MACIU 8

1Ni sa lako sobu mai na ulunivanua ko koya, era sa muri koya yani e lewe vuqa sara; 2ka sa qai lako mai vei koya e dua na tamata vukavuka ka mai tekiduru e matana ka kaya, “Na Turaga, kevaka ga sa lomamuni, sa rawa ni ko ni vakasavasavataki au ” 3Sa qai dodoka yani na ligana ko Jisu ka tarai koya, ka kaya, “Sa lomaqu, mo savasava mai ” A vakabulai sara mai na nona vukavuka. 4Sa qai kaya vua ko Jisu, “Qarauna mo kakua ni tukuna vua e dua, ia mo lako ga ka vakarautaki iko vua na bete, ka vakacabora na i solisoli ka vakarota ko Mosese, me i vakadinadina vei ira na tamata ni ko sa savasava .” 5Ni sa curu ki Kapenaumi ko Jisu sa lako mai vua e dua na turaganivalu, ka kerei koya 6ka kaya, “Kemuni na Turaga, e davo koto mai vale na noqu tamata e tauvi-paralasi, ka sa yaluma sara ” 7Sa qai kaya vua ko koya, “Au sa na la'ki vakabulai koya yani ” 8A sauma na turaganivalu ka kaya, “Kemuni na Turaga, sa sega ni veiganiti kei au mo ni curu ki na noqu vale; ia, mo ni cavuta ga na vosa, ka sa na bula kina na noqu tamata. 9Ka ni'u tu ga ko i au e na ruku ni lewa, ka ra tu e rukuqu e so na sotia, ka'u kaya vua e dua, ʻLako,' ka sa lako yani, ki vua tale e dua, ʻLako mai,' ka sa lako mai, ki vua tale ga na noqu tamata, ʻKitaka oqo,' ka sa kitaka.” 10Ni sa rogoca ko Jisu, sa kurabui, ka kaya vei ira ka muri koya tiko, “Au sa kaya vakaidina vei kemudou, au sa sega mada ni raica vua e dua e Isireli na vakabauta levu vaka oqo. 11Au sa kaya vei kemudou, ni ra na lewe vuqa era na lako mai na tokalau kei na ra tale ga; ka tiko sobu me kana vata kei Eparaama kei Aisake kei Jekope e na matanitu vakalomalagi. 12Ia, ko ira na gone ni matanitu era na biu ki na butobuto e tautuba, era na dau tagi ka vakasequruqurubati kina.” 13Sa qai kaya ko Jisu vua na turaganivalu, “Mo lako, me yaco vei iko me vaka ko sa vakabauta ” A bula sara na nona tamata e na tiki ni gauna ko ya. 14Ni sa curu yani ko Jisu ki na vale nei Pita, e a raica na tina ni watina ni davo koto ka tauvi-katakata; 15sa mani tara na ligana, ka sa takali sara vua na katakata, ka mani tu cake ka qaravi koya. 16Ni sa yakavi mai, era sa qai kauta mai vei koya e lewe vuqa na curumi tevoro; ka sa vakasavi ira na tevoro ko koya e na vosa, ka vakabulai ira kece ga era tauvimate, 17me vakayacori kina na vosa ka tukuna ko Aisea na parofita, “E sa kauta vua na noda malumalumu ka sa colata na noda tauvi-mate ” 18Ni sa raica ko Jisu na lewe vuqa era vakavolivoliti koya, sa qai kaya me ia na lako ki tai kadua. 19Sa qai lako mai e dua na daunilawa ka kaya vua, “Na i Vakavuvuli, au na muri kemuni ki na veivanua kece ga ko ni na lako kina ” 20Sa qai kaya vua ko Jisu, “Era vaqara na fokisi, ka ra vakasova na manumanu vuka; ia, na Luve ni Tamata ga e sega na vanua me kotora kina na uluna ” 21Sa qai vosa e dua tale vei ira na tisaipeli ka kaya vua, “Turaga, laivi au mada me'u la'ki buluti tamaqu.” 22Ia, sa qai kaya vua ko Jisu, “Mo muri au, ka laivi ira na mate me ra buluta na nodra mate.” 23Ni sa vodo ko Jisu ki waqa, e ratou sa muri koya kina na nona tisaipeli. 24Ka raica, sa tubu e dua na cava levu e wasawasa, ka sa luvu kina na waqa e na biau; ia, sa moce koto ga ko koya. 25E ratou sa qai vakayadrati koya, ka kaya, “Turaga, mo ni vakabulai kedatou, edatou sa mate.” 26Sa qai kaya vei iratou, “A cava dou sa rere kina, sa lailai na nomudou vakabauta?” Sa qai duri cake ka vunauca na cagi kei na wasawasa, ka sa maravu mai. 27E ratou sa kurabui, ka kaya, “A tamata vakacava mada oqo ni bau talairawarawa vua na cagi kei na wasawasa?” 28Ni sa yaco ki tai kadua ko Jisu, ki na nodra vanua na kai Katara, sa qai sota vata kaya e lewe rua na curumi tevoro e rau cavutu mai na i bulubulu; e rau sa rui vakarerevaki sara ka sa sega kina ni lako e dua e na sala ko ya. 29Ka raica, e rau sa qai qoqolou mai, ka kaya, “A cava ko ni via cakava vei keirau, na Luve ni Kalou? Ko ni sa lako li mai me vakararawataki keirau ni sa bera mai na kena gauna?” 30Ia, era kana vakayawa tu yani mai vei iratou e dua na qele ni vuaka levu. 31Era sa qai kerei koya na tevoro ka kaya, “Kevaka ko ni vakasavi keimami, vakatalai keimami me keimami curumi ira na qele ni vuaka ” 32Sa mani kaya vei ira, “Dou lako.” Era sa lako tani sara ka curumi ira na vuaka. Era qai cici sobu kece sara na qele ni vuaka e na baba ki wasawasa, ka ra sa luvu kina. 33Era sa qai dro na i vakatawa, ka lako yani ki na koro ka tukuna na ka kece ga, kei na veika e baleti rau na curumi tevoro. 34Era sa qai lako vakoro mai kina me sota kei Jisu, ia ni ra sa raici koya, era sa kerei koya me biuta na nodra vanua.

will be added

X\