MACIU 9

1Sa qai vodo ki na dua na waqa ko Jisu ka lako ki tai kadua, ka yaco ki na nona koro. 2Ka raica, era sa qai kauta mai vua e dua na tauvi-paralasi, sa koto ga e na nona i davodavo. Ni sa raica ko Jisu na nodra vakabauta, sa qai kaya vua na tauvi-paralasi, “Vakacegu, na luvequ! Sa bokoci na nomu i valavala ca ” 3Ia, era sa qai kaya e lomadra e so vei ira na daunilawa, “E vosa vakacacataka na Kalou na tamata oqo.” 4Ia ni sa kila na nodra vakasama ko Jisu, sa qai kaya, “Na cava dou vakasamataka kina na ka ca e lomamudou? 5E vei e rawarawa cake me kainaki, ʻSa bokoci na nomu i valavala ca,' se me kainaki, ʻTu cake, ka lako’? 6Ia mo dou kila rawa kina ni sa tu na kaukauwa vua na Luve ni Tamata e vuravura me bokoca na i valavala ca ” Sa mani kaya vua na tauvi-paralasi, “Tu cake, taura cake na nomu i davodavo ka lako ki nomudou ” 7Sa qai tu cake ka lako sara ki nona vale. 8Ni ra sa raica ko ira na lewe vuqa era sa rere, ka vakacaucautaka na Kalou, o koya sa solia na kaukauwa vaka oqo vei ira na tamata. 9Ni sa lako yani mai kea ko Jisu, sa qai raica e dua na tamata na yacana ko Maciu ni dabe toka e na vale ni kumuni i vakacavacava, ka mani kaya vua, “Muri au ” Sa tu cake sara ko Maciu ka muri koya. 10Ni sa kana tiko mai vale ko koya, era sa qai lako mai e lewe vuqa na daukumuni i vakacavacava kei ira na tamata i valavala ca ka kana vata kei Jisu kei iratou na nona tisaipeli. 11Ia, ni ra sa raica ko ira na Farisi, era sa qai kaya vei iratou na nona tisaipeli, “Na cava e kana kina na nomudou i Vakavuvuli kei ira na daukumuni i vakacavacava kei ira na tamata i valavala ca?” 12Ia, ni sa rogoca ko koya, sa qai kaya, “E sega ni yaga na vuniwai vei ira na bula vinaka, vei ira ga na tauvi-mate. 13Dou la'ki vulica mada na i balebale ni vosa oqo ni Kalou ʻAu vinakata ga na lewa loloma ka sega na i soro.' Ni'u sa sega ni lako mai me'u kacivi ira na yalododonu, ko ira ga na i valavala ca.” 14E ratou sa qai lako mai vua ko iratou na tisaipeli i Joni, ka kaya, “Na cava sara mada keimami lolo ga kina kei ira na Farisi; ia, e ratou sa sega ni lolo na nomuni tisaipeli?” 15Sa qai kaya vei iratou ko Jisu, “E rawa li ni ra rarawa na weka ni tagane vou ni sa tiko vata voli ga kei ira na tagane vou? Ia, e na yaco mai na siga e na kau tani kina na tagane vou mai vei ira, era sa na qai lolo kina. 16“E sega e dua e dau cula na tiki ni sulu vou vata kei na i sulu madra, ni na kadresu laivi mai na i sulu na tikina botani ka sa qai kadresu vakalevu kina. 17E sega tale ga ni ra dau livia na waini vou ki na tavaya kuli ni manumanu makawa, ke vaka kina, era na kacabote na tavaya kuli ni manumanu; ia era dau livia ga na waini vou ki na tavaya kuli ni manumanu vou, ka sa maroroi ruarua kina.” 18Ni sa tukuna tiko na veika oqo, sa qai lako mai e dua na i liuliu ka mai cuva e na vakarokoroko e matana, ka kaya, “Sa qai mate wale ga oqo na luvequ-yalewa. Ia, mo ni la'ki tabaki koya mada e na ligamuni, ka na bula kina.” 19Sa mani tu cake ko Jisu kei iratou na nona tisaipeli ka muri koya. 20Ia, e dua na yalewa sa turidra balavu voli ka yabaki tinikarua sa lako mai vua mai dakuna ka tara na tutu ni nona kote balavu, 21ni sa kaya e lomana, “Kevaka wale ga au tara na tutu ni nona kote balavu, au sa na vakabulai.” 22Sa qai vuki ko Jisu ka raici koya, ka kaya, “Vakacegu, na luvequ, sa vakabulai iko na nomu vakabauta .” Sa bula sara na yalewa ko ya e na tiki ni gauna ko ya. 23Ni sa tadu ko Jisu ki na nona vale na i liuliu, sa raici ira na dauuvu i vakatagi, kei ira na lewe vuqa era sa tagiyaso tiko, 24sa qai kaya, “Ni lako mada, ni sa sega ni mate na goneyalewa, ia, e moce wale ga.” Era sa qai dredrevaki koya. 25Ia, ni ra sa vakatalai oti na lewe vuqa ki tautuba, sa curu yani ko koya ka taura na ligana, ka sa duri cake sara na goneyalewa. 26Sa qai rogovaki yani ki na vanua taucoko ko ya na kena i tukutuku. 27Ni sa lako tani mai kea ko Jisu, e rau sa muri koya yani e lewe rua na tamata mataboko, ka rau kaci voli, ka kaya, “Na Luve i Tevita, ni lomani keirau mai ” 28Ni sa curu ki vale, e rau sa lako sara yani vua na tamata mataboko, ka qai kaya vei rau ko Jisu, “Drau sa vakadinata li ni'u sa cakava rawa na ka oqo?” E rau sa qai kaya vua, “Io, Turaga.” 29Sa qai tara na matadrau, ka kaya, “Me yaco vei kemudrau me vaka ga na nomudrau vakabauta .” 30Sa mani rai rawa na matadrau. Sa qai vakaroti rau matua sara ko Jisu, ka kaya, “Qarauna, me kakua sara ni dua e kila ” 31Ia, e rau sa lako ga yani, ka vakateteya na kena i tukutuku ki na vanua taucoko ko ya. 32Ni ratou sa lako tiko yani, sa qai kau mai vua e dua na tamata galu ka curumi tevoro. 33Ni sa vakasavi tani na tevoro, sa vosa sara na tamata galu; ka ra sa kurabui na lewe vuqa, ka kaya, “E sa sega mada ni yaco e dua na ka vaka oqo e Isireli ” 34Ia era sa kaya ga na Farisi, “E vakasavi ira na tevoro ko koya e na kaukauwa ni nodra turaga na tevoro ” 35Sa qai veilakoyaki voli ko Jisu e na veikoro lelevu kece kei na veikoro lalai tale ga ka veivakatavulici e na nodra veivalenilotu, ka vunautaka na i Tukutuku Vinaka ni Matanitu, ka vakabulai ira na tauvi-mate kece ga kei na malumalumu kece ga. 36Ni sa raici ira na lewe vuqa, sa lomani ira sara, ni ra vakaleqai ka biu wale tu, me vaka ua sipi sa sega na kedra i vakatawa. 37Sa qai kaya vei iratou na nona tisaipeli, “Sa levu dina tu na ka me tamusuki; ia, era sa lewe lailai ga na tamata cakacaka. 38O koya gona, mo dou masuti koya kina na i Taukei ni were, me talai ira yani na tamata cakacaka me ra la'ki tatamusuki e na nona were ”

will be added

X\