MACIU 5

1Ni sa raici ira na lewe vuqa ko Jisu, sa mani cabe cake ki na ulunivanua. Ni sa dabe sobu e ratou sa qai lako mai ki vua na nona tisaipeli, 2sa qai tekivu vosa ko koya, ka vakatavulici ira, ka kaya: 3“Sa kalougata ko ira era sa yalo malumalumu, ni sa nodra na matanitu vakalomalagi. 4“Sa kalougata ko ira era dau kune rarawa, ni ra na vakacegui. 5“Sa kalougata ko ira era yalo malua ni ra na taukena na vanua. 6“Sa kalougata ko ira era via kania ka via gunuva na ka e dodonu, ni ra na vakamamautaki. 7“Sa kalougata ko ira era dau loloma, ni ra na lomani. 8“Sa kalougata ko ira era sa yalo savasava, ni ra na raica na Kalou. 9“Sa kalougata ko ira era dau sasagataka na veivinakati, ni ra na vakatokai me ra luve ni Kalou. 10“Sa kalougata ko ira era vakacacani e na vuku ni ka e dodonu, ni sa nodra na matanitu vakalomalagi. 11“Dou sa kalougata ni dou sa vakasewasewani ka vakacacani ka vosa vakacacataki vakailasu e na ka kece ga e ca e na vukuqu. 12Dou reki ka marau vakalevu, ni sa levu na kemudou i sau mai lomalagi, ni sa vaka oqo na nodra vakacacani na parofita era a bula e liu vei kemudou. 13“O i kemudou na masima kei vuravura. Ia kevaka sa seavu mai na masima na kena tuituina e na qai vakatuituinataki tale e na cava? Sa na qai sega ni yaga e na dua na ka, me sa biu tani ga, me ra buturaka na tamata. 14“O i kemudou na rarama kei vuravura. Na koro sa toka e delana e na sega ni tabonaki rawa. 15E sega tale ga ni ra dau vakacaudreva oti na cina na tamata, ka ra qai biuta e na ruku ni kato; e na kena i tutu ga, me vakararamataki ira kece ga era tiko e na loma ni vale. 16Me cila vaka kina na nomudou rarama e matadra na tamata, me ra raica rawa na nomudou cakacaka vinaka, ka vakarokorokotaka na Tamamudou sa tiko mai lomalagi. 17“Dou kakua ni nanuma ni'u sa lako mai me'u taba bokoca na Lawa kei na nodra i vakavuvuli na parofita, au sega ni lako mai me'u taba bokoca, ia me'u vakataucokotaka sara. 18Ni'u sa kaya vakaidina vei kemudou, e na sega sara ni takali rawa mai na Lawa e dua na i toqa se tikina lailai sara ka yacova ni sa takali ko lomalagi kei vuravura, e na vakayacori kece sara mada ga. 19O koya gona e na vakatokai kina me lailai sara e na matanitu vakalomalagi o koya e talaidredre ki na dua vei ira na i vakaro lalai oqo, ka vakatavulici ira vaka kina na tamata; ia, ko koya ga e na muria ka vakatavuvulitaka e na vakatokai me levu e na matanitu vakalomalagi. 20Ni'u sa kaya vei kemudou, kevaka e sega ni uasivi cake na nomudou i valavala dodonu mai na nodra na daunilawa kei na Farisi, dou na sega sara ni curu ki na matanitu vakalomalagi. 21“Dou sa rogoca ni a kainaki vei ira e liu, ʻMo kakua ni laba; o koya e laba sa dodonu me lewai kina e na mataveilewai.' 22Ia ko i au, au sa kaya vei kemudou, o koya ga sa cudruva na wekana, sa na lewai e na mataveilewai; o koya e vosa beca na wekana, sa na lewai e na matabose e cake, kei koya e rulaka na wekana, sa na lewai e na buka waqa mai eli. 23O koya gona kevaka ko sa mai vakacabora na nomu i solisoli e na i cabocabo ni soro, ka qai mai nanuma kina ni dua na ka e cati iko tiko kina na wekamu, 24laiva tu mada na nomu i solisoli ka la'ki veivinakati mada mai kei na wekamu, ka mo qai lako mai ka cabora na nomu i solisoli. 25“Drau veivinakati vakatotolo kei koya e beitaki iko ni drau sa lako vata tiko ga e gaunisala, de na qai soli iko yani ko koya e beitaki iko ki vua na turaganilewa, na turaganilewa ki vua na ovisa, ia ko na qai biu ki na valeniveivesu. 26Au sa kaya vakaidina vei iko, ko na sega ni sereki mai kea me yacova ni ko sa sauma na i otioti ni sede. 27“Dou sa rogoca ni a kainaki, ʻMo kakua ni dauyalewa.' 28Ia ko i au, au sa kaya vei kemudou, o koya ga e rai vua na yalewa ka gagano kina sa dauyalewa kaya oti e lomana. 29Kevaka sa vakacalai iko na matamu i matau, vecuka tani ka biuta laivi vei iko; ni vinaka cake vei iko me yali e dua na tikimu, me kakua ga ni biu ki eli na yagomu taucoko. 30Ia, kevaka sa vakacalai iko na ligamu i matau, muduka tani ka biuta laivi vei iko; ni sa vinaka cake vei iko me yali e dua na tikimu, me kakua ga ni biu ki eli na yagomu taucoko. 31“E a kainaki tale ga, ʻO koya e sereka na watina me solia vua na i vola vakadinadina ni veisere.’ 32Iako i au, au sa kaya vei kemudou, o koya ga e sereka na watina, ka sega e na vuku ni dautagane, sa vakavuna me la'ki dautagane, ia, ko koya e rau sa veiwatini kei na yalewa sa veisere oti sa dauyalewa. 33“Dou sa rogoca tale ga ni a kainaki vei ira e liu, ʻMo kakua ni bubului vakailasu; ia, mo vakayacora sara vua na Turaga na ka ko sa bubului kina.' 34Ia ko i au, au sa kaya vei kemudou, kakua sara ni bubului; kakua ki lomalagi ni sa i tikotiko vakatui ni Kalou, 35kakua ki vuravura ni sa i tutu ni yavana, kakua ki Jerusalemi ni sa nona koro na Tui levu. 36Kakua tale ga ni bubului ki ulumu ni ko sa sega ni vukica rawa e dua na drauna me vulavula, se loaloa. 37Ia me Io na Io ka Sega ga na Sega na nomudou vosa, ia na ka sa kuria oqo sa mai vua na Vunica. 38“Dou sa rogoca ni a kainaki, ʻMe i sau ni mata na mata, ka me i sau ni bati na bati.' 39Ia ko i au, au sa kaya vei kemudou, mo kakua ni vorati koya sa caka ca vei iko. Ia, kevaka e dua sa sabica na balumu i matau, vagolea tale ga vua na kena i karua: 40ia, kevaka e dua sa via veilewaitaki iko ka me taura kina na nomu sote, laiva tale ga yani vua na nomu kote. 41Ia, kevaka e dua sa vakasaurarataki iko mo lakova e dua na maile, lakova vata kaya e rua na maile. 42Solia vua sa mai kerekere vei iko; ka kakua ni vuki tani mai vua sa via mai dinau vei iko. 43“Dou sa rogoca ni a kainaki tale ga, ʻMo lomana na kai nomu ka cata na nomu meca.' 44Ia ko i au, au sa kaya vei kemudou, Lomani ira na nomudou meca ka masulaki ira era vakacacani kemudou, 45mo dou luvena kina na Tamamudou mai lomalagi. Ni sa vakacabea ko koya na nona matanisiga vei ira na tamata ca kei ira na tamata vinaka, ka vakatauca na uca vei ira na yalododonu kei ira na tawa yalododonu. 46Ia kevaka dou dau lomani ira ga era dau lomani kemudou, na cava e na kemudou i sau? Era sega li ni dau cakava vaka kina na daukumuni i vakacavacava? 47Ia, kevaka dou vakabula wale ga vei ira na wekamudou, na cava dou sa uasivi cake kina vei ira na tani? Era sega li ni dau cakava vaka kina na veimatanitu tani? 48O koya gona mo dou vinaka sara me vaka sa vinaka sara na Tamamudou vakalomalagi.

will be added

X\