MACIU 7

1“Dou kakua ni dauveivakalewai, de dou lewai. 2Ni dou na lewai ga e na lewa dou sa cakava, kei na i vakarau dou sa vakarautaka e na vakarautaki tale vei kemudou. 3A cava ko raica ga kina na malamala e na mata ni wekamu, ka sega ni raica na tolo ni kau e matamu? 4Ko na kaya rawa vakacava vua na wekamu, ʻMe'u leuta mada na malamala mai na matamu,' ia sa tu ga na tolo ni kau e matamu? 5O iko na dauveivakaisini, mo cavuta tani mada na tolo ni kau mai na matamu, ko na qai rai vinaka mo leuta na malamala mai na mata ni wekamu. 6“Dou kakua ni solia na ka tabu vei ira na koli, se biuta na nomudou mataniciva e matadra na vuaka, de ra na buturaka sobu e yavadra, ka vuki mai ka basuraki kemudou. 7“Dou kerekere, ka na soli vei kemudou; dou vakasaqara ka dou na kunea; dou tukituki ka na dolavi vei kemudou. 8Ni sa taura ko koya ga sa kerekere, ka kunea ko koya sa vakasaqara, ka na dolavi vua sa tukituki. 9Se ko cei mada vei kemudou kevaka e kere madrai na luvena, e na solia vua e dua na vatu? 10Se kevaka e kere ika, e na solia vua e dua na gata? 11Io, kevaka dou sa kila ko i kemudou na tamata ca na solia na ka vinaka vei ira na luvemudou, sa na wacava na Tamamudou mai lomalagi na nona via solia na veika vinaka vei ira sa kerekere vua! 12“Na ka ga dou vinakata me ra cakava vei kemudou na tamata, dou cakava tale ga vei ira, ni sa i koya oqo na Lawa kei ira na parofita. 13“Dou curu ki na matamata qiqo, ni sa rabailevu na matamata ka lalaga na sala sa mua ki na rusa, ka ra sa lewe vuqa era curu kina; 14ni sa qiqo na matamata ka dredre na sala sa mua ki na bula, ka ra sa lewe lailai ga era kunea. 15“Dou qarauni kemudou mai vei ira na parofita vakilasu, era lako mai vei kemudou ka ra vakaisulu mai vaka na sipi, ia era wolifa daukata e loma. 16Dou na kilai ira rawa e na vuadra. E dau beti li na vaini mai na veiwavakavotona, se na lolo mai na soni? 17Sa vaka kina, na kena vuataka ga na vua vinaka na kau vinaka, ka vuataka na vua ca na kau ca. 18E sega na kau vinaka me vuataka rawa na vua ca, se na kau ca me vuataka rawa na vua vinaka. 19Na kau ga e sega ni vuataka na vua vinaka sa dau ta laivi ka biu ki na buka waqa. 20Io, dou na kilai ira ga e na vuadra. 21“E na sega ni ko ira kece era kaya tiko vei au ʻKemuni na Turaga,' era na curu ki na matanitu vakalomalagi; ia, ko koya ga e cakava na loma i Tamaqu mai lomalagi. 22Era na kaya vei au e lewe vuqa e na siga ko ya, ʻKemuni na Turaga! Keimami a sega li ni vakatavuvuli e na yacamuni, ka vakasavi tevoro e na yacamuni, ka cakava na cakacaka mana e vuqa e na yacamuni?' 23Ia, au na qai kaya vei ira, ʻAu sega sara ni kilai kemudou; dou lako tani vei au ni dou sa tamata dau caka ca!’ 24“O koya gona, o koya ga sa rogoca na noqu vosa oqo ka cakava, e na vaka na tamata vuku sa tara na nona vale e na dela ni vatu; 25sa mani tau na uca, ka coka mai na dobui, ka liwa na cagi, ka tabaka na vale ko ya, ka sega ni bale, ni sa tauyavutaki e na vatu. 26Ia, ko koya ga sa rogoca na noqu vosa oqo ka sega ni cakava, e na vaka na tamata lialia sa tara na nona vale e na dela ni nuku, 27sa tau na uca, ka coka na dobui, ka liwa na cagi, ka tabaka na vale ko ya, sa mani bale kina, ka sa ka levu na kena bale!” 28Ni sa tinia na vosa oqo ko Jisu, era sa qoroqoro sara na lewe vuqa e na nona i vakavuvuli, 29ni sa vakatavulici rra me vaka e dua sa nona na lewa, ka sega ni vakataki ira na nodra daunilawa.

will be added

X\