MACIU 3

1E na gauna koya sa lako voli mai ko Joni na Dauveipapitaisotaki, ka dau vunau e na loma ni vanua mai Jutia, ka kaya, 2“Ni veivutuni ni sa voleka na matanitu vakalomalagi!” 3Ni sa i koya ga oqo ka a vosa kina ko Aisea na parofita, ka kaya, “Na domona e dua sa kacikaci voli e loma ni vanua: Dou caramaka na sala ni Turaga, cakava me dodonu na nona gaunisala!” 4Ia sa vakaisulu ko Joni e na i sulu vuti ni kameli, ka vau na tolona e na i oro kuli ni manumanu, ka kena kakana na vodre kei na oni ni veikau. 5Era sa qai lako yani vua ko ira mai Jerusalemi kei Jutia taucoko, kei na yasana kece e volekata na Joritani, 6ka sa papitaisotaki ira ko koya e na uciwai na Joritani, ni ra sa vakatusa tiko kina na nodra i valavala ca. 7Ia ni sa raici ira e lewe vuqa na Farisi kei na Setoki ni ra sa lako tiko yani vua me ra papitaisotaki, sa kaya vei ira, “O i kemuni na kawa ni gata! O cei sa vakasalataki kemuni mo ni dro tani mai na cudru sa lako tiko mai? 8Ni vuataka na vua e kilikili kaya na veivutuni, 9ka kakua ni via nanuma mo ni kaya e lomamuni, ʻA tama i keimami ko Eparaama,' ni'u sa kaya vei kemuni, sa rawa vua na Kalou me vakatubura me ra luve i Eparaama na veivatu oqo. 10Sa toka sara ga oqo na matau e na veivunikau me tatalaki sobu kina na kau kece ga e sega ni vuataka na vua vinaka, ka ra biu ki na buka waqa. 11Au sa papitaisotaki kemuni e na wai e na nomuni sa veivutuni; ia ko koya e muri au mai e levu cake vei keirau, ka sega ni rauti au me'u i kaukau ni nona i vava; e na papitaisotaki kemuni ko koya e na Yalo Tabu kei na buka waqa. 12Sa taura tu e ligana na nona i sivi ni sila me vakasavasavataka kina na nona buturara ni caka sila, ka binia vata na sila ki na nona lololo; ia na qana e na vakama e na buka waqa e sega ni bokoci rawa.” 13Sa qai lako ko Jisu mai Kalili ki na Joritani me la'ki papitaisotaki koya ko Joni. 14A via tarovi koya ko Joni, ka kaya, “O i au ga e ganita me'u papitaisotaki mai vei kemuni, ia oqo ko ni sa qai lako tale li mai vei au?” 15Ia a sauma ko Jisu, ka kaya vua, “Tei vosota mada me caka vaka kina e na gauna oqo, ni daru na vakayacora kina na ka kece e vinakata na Kalou.” Sa mani vakayacora vaka kina ko Joni. 16Ia ni sa papitaisotaki oti ko Jisu sa cabe sara mai wai, ka raica, sa qai tadola mai na lomalagi, ka sa raica sara ko koya na Yalo ni Kalou ni sa lako sobu mai me vaka na ruve, ka mai ro toka vua. 17Sa qai rogo mai e dua na domo mai lomalagi, ka kaya, “Oqo na noqu Gone ni Toko, au sa dau vinakata vakalevu.”

will be added

X\