MACIU 23

1Sa qai vosa ko Jisu vei ira na lewe vuqa kei ira tale ga na n.ona tisaipeli, 2ka kaya, “Era tiko e na i tikotiko i Mosese ko ira na daunilawa kei ira na Farisi. 3O koya gona mo dou vakabauta ka cakava na veika kece ga era tukuna vei kemudou, ia dou kakua ga ni muria na nodra i valavala, ni ra dau vosa wale ga ka sega ni cakava. 4Era dau vauca na i colacola bibi ka vakataqara e na usouso ni domodra na tamata, ia ko ira era sega sara ni via dodoka kina e dua na nodra i qaqalo. 5Era dau cakava na nodra cakacaka kece ga me ra raici ira kina ko ira na tamata; era daramaka e ligadra na nodra kato ni masu ka tu kina na tiki ni Vola Tabu, ka vakabalavutaka na tutu ni nodra i sulu. 6Era dau vinakata ga na veitikina dokai e na kana magiti, kei na i tikotiko vinaka duadua e na valenilotu, 7kei na vakabula vakaveidokai e na veimakete, ka me ra vakatokai me i Vakavuvuli mai vei ira na tamata. 8Ia, me kakua ni dou vakatokai ko i kemudou mo dou i Vakavuvuli: ni sa dua tiko ga na nomudou i Vakavuvuli, ka dou sa veitacini kece ga. 9Dou kakua tale ga ni vakatoka e dua me tamamudou e vuravura, ni sa tiko ga e dua na tamamudou, ko koya mai lomalagi. 10Dou kakua tale ga ni vakatokai me turaga: ni sa tiko ga e dua na nomudou Turaga, ko koya na Karisito. 11Me nomudou dauveiqaravi ko koya e levu duadua vei kemudou; 12ia ko koya e vakalevulevui koya e na vakalailaitaki, kei koya e vakalailaitaki koya e na vakalevulevui. 13“Dou sa kalouca dina na daunilawa kei na Farisi, na dauveivakaisini! Ni dou sa sogota na matanitu vakalomalagi e matadra na tamata, ka dou sega ni curu tale ga ko i kemudou, se laivi ira era via curu, me ra curu kina. 14“Dou sa kalouca dina na daunilawa kei na Farisi, na dauveivakaisini. Ni dou lawakitaki ira ka kovea na nodra i yau na yada, ka dau masu balavu vakarairai: dou na totogi vakalevu cake e na vuku ni ka oqo.] 15“Dou sa kalouca dina na daunilawa kei na Farisi, na dauveivakaisini! Ni dou veilakoyaki e wasawasa kei na vanua mamaca mo dou vukica e dua ki na nomudou lotu, ia ni sa rawa, dou sa qai cakava me vakaruataki na nona i tutu vakagone ni eli mai vei kemudou. 16“Dou sa kalouca dina na dauveituberi mataboko! Dou sa dau kaya, ʻKevaka e dua sa bubului ki na Valenisoro, e sega ni dua na ka ko ya; ia, kevaka e dua sa bubului ki na koula ni Valenisoro, ko ya sa qai vauci kina.' 17Dou mataboko! A cava e bibi cake vei rau, na koula se na Valenisoro ka a vakatabui kina na koula? 18E dua tale, ʻKevaka e dua sa bubului ki na i cabocabonisoro, e sega ni dua na ka ko ya; ia, ko koya ga e na bubului ki na i loloma ka koto kina, sa qai vauci kina.' 19Dou mataboko! A cava e bibi cake vei rau na i loloma, se na i cabocabonisoro ka a vakatabui kina na i loloma? 20O koya gona ko koya sa bubului ki na i cabocabonisoro sa bubului kina, kei na ka kece ga e koto kina, 21kei koya sa bubului ki na Valenisoro, sa bubului kina, vei koya tale ga sa tiko kina, 22kei koya sa bubului ki lomalagi, sa bubului ki na i tikotiko vakaturaga ni Kalou, vei koya tale ga sa tiko kina. 23“Dou sa kalouca kina na daunilawa kei na Farisi, na dauveivakaisini! Ni dou sa dau solia ga na i katini ni botebotekoro kei na co vaka oqo, ia dou vakawaletaka na veika bibi e na lawa me vaka na lewa dodonu, kei na lewa loloma kei na yalodina, na veika oqo sa dodonu mo dou vakayacora, ka kakua tale ga kina ni biuti ira ko ya. 24Dou dauveituberi mataboko, dou sa tauvulona me biu tani na lago ka dou qai tiloma ga na kameli! 25“Dou sa kalouca kina na daunilawa kei na Farisi, na dauveivakaisini! Ni dou sa dau vakasavasavataka ga na taudaku ni bilo kei na veleti, ia e loma, e sinai tu ga e na butabutako kei na garogaro. 26Ko sa Farisi mataboko! Mo vakasavasavataka mada na loma ni bilo, e na rawa me qai mai savasava tale ga na taudaku. 27“Dou sa kalouca dina na daunilawa kei na Farisi, dou dauveivakaisini! Ni dou sa vaka na i bulubulu boro vulavula, sa rairai vinaka tu ga e taudaku, ia sa sinai tu e loma na sui ni mate kei na ka dukadukali kece ga. 28Sa vakataki kemudou e taudaku, dou sa rairai vei ira na tamata me vaka dou tamata kina, ia e loma dou sa sinai tu e na dauveivakaisini kei na i valavala tawa dodonu. 29“Dou sa kalouca dina na daunilawa kei na Farisi, dou dauveivakaisini! Ni dou sa tara na kedra i bulubulu na parofita, ka vakaiukuukutaka na kedra i vakananumi na tamata yalo dodonu, 30ka kaya, ʻKevaka eda a bula e na nodra gauna na noda qase, ke da a sega ni lomavata kei ira e na vakadavei ni nodra dra na parofita.' 31Dou sa qai tukuni kemudou ga kina ni dou nodra kawa era a vakamatei ira na parofita. 32Dou sa sinai sara na nodra i vakarau na nomudou qase. 33O i kemudou na gata, dou luve ni gata loa! Dou na dro rawa beka vakacava mai na cudruvi mai eli? 34O koya gona, dou raica, au na talai ira yani vei kemudou na parofita kei ira na tamata vuku kei ira na daunilawa; dou na vakamatea e so vei ira ka vakota ki na kauveilatai. Dou na vakanakuitataka e so e na nomudou veivalenilotu, ka vakasavi ira mai na dua na koro ki na dua tale. 35Sa yacovi kemudou kina na i sau ni nodra dra na tamata yalo dodonu kece ga ka a vakadavei e vuravura, mai na dra i Epeli na yalo dodonu ka yaco ki na dra i Sakaraia na luve i Parakaia, o koya dou a labata e na tadrua ni Valenisoro kei na i cabocabo ni madrali. 36Au sa kaya vakaidina vei kemudou, e na yaco na veika kece ga oqo ki na i tabatamata oqo. 37“Isa, Jerusalemi, Jerusalemi! Ko iko ko vakamatei ira na parofita, ka vakaviriki ira e na vatu na tamata era talai yani vei iko. Sa vakavuqa me'u vakasoqoni ira vata na luvemu, me vaka na nona vakasoqoni ira vata na luvena na tina ni toa e na ruku ni tabana, ia dou a sega ni vinakata! 38Mo dou kila sa biu wale tu ka lala didi na nomudou vale ni soro 39ni'u sa kaya vei kemudou, dou na sega ni raici au tale, me yacova ni dou sa kaya, ʻSa kalougata ko koya sa lako mai e na yaca ni Turaga.’ ”

will be added

X\