MACIU 26

1Ni sa vosataka oti na veika kece ga oqo ko Jisu, sa qai kaya vei iratou na nona tisaipeli, 2“Sa vo ga e rua na siga, me vaka dou sa kila, me yaco na Kanavata ni Lakosivia, ka sa na soli yani na Luve ni Tamata me lauvako ki na kauveilatai ” 3Era sa qai soqoni vata na Bete Levu, ko Kaiafa na yacana, 4ka ra bukiveretaki Jisu me ra vesuka ka vakamatea. 5Ia, era sa kaya, “Me kakua ga e na gauna ni kanavata, de ra uwe kina na tamata ” 6Ni sa tiko ga ko Jisu mai Pecani e na vale nei Saimoni na vukavuka, 7sa lako mai vua e dua na yalewa ka kauta voli mai e dua na tavaya alapasita waiwai, e i sau dredre sara, ka livia e uluna ni sa kana tiko ko koya. 8Ia ni ratou sa raica na nona tisaipeli e ratou sa cudru sara, ka kaya, “A cava e vakamaumautaki kina vaka oqo? 9Sa rawa me volitaki na waiwai oqo e na dua na i lavo levu, ka me qai soli vei ira na dravudravua .” 10Ia ni sa kila ko Jisu, sa qai kaya vei iratou, “Na cava dou sagai koya kina na yalewa? Sa cakava vei au ko koya e dua na cakacaka vinaka. 11Ni ra sa tiko vata ga kei kemudou e na veigauna kece ko ira na dravudravua; ia, e sega ga ni dou na dau tiko vata ga kei au. 12Ni sa livia na yalewa oqo na waiwai e na yagoqu, sa vakarautaki au kina ki na noqu bulu. 13Au sa kaya vakaidina vei kemudou, e na veivanua kece ga e na vunautaki kina na i Tukutuku Vinaka oqo e na vuravura taucoko, e na tukuni kina na ka e cakava na yalewa oqo, ka me kena i divi ” 14E dua vei ira na lewe tinikarua, e vakatoka ko Jutasa Isikarioti, sa lako vei ira na bete levu, 15ka kaya, “Na cava dou na solia vei au, kevaka au na soli Jisu yani vei kemudou?” Era sa mani wilika ka solia vua e tolusagavulu na tiki ni siliva. 16Sa tekivu sara mai na gauna ko ya ko Jutasa me sa vakasaqara e dua na gauna e rawarawa me soli koya kina. 17E na i matai ni siga ni kana Madrai Sega-ni-vakaleveni, e ratou sa lako mai vei Jisu ko iratou na nona tisaipeli, ka kaya vua, “E vei ko ni vinakata me keitou la'ki vakarautaka mo ni kania kina na magiti ni Lakosivia?” 18Sa qai kaya ko Jisu, “Dou lako ki na koro levu, ki vua e dua na tamata ka kaya vua, ʻE kaya mai na i Vakavuvuli, Sa voleka mai na noqu gauna, au na qarava na Kanavata ni Lakosivia kei ira na noqu tisaipeli e na nomu vale ” ’ 19E ratou sa cakava na tisaipeli me vaka sa vakarota vei iratou ko Jisu, ka ratou vakarautaka kina na magiti ni Lakosivia. 20Ni sa yakavi mai, sa tiko sara kei iratou na lewe tinikarua me ra kana. 21Ni ra sa kana tiko, sa qai kaya, “Au sa kaya vakaidina vei kemudou, e dua vei kemudou e na bukiveretaki au .” 22Ia, e ratou sa rarawa sara kina, ka dui kaya vakaveitaravi yani vua, “Ko i au li, Turaga?” 23Sa qai sauma ko Jisu ka kaya, “O koya keirau sa tokoca vata kaya e na bilo, e na bukiveretaki au. 24Sa lako tiko ga na Luve ni Tamata me vaka sa volai tu e na vukuna; ia, sa kalouca na tamata sa bukiveretaki koya yani na Luve ni Tamata! E vinaka cake vua na tamata ko ya me kua ga ni sucu mai.” 25Sa qai vosa ko Jutasa, o koya ka bukiveretaki koya, “Ko i au li, qasenivuli?” Sa qai sauma ko Jisu, “Ko sa kaya ga ni ko iko.” 26Ni ratou sa kana tiko, sa qai taura na madrai ko Jisu, ka vakalougatataka, ka dovia, ka solia vei iratou na tisaipeli, ka kaya, “Dou taura, ka kania; oqo na yagoqu.” 27E sa qai taura na bilo, ia ni sa vakavinavinaka oti sa qai solia vei iratou, ka kaya, “Dou gunu kece kina; 28ni sa i koya oqo na noqu dra ni veiyalayalati vou, sa liviraki e na vukudra e lewe vuqa, me bokoci kina na i valavala ca. 29Au sa kaya vei kemudou, me tekivu oqo, au na sega mada ni gunuva tale na vua ni vaini oqo me yacova na siga au na gunuva vou kina kei kemudou e na matanitu nei Tamaqu” 30Ni ratou sa lagata oti e dua na sere, e ratou sa qai lako yani ki na Delana Veiolive. 31Sa qai kaya vei iratou ko Jisu, “Dou na tarabe kece ga e na vukuqu e na bogi edaidai, ni sa volai tu, ʻAu na yavita na i vakatawa ni sipi ka ra na dui veiseyaki na qele ni sipi.' 32Ia ni'u sa na vakaturi cake tale, au sa na liu vei kemudou ki Kalili.” 33Sa qai vosa ko Pita ka kaya vua, “Kevaka era tarabe kece e na vukumuni, au na sega ga ni tarabe ko i au .” 34Sa qai kaya vua ko Jisu, “Au sa kaya vakaidina vei iko, e na bogi ga edaidai, ni bera ni tagi na toa, ko sa na cakitaki au vakatolu ” 35Sa qai kaya vua ko Pita, “Kevaka sara ga e daru sa na mate vata, au na sega ni cakitaki kemuni.” E ratou sa vosa kece tale ga vaka kina na tisaipeli. 36Sa qai lako mai ko Jisu vata kei iratou ki na vanua e vakatokai ko Kecisemani, ka sa mani kaya vei iratou na nona tisaipeli, “Dou tiko e ke, me'u la'ki masu mada ki kea.” 37Sa qai kauti Pita kei rau na luve i Sepeti, ka sa yacovi koya mai na rarawa kei na yaluma. 38Sa qai kaya vei iratou, “Sa rui rarawa vakalevu na yaloqu, me vaka au sa na mate; dou toka e ke, ka me datou yadra vata tiko ” 39Sa qai lako yani vakalailai ki liu, ka biuti koya sobu vakatoboicu me masu, ka kaya, “I Tamaqu, kevaka e rawa, me kau tani mada vei au na bilo oqo; ia, me kakua ga ni vaka na lomaqu; ia, me vaka ga na lomamuni ” 40Sa qai lako mai vei iratou na tisaipeli ka raici iratou ni ratou sa moce tu, sa qai kaya vei Pita, “Oi, sa sega ni rawa me datou yadra vata tiko e na dua ga na aua? 41Dou yadra tiko ka masu, mo dou kakua kina ni tacori e na vere; sa gu tiko na yalo, ia sa malumalumu ga na yago.” 42Sa lako tale yani ka masu, ka kaya, “I Tamaqu, kevaka sa sega ni kau tani rawa na bilo oqo, ka me'u gunuva ga, me sa yaco ga na lomamuni ” 43Sa qai lako tale mai, ka raica ni ratou sa moce tu ni sa bibi ga na matadratou. 44Sa baci biuti iratou ga ka lako tale yani, ka la'ki masu e na kena i katolu ni gauna, ka cavuta na veivosa vata ga e liu. 45Sa qai lako mai vei iratou na tisaipeli, ka kaya vei iratou, “Dou sa moce ga ka vakacegu tiko? Raica, sa voleka sara na kena gauna, me soli yani na Luve ni Tamata ki na ligadra na tamata i valavala ca. 46Dou tu cake, me da lako! Raica, sa voleka mai oqo ko koya ka bukiveretaki au.” 47Ni sa vosa tiko ga, sa lako mai ko Jutasa, e dua vei iratou na lewe tinikarua, kei na dua na i lala levu era vakaiseleiwau, ka vakaiwau, mai vei ira na bete levu kei ira na nodra qase na tamata. 48Sa solia tu na daubukivere e dua na i vakatakilakila vei ira, sa kaya tu vei ira, “O koya ga au na reguca, sa i koya; dou vesuka.” 49Sa qai lako sara mai vei Jisu ka kaya, “Mo ni bula na i Vakavuvuli!” ka reguca sara. 50Sa qai kaya vua ko Jisu, “Noqu i tau, ko lako tu mai oqo vaka e vei.” Era sa qai lako mai ka vesuki koya. 51Ia, sa qai ucuna na nona i seleiwau e dua vei iratou ka tiko voli kei Jisu, ka taya kina na nona tamata na Bete Levu, ka taya laivi na daligana. 52Sa qai kaya vua ko Jisu, “Ciqimaka lesu tale na nomu i seleiwau ki na kena taga, ni ko ira kece ga era tauri i seleiwau era na mate e na i seleiwau. 53Ko nanuma beka ni sega ni rawa me'u kerei Tamaqu, ka na solia sara mai vei au ko koya e sivia e tinikarua na mataivalu agilosi? 54E na qai vakayacori vakacava na i Vola Tabu, ka tukuna na kena yaco ga me vaka oqo?” 55Sa qai kaya ko Jisu vei ira na lewe vuqa e na tiki ni gauna ko ya, “Dou lakova tiko li mai oqo e dua na daubutako, ni dou vakaiseleiwau ka vakaiwau tu mai ka mai vesuki au? Au a dau tiko ga e na veisiga sa oti mai na Valenisoro, ka'u veivakatavulici tiko ka dou a sega ni vesuki au. 56Ia, sa yaco na veika kece ga oqo me vakayacori kina na nodra i vola na parofita ” E ratou sa qai biuti koya kece ga na tisaipeli, ka dro. 57Era sa qai vesuki Jisu ka qai kauti koya yani vei Kaiafa na Bete Levu e na vanua era sa soqoni vata kina na daunilawa kei ira na qase. 58E sa muri koya vakayawa tiko ga yani ko Pita me yaco sara ki na loma ni bai ni Bete Levu, ka curu ka dabe vata kei ira na yadra me raica sara na kena i tinitini. 59Era sa qai vakasaqara ko ira na bete levu kei ira kece na lewe ni matabose e cake e dua na ka me ra beitaki Jisu kina, ka me na lewai kina me mate. 60Ia, era sa sega ga ni kunea e dua na ka, e dina ga ni ra sa lewe vuqa era a lako yani me ra beitaki koya vakailasu. Oti ko ya e rau sa qai lako mai e lewe rua, 61ka rau kaya, “Ko koya oqo e a kaya, ʻAu rawa ni vakarusa na Valenisoro ni Kalou, ka tara tale e na tolu ga na siga.” ’ 62Sa qai tu cake na Bete Levu ka kaya, “Sa sega beka na ka mo kaya mai? Na cava mada e rau sa mai beitaki iko kina ko i rau oqo?” 63Sa galu tu ga ko Jisu. Sa qai kaya vua na Bete Levu, “E na yaca ni Kalou bula au sa vakarota vei iko mo tukuna mai vei keimami se ko iko na Karisito na Luve ni Kalou bula, se sega ” 64Sa qai kaya vua ko Jisu, “Ko sa kaya ga ko iko. Ia au sa kaya vei kemudou, mai na gauna oqo ka lako yani, dou na raica na Luve ni Tamata ni sa dabe tiko e na liga i matau i Koya na Kaukauwa, ka lako tiko mai e na vei o ni lomalagi .” 65Sa qai dresulaka na nona i sulu na Bete Levu ka kaya, “Sa vosa vakacacataka na Kalou. Na cava tale eda sa vakasaqara tiko kina na i vakadinadina? Ko ni sa rogoca ga na nona vosa vakacacataka na Kalou. 66A cava na nomuni lewa? Era sa sauma mai ka kaya, “Sa dodonu me mate ” 67Era sa qai kasivita na matana ka vacuki koya, ka so e sabici koya, 68ka kaya, “Tukuna mada, ko iko na Karisito! Ko cei ko ya e sabici iko?” 69E dabe tiko yani e na rara ni lomanibai ko Pita. Sa qai lako mai vua e dua na vada ka kaya, “Ka iko tale ga ko dau tiko vata kei Jisu na kai Kalili.” 70Sa qai cakitaka ko koya e matadra kece ga, ka kaya, “Au sega ni kila se cava ko kaya ” 71Ni sa lako yani vaka ki na matamata, sa qai raici koya mai e dua tale na vada, ka kaya sara vei ira era tiko kina, “Ko koya oqo e dau tiko kei Jisu na kai Nasareci ” 72Sa cakitaka tale ko koya ka bubului sara kina, ka vaka, “Au sega ni bau kilai koya na tamata ko ya.” 73Sega ni dede, era sa lako mai ko ira era tu voleka ka kaya vei Pita, “Sa i iko dina ga e dua vei ira, ni sa tukuni rko ga na nomu vosa.” 74Sa qai vakatekivu ko koya me kaya ni nona ca ga kevaka e lasu, ka bubului tale ga, “Au sa sega ni kilai koya ” Sa qai tagi sara na toa. 75Ia sa qai nanuma sara ko Pita na vosa i Jisu, “Ni sa bera ni tagi na toa, ko sa na cakitaki au vakatolu.” Sa qai curu yani ki taudaku ka tagi vakalevu sara.

will be added

X\