FILIPAI 1

1Oqo na nodrau i vola ko Paula kei Timoci na bobula i Jisu Karisito— Ki vei ira kece mai Filipai era sa nona na Kalou ka ra sa tu vata kei Karisito Jisu, kei ira na qase ni lotu kei ira na tuirara. 2Me sobuti kemuni mada ga na loloma kei na vakacegu ni Kalou ko Tamada kei na Turaga ko Jisu Karisito. 3Au sa vakavinavinaka tiko ga vua na Kalou e na veigauna kece au vakananumi kemuni kina. 4E na veigauna kece au masulaki kemuni kina, au dau masulaki kemuni kece e na marau, 5e na vuku ni nomuni a vukei au e na cakacaka ni tukutuku vinaka mai na kena i vakatekivu me yacova mai oqo. 6Au sa vakadinata ni ko koya na Kalou ka a tekivutaka na cakacaka vinaka oqo e lomamuni, e na kitaka tiko ga me yacova sara ni sa oti, e na Siga sa na lesu tale mai kina ko Jisu Karisito. 7Au sa dau nanumi kemuni tu ga, e na vu ni yaloqu e na veigauna kece ga, ka sa dodonu gona kina me vaka oqo na i vakarau ni noqu vakanananu e na vukumuni. Ni ko ni sa vakaivotavota vata kei au e na veivakalougatataki ni Kalou e na noqu tiko e vale ni veivesu kei na gauna tale ga au sega tu kina ni vesu, me'u taqomaka ka vakadeitaka na i tukutuku vinaka. 8Sa noqu i vakadinadina na Kalou ni sa vakadinadinataka na levu ni noqu gadrevi kemuni e na loloma sa vu mai vei Karisito Jisu vaka i koya. 9Au masulaka me na tubu cake tiko ga na nomuni loloma ka me maucokona vinaka kina na nomuni kila ka kei na nomuni rai, 10me rawa kina vei kemuni mo ni dau digitaka na veika e uasivi sara. Ko ni sa na qai galala kina mai na veika dukadukali kece ga ka na sega na ka mo ni beitaki kina e na Siga e na lako mai kina na Karisito. 11E na vakasinaiti tale ga kina na nomuni bula e na veika vinaka ka rawa duadua ga vei Jisu Karisito me vakatubura, me vakalagilagi ka vakacaucautaki kina na Kalou. 12Au gadreva mo ni kila na wekaqu ni veika era a yaco vei au, era a mani yaco me tete kina na i tukutuku vinaka. 13A yaco kina me ra kila kece na yadra e vale ni tui kei ira kece e ke ni'u a biu ki na vale ni veivesu baleta ni'u sa dau veiqaravi i Karisito. 14Na noqu tiko e na vale ni veivesu sa qai kaukauwa vakalevu cake ga kina na nodra yalo dina na veiwekani vua na Turaga, ka sa tubu cake vaka tale ga kina na nodra yalo doudou me ra vunautaka na i tukutuku vinaka ka sega ni rere. 15E dina ni so vei ira era vunautaki Karisito e na nodra vuvu kei na nodra via veivala, ia e so era vunau e na yalodra dina. 16Era vunau e na nodra loloma ni ra kila ni a solia vei au na Kalou na i tavi me'u taqomaka na i tukutuku vinaka. 17E so era sega ni vunautaki Karisito e na yalo dina ia e na yalo ga ni nanumi koya vaka i koya. Era nanuma me ra vakalevutaka na noqu leqa e na gauna au tiko kina e vale ni veivesu. 18Ia e sega ni dua na ka koya vei au. Au sa marau ga ni sa vunautaki kina na Karisito, veitalia ga se caka e na yalo dina se e na yalo e veivakaisini. Ia, au na marau tiko ga 19ni'u sa kila ni sa rawa me'u sereki e na vuku ni nomuni masu kei na veivuke ni Yalo i Jisu Karisito. 20Na noqu gagadre kei na vakanuinui levu sa i koya me'u kakua ni sega ni rawata na noqu i tavi, ia me'u yalo qaqa ga e na veigauna kece, vakauasivi e na gauna oqo, me rawa kina ni vakalagilagi na Karisito, e na vuku ni noqu bula taucoko, se'u bula tiko se'u mate. 21Vei au, sa i Karisito ka'u sa bula tiko kina, ia ke'u sa mate, sa na qai vinaka cake sara vakalevu vei au. 22Ia kevaka au bula tiko ga, au na cakava tale kina e vuqa na ka vinaka, au sa na sega ni kila na ka me'u digitaka. 23Au sa dreti mai na rua na yasana. Au sa gadreva vakalevu sara me'u biuta na bula oqo ka la'ki tiko vata kei Karisito, ni sa uasivi cake sara koya; 24ia e na vukumuni ga sa yaga vakalevu cake kina me'u se tei bula tiko mada ga. 25Au sa vakadinata ni na vaka kina, ka'u sa kila gona kina ni'u na bula tiko ga ka tiko vata kei kemuni me'u vukei kemuni me tubu cake tiko ga na nomuni vakabauta ka vakalevutaki tale ga na kena marau. 26Sa na qai dua tale kina koya na vuna mo ni vakavinavinaka kina vei Karisito e na vukuqu, ni'u sa na tiko vata tale kei kemuni. 27Na ka e bibi koya, ni sa dodonu na nomuni i tovo me vaka na ka e gadrevi e na i tukutuku vinaka kei Karisito. O koya gona ke mani rawa se sega ni rawa ni'u lako yani me'u raici kemuni au sa na rogoca ga ni ko ni sa tu dei tu e na dua ga na i naki ka dua ga na gagadre, koya mo ni vala vata kece kina e na vuku ni vakabauta ni tukutuku vinaka. 28Ni kakua ni rerevaki ira na nomuni meca. Ni yalo qaqa ga, ka ni sa i koya na ka oqo e na vakadinadinataka vei ira ni ra na druka, ka ni ko ni na qaqa, me vaka ni sa i koya na Kalou ka na solia vei kemuni na qaqa. 29Ni sa soli vei kemuni e na vuku i Karisito, me sega wale ga ni ko ni vakabauti koya, ia mo ni na vosota tale ga na ka rarawa e na vukuna. 30Ni ko ni sa vala tiko e na i valu vata ga ko ni a raica ni'u a vala tiko kina e liu, ka me vaka tale ga ko ni sa rogoca, au se vala tiko ga kina e na gauna oqo.

will be added

X\