MACIU 24

1Sa qai biuta mai na Valenisoro ko Jisu ka lako yani, ka ratou lako mai na nona tisaipeli me vakaraitaka vua na veivale ni Valenisoro. 2Sa qai kaya ko koya vei iratou, “Dou sa raica na ka kece oqo? Au sa kaya vakaidina vei kemudou, e na sega ni vo tale e ke e dua na vatu me taqa roka ki na dua tale, e na talaraki sobu kece ga.” 3Ni sa la'ki dabe toka ko koya mai na Delana Veiolive, e ratou sa qai lako vuni ga yani na tisaipeli, ka kaya, “Ni tukuna mada vei keitou se e na yaco ni naica na veika oqo, ka cava na kena i vakatakilakila ni nomuni lako mai, kei na i vakataotioti kei vuravura?” 4Sa qai sauma, ka kaya vei ira, “Dou qarauna me kakua ni vakacalai kemudou e dua. 5Ni ra na lako mai e lewe vuqa e na yacaqu, ka kaya voli, ʻSa i au na Karisito,' ka ra na vakacalai ira e lewe vuqa. 6Dou na rogoca na veivaluvaluti kei na i rogorogo ni valu; ia mo dou kakua ni kidroa; ni sa dodonu me yaco mada oqori, ia e sa bera ga mai na i vakataotioti. 7Ni ra na veisaqasaqa na veivanua, kei na veimatanitu, ka na yaco na dausiga kei na uneune e na veivanua e vuqa; 8ia, na veika kece ga oqori sa qai i tekivu ga ni veika rarawa. 9“Era na soli kemudou yani na tamata ki na veivakararawataki ka ra na vakamatei kemudou, dou na cati mai na veivanua e na vuku ni yacaqu. 10Ka lewe vuqa era na tarabe, ka veibukiveretaki ka veicati. 11Era na tubu mai e lewe vuqa na parofita vakailasu ka vakacalai ira e lewe vuqa. 12E na kena sa tubu vakalevu na i valavala tawa dodonu, sa na batabata kina na nodra loloma e lewe vuqa. 13Ia, o koya e na vosota me yacova na i vakataotioti, e na vakabulai. 14Ka na vunautaki mada na i Tukutuku Vinaka ni matanitu ki na vuravura taucoko, me i vakadinadina ki na veivanua kece ga, sa na qai yaco mai na i vakataotioti. 15“O koya gona ni dou sa raica na ka vakasisila e dauveivakarusai ni sa toka e na yasana vakatabui, ka a vosataka ko Taniela na parofita (me kila ko koya e wilika), 16me ra dro sara ko ira era tiko e Jutia ki na veiulunivanua; 17me kakua ni siro mai ko koya sa toka e dela ni vale me mai kauta tani na veika e nona vale; 18ka me kakua ni lesu ko koya sa tiko e na i teitei, me la'ki kauta mai na nona i sulu. 19Isa, ko ira na yalewa bukete, kei ira ka sa vakasucu gone e na gauna ko ya! 20Dou masulaka me kakua mada ga ni yaco na nomudou dro oqori e na vula i liliwa, se e na Siga ni Vakacecegu, 21ni na levu sara kina na rarawa, ka sega ni sa bau vaka mada kina mai na i vakatekivu me yacova oqo, ka na sega tale ni vaka kina e muri. 22Ia kevaka e qai sega ni vakalekalekataki na gauna ko ya, e na sega ni bula rawa tale e dua na tamata; ia e na vukudra ga na digitaki sa na vakalekalekataki kina na gauna oqori. 23“Ia ke mani dua e kaya vei kemudou, ʻRaica, oqo na Karisito!' se ʻSa i koya oqo!' dou kakua ni vakadinata. 24Ni ra na tubu mai na Karisito vakailasu, kei na parofita vakailasu, ka ra na vakaraitaka mai na veivakatakilakila lelevu kei na veika veivakurabuitaki me vakacalai ira kina na digitaki. 25Dou rogoca, au sa tukuna rawa toka oqo vei kemudou ni sa bera ni yaco. 26“Kevaka era kaya vei kemudou, ʻRaica, e tiko ko koya mai na vanua veitalasiga,' kakua ni lako kina; ʻRaica, e tiko sara mai loqi,' kakua ni vakadinata. 27Me vaka ga na tibi ni livaliva mai na tokalau ka serau yani vaka ki na ra, e na vaka tale ga kina na nona lako mai na Luve ni Tamata. 28“E na vanua ga e koto kina na yago mate, era vakasoso vata kina na manulevu.” 29“Ni sa qai oti koto ga na veika rarawa e na gauna ko ya, e na qai vakabutobutotaki na matanisiga, ka na sega ni cila na rarama ni vula. Era na lulutu mai na veikalokalo mai lomalagi, ka na kuretaki na veika kaukauwa ni lomalagi. 30Sa na qai rairai mai na i vakatakilakila ni Luve ni Tamata mai lomalagi, ka ra na tagi na veimataqali kece ga e vuravura, ka raica na Luve ni Tamata ni sa lako mai e na veio ni lomalagi vata kei na kaukauwa kei na i serau levu. 31E na qai talai ira yani na nona agilosi ko koya, kei na davui domo levu, me ra na soqoni ira mai na nona digitaki mai na veimatanicagi e va, mai na dua na i yalayala kei vuravura ki na i yalayala kadua. 32“Dou vulica mada na i vakatautauvata mai na vunilolo: ni sa lavouvou mai na tabana, ka tubu mai na drauna, dou sa kila ni sa voleka na vula i katakata. 33Me vaka kina, ni dou sa raica na veika oqo, dou kila ni sa voleka mai ko koya, ia mai katuba sara ga. 34Au sa kaya vakaidina vei kemudou, e na sega mada ni takali na i tabatamata oqo, e na yaco mada e liu na veika kece ga oqo. 35E na takali ga ko lomalagi kei vuravura, ia na noqu vosa e na sega ni takali. 36“Ia e sega e dua e kila na siga ko ya, se na aua ko ya, e segai tale ga ko ira na agilosi mai lomalagi, e segai na Luvena, ia ko Tamaqu duadua ga. 37Me vaka ga e na gauna i Noa, e na vaka tale ga kina na nona lako mai na Luve ni Tamata. 38Me vaka e na veisiga ni bera tiko na waluvu era a kana na tamata, ka gunu, ka vakawati ka veimusumusuki me ra vakawati, ka yacova na siga sa vodo kina ki waqa ko Noa. 39Era sega voli ga ni kila me yacova ni sa qai yaco sara na waluvu ka carai ira kece yani; e na vaka tale ga kina na nona lako mai na Luve ni Tamata. 40E rau na tiko e na i teitei e lewe rua na tagane; e na kau tani e dua ka biu tani mai e dua. 41E rau na qaqi sila tiko e lewe rua na yalewa; e na kau tani e dua ka biu tu mai e dua. 42O koya gona mo dou yadra tiko, ni dou sega ni kila na gauna e na yaco mai kina na nomudou Turaga. 43Ia mo dou kila oqo: kevaka sa kila tiko na i taukei ni vale na gauna e na lako mai kina na daubutako, e na yadra tiko ka na sega ni laiva tu ga na nona vale me mai basu. 44O koya gona mo dou tu vakarau tale ga, ni na yaco mai na Luve ni Tamata e na dua na gauna dou sega ni namaka. 45“O cei mada na dauveiqaravi yalo dina ka vuku, ko koya e na lesia na nona turaga me lewa na nona matavuvale, me solia vei ira na kedra kakana e na kena gauna dodonu? 46Sa kalougata na tamata e kunei koya na nona turaga e na gauna e yaco mai kina ni sa cakava tiko vaka kina. 47Au sa kaya vakaidina vei kemudou, e na lesi koya me lewa na veika kece e tu vua. 48Ia, kevaka e mani kaya ga e lomana na dauveiqaravi ca ko ya, ʻE na yaco vakaberabera toka mai na noqu turaga,' 49ka sa mani tekivu kina me vakayaviti ira na nona i tokani, ka kana, ka gunu, ka mateni. 50Ni na qai yaco mai na nona turaga na tamata ko ya e na dua na siga e sega ni bau namaki koya kina, e na dua na gauna e sega ni kila, 51ka na totogitaki koya, ka biuti koya vata kei ira na dauveivakaisini: e na qai dau tagi kina ka vakasequruquru bati.

will be added

X\