaga; mo vakabulabulataka kina na yaloqu e na vuku i Karisito. 21Au sa nuidei tu ni ko na cakava na ka au vola yani oqo vei iko, ka'u kila tale ga ni na uasivi cake sara na ka ko na vakayacora kina. 22Mo vakarautaka tale tiko ga e dua na noqu i cili ka'u sa nuitaka ni'u vakasukai tale yani vei kemuni e na vuku ni nomuni masu. 23Sa loloma tu yani vei iko ko Epafiro, O koya keirau vesu vata tu e na vuku i Karisito Jisu, 24kei iratou na noqu i tokani e na cakacaka ko Marika, Arisitako, Timasa, kei Luke. 25Me tiko ga kei kemuni kece na loloma ni Turaga ko Jisu Karisito.

will be added

X\