MACIU 27

1Ni sa mataka mai, era sa qai bosei Jisu ko ira kece ga na bete levu kei ira na nodra qase na tamata, me ra vakamatea. 2Era sa qai vesuki koya ka kauti koya tani, ka soli koya vei Pailato na kovana. 3Ia ko Jutasa, ko koya ka bukiveretaki koya, ni sa raica ni sa lewai ko koya me mate, sa qai veivutuni, ka vakasuka na tiki ni siliva e tolusagavulu vei ira na bete levu kei ira na qase, 4ka kaya, “Au sa cala ni'u a bukiveretaka e dua na tawa cala me mate.” Era sa qai kaya ga, “A cava oqori vei keimami. Oqori sa nomu ga!” 5Sa qai biuta tu ga na i lavo mai Valenisoro ko koya, ka lako yani ka kukunataki koya. 6Era sa qai kauta na i lavo ko ira na bete levu, ka kaya, “E tabu ni biu ki na kato ni soli ni Valenisoro ni sa i sau ni dra ” 7Ni ra sa bosea oti, era sa qai volia kina na tiki ni Vanua ni Daucaka Kuro me kedra i bulubulu na vulagi. 8Oqo na vuna sa vakatokai kina na tiki ni vanua ko ya na vanua ni dra, me yacova tu edaidai. 9Sa qai vakayacori sara kina na veika ka a vosataka ko Jeremaia na parofita, ni a kaya, “Era sa qai kauta na tolusagavulu na tiki ni siliva, oya na i voli kei koya sa volitaki tiko, ko koya era a sa volia e so na luve i Isireli, 10ka volia kina na tiki ni vanua ni daucaka kuro, me vaka ka vosa kina vei au na Turaga ” 11Sa qai mai vakaturi ko Jisu e na mata ni kovana, ka qai tarogi koya na kovana, ka kaya, “Ko iko li na nodra Tui na Jiu?” Sa qai kaya ko Jisu, “Ko sa kaya sara ga mai.” 12Ia ni ra sa beitaki koya ko ira na bete levu kei ira na qase, sa sega ni sauma ko koya. 13Sa qai kaya vua ko Pailato, “Ko sa sega ga ni rogoca na levu ni ka era beitaki iko kina?” 14Ia sa sega ni sauma ko koya, ka sega mada ga ni bau vosa, ka sa qai kurabui ga kina vakalevu na kovana. 15E na Kanavata ni Lakosivia, sa nona i valavala na kovana me dau sereka vei ira na lewe vuqa e dua ga na kaivesu era digitaka. 16E tiko voli vei ira e dua na kaivesu vakairogorogo ko Parapa na yacana. 17O koya gona ni ra sa soqoni vata mai, sa qai kaya vei ira ko Pailato, “O cei ko ni vinakata me'u sereka vei kemuni, ko Parapa se ko Jisu o koya sa vakatokai na Karisito?” 18A sa kila ko koya ni ka wale ga ni vuvu era sa soli koya yani kina. 19Ni sa dabe toka e na nona i tikotiko ni veilewai, sa qai tala yani e dua na tamata vua ko na watina, ka kaya, “Mo kakua ni cakava e dua na ka vua na tamata tawa cala oqori, ni'u sa kune rarawa vakalevu edaidai e na dua na tadra ka baleti koya.” 20Era sa qai vakauqeti ira na lewe vuqa ko ira na bete levu kei ira na qase me ra kerei Parapa ka me mate ko Jisu. 21Sa qai vosa na kovana ka kaya vei ira, “O cei vei rau na lewe rua ko ni vinakata me'u sereka vei kemuni?” Era sa qai kaya, “Ko Parapa ” 22Sa qai kaya vei ira ko Pailato, “Ia na cava ga me'u qai cakava vei Jisu ko koya sa vakatokai na Karisito?” Era sa qai kaya kece ga, “Me lauvako ki na kauveilatai” 23Sa qai kaya ko koya, “E na vuku ni cava, na cava na ka ca e cakava ko koya?” Era sa qai qoqolou vakalevu cake ga kina, ka kaya, “Me lauvako ga ki na kauveilatai ” 24Ni sa raica ko Pailato ni sa sega ni dua na ka e rawata, ka ra sa tekivu uwe mai na tamata e sa qai kauta mai e dua na wai, ka vuluvulu e matadra na lewe vuqa, ka kaya, “Au sa na sega ni beitaki e na vuku ni dra tawa cala oqo; sa baleti kemuni ga.” 25Era sa qai vosa kece ga na tamata, ka kaya, “Me baleti keimami na nona dra, kei ira na luve i keimami ” 26Sa mani sereki Parapa vei ira, ia ni sa vakanakuitataki Jisu oti, sa qai soli koya yani me vakoti ki na kauveilatai. 27Era sa qai kauti Jisu ki na loma ni bai ni kovana ko ira na sotia ni kovana, ka vakasoqoni ira vata kina na matasotia taucoko. 28Era sa luvata na nona i sulu ka vakadarama vua e dua na i sulu damudamu. 29Era sa qai talia e dua na i sala wavakavotona ka vakatokara e uluna, ka ciqira e ligana i matau e dua na gasau, ka ra tekiduru e matana, ka vakalialiai koya, ka kaya, “Mo ni bula, na nodra Tui na Jiu!” 30Era sa qai kakasivi vua, ka taura mai na gasau ka mokuta tiko kina na uluna. 31Ni sa oti na nodra vakalialiai koya, era sa qai luvata laivi mai vua na i sulu balavu, ka vakadarama vua na nona i sulu ga, era sa qai kauti koya yani me ra vakoti koya ki na kauveilatai. 32Ni ra sa lako yani, era sa sota kaya e dua na kai Kirini, ko Saimoni na yacana. Era sa mani vakasaurarataki koya me colata na nona kauveilatai. 33Ia ni ra sa yaco ki na vanua e vakatokai ko Kolikoca (ka kena i balebale, na Vanua ni Qavokavoka), 34era sa qai solia vua me gunuva na waini e veiwaki tu kei na ka gaga; ia ni sa tovolea, a qai bese ni gunuva. 35Era sa qai vakoti koya ki na kauveilatai, ka ra vota na nona i sulu e na vakawirimadigi. 36Era sa qai dabe toka e kea ka vakaraici koya. 37Era sa qai vakota e cake me donuya na uluna na ka sa beitaki vua, “Oqo ko Jisu na nodra Tui na Jiu.” 38E sa qai vakoti vata kaya e lewe rua na daubutako, e dua e na yasana i matau, ka dua e na yasana i mawi. 39Era sa vosavosa ko ira ka lako yani e kea, ka ra kurekure, 40ka kaya, “Ko iko ko via vakarusa na Valenisoro ka tara tale e na tolu na siga! Tei vakabulai iko mada ga kevaka ko sa Luve ni Kalou, ka kevu sobu mai na kauveilatai.” 41E vaka tale ga kina ko ira na bete levu kei ira na daunilawa kei ira na qase, era sa vakalialiai koya ka kaya, 42“E dau vakabulai ira na tani; e sega ga ni vakabulai koya rawa! Sa i koya na nodra Tui na Isireli! Me kevu sobu mada mai na kauveilatai, ka da na qai vakabauti koya. 43Sa vakararavi tu ko koya vua na Kalou; ia, me vakabulai koya sara mada oqo kevaka e vinakati koya; ni a kaya, ʻKo i au na Luve ni Kalou.’ ” 44E rau sa bau vosa vakacacataki koya tale ga ko i rau na daubutako e rau vakoti vata kaya ki na kauveilatai. 45Sa qai butobuto na vanua taucoko mai na sigalevu tutu ka yacova na tolu na kaloko e na yakavi. 46Ia ni rauta na tolu na kaloko e na yakavi, sa qai kaci e na domo levu ko Jisu, ka kaya, “Ilai, Ilai, lamasapakacani?” na kena i balebale, “Noqu Kalou, noqu Kalou, ko ni sa biuti au e na vuku ni cava?” 47Era sa mani rogoca e so vei ira ka tu e kea, ka ra kaya, “E kacivi Ilaija tiko ko koya.” 48Sa qai cici e dua vei ira ka taura e dua na vutovuto ka tonisua e na wai wiwi, ka vivia ki na dua na gasau, ka vagunuvi koya. 49Ia era sa kaya na kena vo, “Laiva mada me da raica se e na sobu mai ko Ilaija me vakabulai koya.” 50Sa qai kaci tale e na domo levu ko Jisu, ka solia yani na yalona. 51Ia sa qai kasei rua na i latilati ni Valenisoro, mai cake ka kauta ki ra, sa uneune na vanua, ka kakavidavida na veivatu lelevu; 52era tadola mai na veibulubulu, ka vakaturi cake tale e lewe vuqa na yagodra na yalo dodonu ka ra sa mate tu; 53ia, ni sa tu cake tale mai ko koya, era sa qai lako yani mai na i bulubulu ki na Koro Tabu, ka rairai vei ira e lewe vuqa. 54Ni ra sa raica na turaganivalu kei ira ka tiko vata kaya me yadravi Jisu, era sa rere vakalevu, ka kaya, “Sa dina ga sa Luve ni Kalou na tamata oqo.” 55Era sa lewe vuqa tale ga na yalewa e kea era sa rai tale tu ga mai vakayawa, ko ira ka muri Jisu mai Kalili, ka dau qaravi koya, 56ka maliwai ira ko Meri na yalewa ni Makitala, kei Meri na tina i Jemesa kei Josefa, kei na wati i Sepeti. 57Ni sa yakavi, sa qai lako mai e dua na tamata vutuniyau mai Arimacea, ko Josefa na yacana, ka sa bau yaco tale ga ko koya me tisaipeli i Jisu. 58Sa lako vei Pailato, ka la'ki kerea na yago i Jisu. Sa qai vakarota ko Pailato me soli vua na yagona. 59Sa qai kauta na yagona ko Josefa ka solega e na dua na i sulu lineni savasava, 60ka vakotori koya e na i bulubulu vou ka a taya e loma ni vatu, ka qai vaqiqica yani e dua na vatu levu ki na katuba ni bulubulu, ka qai lako yani. 61E rau sa tiko kina ko Meri na yalewa ni Makitala kei Meri ka dua, ka rau dabe donuya toka na i bulubulu. 62E na siga ka tarava, oya na siga ni oti na Vakaraubuka, era sa qai soqoni vata vei Pailato ko ira na bete levu kei ira na Farisi, 63ka ra kaya, “Turaga, keimami sa nanuma tiko ni a kaya na dauveivakacalai ko ya ni a sa bula voli, ʻNi oti ga e tolu na siga, au na tu cake tale!' 64O koya gona mo ni vakarota mada me yadravi matua sara na i bulubulu me yacova na i katolu ni siga, de ra lako mai na nona tisaipeli ka butakoci koya ka kaya vei ira na tamata, ʻSa tu cake tale mai na mate ko koya.' Ka na qai ca vakalevu cake na veivakacalai e muri mai na kena e liu.” 65Sa mani kaya vei ira ko Pailato, “Dou kauta e dua na matayadra, ka la'ki vakatawa matua sara me vaka dou rawata ” 66Era sa qai lako ka sogota vakaukauwa na i bulubulu e na nodra dregata na vatu, ka laivi ira tiko kina na yadra.

will be added

X\