MACIU 4

1Sa qai kauti Jisu cake na Yalo Tabu ki na vanua lala me veretaki koya kina na tevoro. 2Ia ni sa oti e vasagavulu na siga ka vasagavulu na bogi e lolo tiko kina, sa qai viakana. 3Sa qai lako yani na dauvere ka kaya vua, “Kevaka ko sa Luve ni Kalou, kaya mada ki na veivatu oqo me ra vuki me ra i buli madrai.” 4Ia sa sauma ko Jisu ka kaya, “Sa volai tu, ʻE na sega ni bula na tamata e na madrai duadua ga; ia sa bula ga e na vosa kece ga sa lako mai na gusu ni Kalou.’ ” 5Sa qai kauti koya na tevoro ki na koro tabu ko Jerusalemi ka vakaturi koya e na dela ni Valenisoro, 6ka kaya vua, “Kevaka ko sa Luve ni Kalou, mo rika sobu; ni sa volai tu, ʻE na vakaroti ira na nona agilosi ko koya e na vukumu: Ka ra na tabei iko cake e ligadra, de tavutu na yavamu e na dua na vatu.’ ” 7Sa qai kaya vua ko Jisu, “Sa volai tale ga, ʻMo kakua ni veretaka na Turaga na nomu Kalou.’ ” 8Sa qai kauti koya tale na tevoro ki na dua na ulunivanua cecere sara, ka vakaraitaka vua na veimatanitu kece ga e vuravura, kei na kedra lagilagi; 9ka qai kaya, “Au na solia vei iko na veika kece ga oqo kevaka ko cuva sobu ka vakarokoroko vei au.” 10Sa qai kaya vua ko Jisu, “Lako tani, Setani! Ni sa volai tu, ʻMo vakarokoroko vua na Turaga na nomu Kalou, ka mo qaravi koya duadua ga.’ ” 11Sa qai biuti koya na tevoro, ka ratou sa qai lako mai e so na agilosi ka mai qaravi koya. 12Ia ni sa rogoca ko Jisu ni sa biu ki na vale ni veivesu ko Joni, sa suka tale ki Kalili; 13ka sa biuti Nasareci ka sa la'ki tiko mai Kapenaumi e baravi, e na i yalayala kei Sepuloni kei Nafitalai; 14me vakayacori sara kina na vosa i Aisea na parofita, ni a kaya, 15“Na vanua ko Sepuloni kei na vanua ko Nafitalai, vaka ki wasawasa, e na tai kadua ni Joritani, o Kalili ni veimatanitu tani! 16Ko ira era tiko e na butobuto, era na qai raica e dua na rarama levu! Ka sa kida mai na rarama vei ira era tiko e na vanua ni yaloyalo ni mate!” 17Mai na gauna koya sa vakatekivu kina me dau vunau ko Jisu, ka kaya, “Mo ni veivutuni ni sa voleka na matanitu vakalomalagi.” 18Ni sa lako voli e na baravi mai Kalili ko Jisu, sa mani raica e lewe rua na veitacini, ko Saimoni ko koya e vakatokai ko Pita kei Adriu na tacina e rau biu lawa tiko ki wai, ka ni rau sa gonedau. 19Sa qai kaya vei rau ko koya, “Drau muri au mai, ka'u na qisi kemudrau mo drau gonedau ni tamata.” 20A rau sa biuta sara tu na nodrau lawa ka muri koya. 21Sa qai toso tale vakalailai ki liu ko koya, ka raica e lewe rua tale na veitacini, ko Jemesa na luve i Sepeti kei Joni na tacina, ni ratou tiko vata kei Sepeti na tamadrau e na waqa, ka ratou oneva tiko na nodratou lawa. Sa kacivi rau ko Jisu 22ka rau sa biuta sara na waqa kei tamadrau, ka muri koya. 23Sa qai veilakoyaki voli e Kalili taucoko ko Jisu, ka veivakatavulici e na nodra veivalenilotu, ka vunautaka na i Tukutuku Vinaka ni matanitu, ka vakabulai ira na tamata mai na veimate kece ga kei na malumalumu kece ga. 24Sa qai rogovaki yani na kena i rogorogo ki Siria taucoko, ka ra sa kau vua na tamata kece ga era tauvimate ka vakaleqai tu e na veimataqali mate se yaluma, kei ira na curumi tevoro, na lialia, kei ira na paralasi; ka sa vakabulai ira kece ko koya. 25A ra sa muri koya e lewe vuqa sara mai Kalili kei na Koro e Tini kei Jerusalemi kei Jutia kei na tai kadua ni Joritani.

will be added

X\