FILIPAI 2

1Ia me vaka ni sa vakayaloqaqataki kemuni na nomuni tu vata kei Karisito, ka sa vakacegui kemuni na nona loloma, ka ko ni sa veitokani vata tiko e na Yalo Tabu, ka sa tu vei kemuni na yalo matua kei na veilomani, 2au sa vakamasuti kemuni mo ni vakamarautaki au dina sara, me tautauvata na i vakarau ni nomuni vakasama, kei na nomuni tiko veilomani ka mo ni lomavata ka yalo vata tiko. 3Ni kakua ni cakava e dua na ka e na yalo ni nanumi koya ga vaka i koya, se e na yalo dokadoka, ia mo ni yalo malumalumu ga ka dau okati ira na tani me ra uasivi cake vei kemuni. 4Me ra kakua ni dui nanuma ga na tamata yadua na ka e baleti ira, ia me ra dau nanuma tale ga na ka e baleti ira na tani. 5Me tiko vei kemuni na i tovo ni yalo ka a tiko vei Karisito Jisu: 6O koya, e dina ga ni tiko vua e na veigauna kece ga na bula va-Kalou, e a sega ni bau nanuma me vakaukauwataka me rau tautauvata tiko ga kei na Kalou. 7Ia e a nakita ga vaka i koya me laiva tu mada yani na veika kece e a tu vua, ka mai taura na ni vakarau ni bula vakatamata bobula. A sa yaco me vakataki ira na tamata ka sa rairai mai e na yago vakatamata. 8Ia ni sa rairai e na yago vakatamata sa vakayalomalumalumutaki koya ka sa talairawarawa me yacova sara na mate, io, na mate e na kauveilatai. 9E na vuku ni ka oqo sa qai vakacerecerei koya kina na Kalou ka biuti koya e na vanua cecere duadua mai cake, ka solia vua na yaca e uasivi cake mai na yaca kece ga. 10Ka me ra na tekiduru kina na veika bula kece ga mai lomalagi kei vuravura, kei na ruku ni vuravura e na nodra doka na yaca i Jisu; 11ka ra vakatusa kece ga ni sa Turaga ko Jisu Karisito me vakalagilagi kina na Kalou na Tamada. Mo ni Rarama me vaka na Veirarama e so e Vuravura 12O koya gona kemuni na wekaqu lomani me vaka ko ni a dau talairawarawa vei au e na gauna eda a sa tiko vata kina, e bibi cake sara mo ni muria na noqu vosa e na gauna oqo, ni'u sa sega ni tiko kei kemuni. Ni vakacavara vakavinaka sara na cakacaka ni nomuni vakabauta e na rere kei na sautaninini, 13ka ni sa i koya ga na Kalou sa cakacaka tiko e na yalomuni, mo ni vinakata ka rawata tale ga mo ni vakayacora na i naki ni lomana. 14Mo ni kakua ni cakava e dua na ka e na vosa kudrukudru se e na veileti, 15mo ni wili kina mo ni yalo savasava ka me kakua ni vakamelei rawa vei kemuni e dua na ka, ka mo ni vakataki ira kina na luve ni Kalou; ko ira e sega ni kune rawa vei ira e dua na ca, e na kedra maliwa na i tabatamata lomatakelo ka i valavala ca. Sa dodonu mo ni cila e na kedra maliwa me vakataki ira na kalokalo e na vuravura butobuto, 16ni ko ni sa dulaka tiko vei ira na tukutuku me yaco kina na bula. Kevaka ko ni vakayacora koya sa na rawa kina vei au me'u sakitaki kemuni, e na Siga e na lesu tale mai kina ko Jisu Karisito, ka ni na vakaraitaka ni a sega ni maumau wale na noqu i gu kei na noqu cakacaka. 17Kevaka sara mada ga au na mani vakamatei e na vukumuni, ka sovaraka na noqu dra me i kuri ni nomuni i soro vua na Kalou e na vuku ni nomuni vakabauta, au sa reki kina ka marau vata kina kei kemuni. 18Me vaka tale ga kina ko i kemuni, mo ni reki ka marau vata kei au. 19Kevaka sa vaka kina na loma ni Turaga, au na talai Timoci yani vei kemuni e na dua na gauna wale ga oqo, ka me na mai vakaceguya na yaloqu na kemuni i tukutuku. 20E sega tale ni dua e tiko vei au me kauwaitaka dina na veika e baleti kemuni me vakataki koya. 21Era sa dui kauwaitaka ga na tamata yadua na ka e baleti ira, ka sega na veika e baleti Jisu Karisito. 22Ko i kemuni sara mada ga vaka i kemuni, ko ni sa vakadinadinataka na nona yaga, e na neirau a cakacaka vata e na vuku ni tukutuku vinaka, me vaka e dua na tama kei na luvena. 23O koya gona koya au sa nanuma kina me'u na talai koya yani vei kemuni, e na gauna ga au sa na kila kina na ka e na yaco vei au. 24Ia au sa vakanuinui tiko vua na Turaga, ni na rawa ni'u lako yani vei kemuni e na dua na gauna wale ga oqo. 25Au nanuma tale ga ni sa ganita me'u talai Epafirotaito yani na wekada, o koya keirau a cakacaka ka vala vata, o koya tale ga ka a kauta mai na nomuni i tukutuku, ka mai veiqaravi vei au. 26Sa gadreva vakalevu ko koya me raici kemuni kece sara, ka sa rarawa na yalona ni ko ni la'ki rogoca ni a tauvimate. 27Io e a tauvimate dina ko koya ka voleka sara ni mate. Ia sa yalo loloma vua na Kalou, ka sega ni vei koya taudua ga, sa yalo loloma tale ga vei au ka sega kina ni vakaikuritaka na noqu rarawa e na dua tale na ka. 28O koya gona sa gu sara kina vakalevu na lomaqu me'u talai koya yani vei kemuni mo ni na marau kina ni ko ni sa raici koya tale, ka sa na seyavu tale ga kina na noqu rarawa. 29Ni ciqomi koya gona kina e na yalo marau me vaka e dua na wekada e na vuku ni Turaga. Ni dokai ira kece tale ga na tamata era vakataki koya, 30ka ni a sega ni kauwaitaka na nona bula, ka vovoleka sara ni mate e na vuku ni cakacaka i Karisito, me mai vakayacora kina vei au na veivuke ka a sega ni rawa vei kemuni mo ni mai vakayacora.

will be added

X\