MACIU 28

1Ni sa oti na Siga ni Vakacecegu me vaka ni sa kida mai na i matai ni siga ni macawa, sa qai lako mai ko Meri na yalewa ni Makitala kei Meri ka dua me rau raica na i bulubulu. 2E sa yaco oti e dua na uneune; ni a lako sobu mai lomalagi e dua na agilosi ni Turaga. Sa lako mai ka vaqiqica tani na vatu, ka mai toka e delana. 3E vaka na liva na i serau ni matana, ka vulavula na nona i sulu me vaka na uca vulavula. 4Era sa sautaninini na yadra e na nodra rerevaki koya, ka ra yaco me ra vakataki ira na mate. 5Sa qai vosa na agilosi ka kaya vei rau na yalewa, “Drau kakua ni rere, ni'u kila ko drau vakasaqarai Jisu tiko, ko koya e a vakoti ki na kauveilatai. 6Sa sega e ke ko koya: ni sa tu cake tale, me vaka. na nona vosa. Drau lako mai, mo drau raica na yasana ka a koto kina. 7Drau lako vakatotolo ka tukuna vei iratou na nona tisaipeli ni sa tu cake tale mai na mate ko koya, ka raica, sa liu vei kemudou ko koya ki Kalili; dou na raici koya mai kea. Drau nanuma na ka au sa tukuna vei kemudrau ” 8E rau sa biuta sara mai na i bulubulu e na rere kei na reki levu, ka cici yani me rau tukutuku vei iratou na nona tisaipeli. 9Ia, sa qai tavaki rau mai ko Jisu, ka kaya, “Drau sa bula.” E rau sa qai toro vua, ka tara na yavana, ka cuva vua. 10A qai kaya vei rau ko Jisu, “Drau kakua ni rere, drau la'ki tukuna ga vei ira na wekaqu me ra lako ki Kalili, era na raici au mai kea.” 11Ni rau sa lako yani, era sa qai lako e so vei ira na yadra ki na koro ka tukuna vei ira na bete levu na veika kece ka a yaco. 12Era sa qai soqoni vata kei ira na qase ka bosea; era sa qai solia e dua na i lavo levu vei ira na sotia, 13ka kaya, “Dou kaya vaka oqo, Era a lako mai na nona tisaipeli e na bogi ka butakoci koya ni dou moce tu. 14Ia kevaka e mani la'ki rogoca na kovana, keitou na tukuna vakavinaka vua, ka taqomaki kemudou.” 15Era sa mani taura na i lavo ka cakava me vaka era sa vakasalataki kina. Sa vakadewataki tiko ga na i tukutuku oqo vei ira na Jiu me yacova edaidai. 16E ratou sa qai lako ki Kalili na tisaipeli e lewe tinikadua, ki na ulunivanua ka a dusimaki iratou kina ko Jisu. 17Ni ratou sa raici koya e ratou a qai cuva sobu vua e na vakarokoroko; ia e so e ratou sa vakatitiqa ga. 18Sa qai toro voleka mai ko Jisu ka vosa vei iratou, ka kaya, “Sa soli mai vei au na lewa kece ga mai lomalagi kei vuravura. 19Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; 20vakavulici ira me ra muria na veika kece ga au sa vakarota tu vei kemudou, ka mo dou kila, au sa tiko vata kei kemudou e na veisiga kece ga me yacova na i vakataotioti kei vuravura.”

will be added

X\