MACIU 25

1“E na rawa ni vakatautauvatataki na matanitu vakalomalagi kei na goneyalewa e lewe tini ka a kauta na nodratou cina ka la'ki veitavaki kei na tagane sa qai vakawati vou. 2E lewe lima vei iratou e lialia ka lewe lima e vuku. 3E ratou sa kauta ga na nodratou cina na lialia ka sega ni kauta vata tiko kei na waiwai; 4ia, ko iratou na vuku e ratou sa kauta na nodratou cina kei na tavaya waiwai. 5Ia ni sa bera ga mai na tagane vou, e ratou sa sosovu kece ga ka moce. 6“Ni sa bogilevu tutu sa qai rogo mai na kacikaci, ʻSa qai lako mai ko koya oqo na tagane vou! Dou la'ki veitavaki kaya.' 7E ratou sa qai tu cake kece ga na goneyalewa ko ya, ka vakarautaka na nodratou cina. 8E ratou sa qai kaya na lialia vei rratou na vuku, ʻDou solia mada mai vei keitou e so na nomudou waiwai, ni sa boko mai na neitou cina.' 9E ratou sa qai sauma na vuku, ka kaya, ʻSegai, de sega ni veirauti keda vata. Dou lako ga vei ira na i taukei ni sitoa ka voli nomudou ga.' 10Ni ratou sa lako yani ki volivoli, sa yaco sara mai na tagane vou, ka ratou curu vata kaya sara ki na kana magiti ni vakawati ko iratou ka sa vakarau tu, ka sogo sara na katuba. 11“E ratou sa qai lako tale ga mai e muri ko iratou na goneyalewa lialia ko ya, ka kaya, ʻTuraga, ni dolavi vei keitou.’ 12Ia, sa qai sauma ko koya ka kaya, ʻAu sa kaya vakaidina vei kemudou, au sa sega ni kilai kemudou.' 13O koya gona, dou vakarau tu ni dou sa sega ni kila na siga se na kena aua. 14“Ni na vaka e dua na tamata ka lako yani ki na dua na vanua tani, sa kacivi iratou mai na nona tamata ka solia vei iratou na nona i yau, 15ka mani solia vua e dua na i lavo e lima na udolu na tiki ni siliva, ki vua e dua e rua na udolu, ki vua e dua tale e dua na udolu, ki vei iratou yadua me vaka na nodratou dui kaukauwa, ka sa qai lako sara yani. 16Sa mani lako sara ko koya ka taura e lima na udolu, ka la'ki cakacakataka ka rawata mai e lima tale na udolu. 17E vaka tale ga kina ko koya ka a taura e rua na udolu, sa rawata mai e rua tale na udolu. 18Ia ko koya ka a taura e dua na udolu, sa lako ga ka kelia e dua na qara ka vunia kina na i lavo ni nona turaga. 19“Sa dede sara, sa qai lako mai na nodratou turaga na tamata oqori, ka taroga na nodratou cakacaka. 20Sa qai lako mai vua ko koya ka a taura e lima na udolu na tiki ni siliva, ka solia e lima tale na udolu, ka kaya, ʻTuraga, ko ni a solia vei au e lima na udolu. Raica, au sa rawata tale e lima na udolu.' 21Sa qai kaya vua ko nona turaga, ʻDaumaka dina, tamata vinaka ka yalo dina. Ko sa yalo dina e na veika e vica wale ga, au na lesi iko mo lewa na veika e vuqa. Curu ki na marau ni nomu turaga.' 22“Sa qai lako tale ga mai ko koya ka a taura e rua na udolu, ka kaya, ʻTuraga, ko ni a solia vei au e rua na udolu. Raica, au sa rawata e rua tale na udolu.' 23Sa qai kaya vua ko nona turaga, ʻDaumaka dina, tamata vinaka ka yalo dina. Ko sa yalo dina e na veika e vica wale ga, au na lesi iko mo lewa na veika e vuqa. Curu ki na marau ni nomu turaga.' 24“E sa qai lako tale ga mai ko koya ka a taura e dua na udolu, ka kaya, ʻTuraga, au sa kilai kemuni; ko ni sa turaga dredre, ka dau tatamusuki e na vanua ko ni sega ni kaburaka kina, ka dau kumuna mai na vanua ko ni sega ni veibiuyaka kina. 25E na noqu rere, au a la'ki vunia kina na nomuni udolu ki na qele. Raica, oqo ga na ka sa nomuni.' 26Sa qai vosa na nona turaga ka kaya, ʻTamata ca ka vucesa! Oi, ko sa kila ni'u dau tatamusuki e na vanua au sega ni kaburaka kina, ka dau kumuna mai na vanua ka'u a sega ni veibiuyaka kina? 27Sa dodonu kina mo biuta na noqu i lavo vei ira na i taukei ni baqe, ni'u sa lako mai me'u qai taura tale na noqu i lavo kei na kena tubu. 28Dou taura tani mai vua na dua na udolu ko ya ka solia vei koya e tiko vua e tini na udolu. 29O koya ga sa tu vua na ka, e na qai soli vakalevu tale yani vua; ia ko koya e sega ni tu vua na ka, e na kau tani tale ga mai vua na ka e sa bau toka vua. 30Dou biuti koya yani na tamata tawa yaga oqo ki na butobuto e tautuba; e na dau tagi kina ka vakasequruquru bati.’ 31“Ni sa na lako mai na Luve ni Tamata e na nona lagilagi, vata kei ira na agilosi, e na qai tiko ko koya e na nona i tikotiko lagilagi, 32ka ra na soqoni vata e matana na lewe ni veivanua kece ga. Sa na qai tawasei ira rua ko koya, me vaka na i vakatawa ni sipi e tawasei ira na sipi mai vei ira na me; 33ka na biuti ira na sipi e yasana i matau kei ira na me e yasana i mawi. 34“E na qai kaya na tui vei ira e na yasana i matau, ʻNi lako mai, ko i kemuni ka sa vakalougatataki mai vei Tamaqu, mo ni taukena na matanitu sa vakarautaki tu me nomuni mai na i vakatekivu kei vuravura. 35Ni'u a viakana, ko ni a solia vei au na kakana; au a viagunu, ko ni a vagunuvi au; au a vulagi, ko ni a kauti au ki vale; 36au a luvawale, ko ni a vakasulumi au; au a tauvi-mate, ko ni a mai sikovi au; au a tiko e valeniveivesu, ko ni a lako mai vei au.' 37Era na qai vosa vua na yalo dodonu ka kaya, ʻTuraga, keimami a raici kemuni mada e naica ni ko ni a viakana ka vakani kemuni, se viagunu ka vagunuvi kemuni. 38Keimami a raici kemuni e naica ni ko ni a vulagi ka kauti kemuni ki vale, se luvawale ka vakasulumi kemuni? 39Keimami a raici kemuni e naica ni ko ni a tauvi-mate, se tiko e valeniveivesu, ka lako kina vei kemuni?' 40E na qai sauma na tui ka kaya vei ira, ʻAu sa kaya vakaidina vei kemuni, e na nomuni dau cakava na ka oqo vua e dua vei ira na taciqu lalai oqo, ko ni sa cakava vei au.’ 41“E na qai vosa tale ga ko koya vei ira e na yasana i mawi, ʻNi lako tani vei au ko i kemuni sa cudruvi, ki na buka waqa tawa mudu ka a vakarautaki tu vua na tevoro kei ira na nona agilosi. 42Au a viakana, ko ni a sega ni solia vei au na kakana; au a viagunu, ko ni a sega ni vagunuvi au; 43au a vulagi, ko ni a sega ni kauti au ki vale; luvawale, ko ni a sega ni vakasulumi au; tauvi-mate, ka tiko e na valeniveivesu, ko ni a sega ni mai sikovi au.' 44Era na qai vosa tale vua, ka kaya, ʻTuraga, keimami a raici kemuni e naica ni ko ni a viakana se viagunu, se vulagi, se luvawale, se tauvi-mate, se tiko e na valeniveivesu, ka sega ni qaravi kemuni?' 45E na qai sauma vei ira ko koya, ka kaya, ʻAu sa kaya vakaidina vei kemuni, e na nomuni a sega ni cakava vua e dua vei ira na lalai oqo, ko ni sa sega tale ga ni cakava vei au.’ 46Era na qai lako tani ko ira oqo ki na cudruvi tawa mudu, ia ko ira na yalo dodonu ki na bula tawa mudu.”

will be added

X\