FILIPAI 3

1Me'u tinia, kemuni na wekaqu, mo ni marau tiko e na nomuni sa tu vata kei na Turaga. E sega ni ka ni oca vei au me'u vola tale yani na veika au a sa vola oti e liu, ka ni na vinaka cake sara vei kemuni ke'u kitaka vaka kina. 2Ni qarauni kemuni vaka mai vei ira na dau caka ca, ko ira na koli, koya ko ira na tamata era dau cikeva me tavalaki na yago. 3Sa i keda ga sa yaco vei keda na veicilivi dina, ka sega ni ko ira koya, ka ni da sa qarava tiko na Kalou e na veiliutaki ni Yalo Tabu, ka da sa marau tiko e na vuku ni noda sa tu vata kei Karisito, ka da sa sega ni vakararavi tiko ki na veika vakayago. 4E a rawa sara ga vei au me'u vakararavi ki na veika vakayago. Ke dua e nanuma ni tu vua e so na ka vakayago me vakararavi kina, e levu cake sara na kena ka tu vei au. 5Au a cilivi e na i ka walu ni siga ni noqu bula. Ko i au e dua na Isireli, e na yavusa i Penijamini; au Iperiu dina, ka sega ni dua na dra tani e tiko vei au. E na ka me baleta na lawa vaka-Jiu, ko i au e dua na Farisi. 6Au a gumatua sara kina ka'u mani la'ki vakacacani ira sara kina na i soqosoqo lewe ni lotu. Ia e na veivakadonui e rawa mai na kena muri na Lawa, e a sega ni bau dua kina na noqu cala. 7Ia na veika kece au a taleitaka e liu au sa okata me ra ka tawa yaga e na vuku i Karisito. 8Au sa okata me sega ni yaga na ka kece ga e na kena talei na kilai Karisito Jisu na noqu Turaga. Au sa biuta tani na ka kece ga e na vukuna; au sa okati ira kece ga me ra de ni manumanu, me noqu kina na Karisito, 9ka me keirau duavata dina sara. Sa sega gona kina ni tu vei au na yalo savasava au rawata vaka i au e na kena muri na Lawa, na yalo savasava ga sa dau soli e na vuku ni vakabauti Karisito, na yalo savasava sa taka mai vua na Kalou ka yavutaki e na vakabauta. 10Na ka ga au gadreva koya me'u kilai Karisito kei na kaukauwa ni nona tu cake tale mai na mate, me'u vakaivotavota e na nona rarawa ka vakataki koya e na nona mate, 11me'u bau rawata tale ga na tu cake tale mai na mate. 12Au sega ni kaya ni'u sa rawata kece sara na veika oqo, se'u sa vinaka sara. Ia au sa saga tiko ga me'u na rawata na i naki e a rawai au taumada kina ko Karisito. 13Kemuni na wekaqu au sega ni nanuma ni'u sa rawata oti, ia e dua ga na ka au sa cakava, koya me'u guilecava na ka sa sivi, ka'u sa saga e na noqu i gu taucoko me'u tadolova na ka sa tu mai liu. 14O koya gona koya au sa ciciva vakadodonu kina na cere me'u tauca na cere sa kacivi au kina mai cake na Kalou e na vuku i Karisito Jisu. 15Ko i keda kece eda sa matua vakayalo sa dodonu me tu vei keda na i tovo ni vakasama oqo. Ia kevaka e so vei kemuni e dua tani na i tovo ni nodra vakasama, e na vakamatatataka vei kemuni na Kalou. 16Ia me da toso tiko ga ki liu, me vaka na i vakarau eda a sa muria tiko mai ka yacova mai na gauna oqo. 17Kemuni na wekaqu, ni vakamurimuri au tiko ga, ka dau muri ira vinaka tale ga era sa dau vakayacora tiko na i vakarau dodonu, keitou a sa vakaraitaka vei kemuni. 18Au a sa tukuna oti vakavuqa vei kemuni e liu, ia oqo au sa baci tukuna tale, ka'u tukuna vata kei na wai ni mataqu, ni ra sa meca ni kauveilatai i Karisito e lewe vuqa e na vuku ni nodra i valavala. 19Era na tini dina ki eli ko ira koya, ni sa nodra kalou na gagadre ni yagodra, ka ra sa dau dokadokataka na ka e dodonu me ra maduataka, ka ra sa dau vakasamataka wale ga na veika ni bula oqo. 20Ia ko i keda, eda sa lewe ni koro mai lomalagi, ka da sa waraka tiko ga e na yalo nanamaki na noda i Vakabula, na Turaga ko Jisu Karisito, me lako mai lomalagi. 21E na qai veisautaka ko koya na yagoda malumalumu oqo, na yago sa rawa ni mate, me vaka na yagona lagilagi; e na nona vakayagataka na kaukauwa sa rawa kina vua me kauta kina na ka kece ga ki na ruku ni nona lewa.

will be added

X\