MACIU 22

1Sa qai vosa tale tiko vei ira ko Jisu e na vosa vakatautauvata ka kaya, 2“E rawa ni vakatautauvatataki na matanitu vakalomalagi kei na dua na tui ka a caka magiti ni vakawati ka baleti koya na luvena-tagane. 3Sa qai talai ira yani na nona tamata me ra sa la'ki kacivi ira mai era sureti ki na kana magiti ni vakawati, ia era sa qai sega ni via lako mai. 4Sa qai talai ira tale e so, ka kaya, ʻLa'ki kaya vei ira na sureti, Raica, sa vakarau oti tu na noqu i vakasigalevu, sa vakamatei oti e so na noqu bulumakau, kei na manumanu uro, ka sa vakarau tu na ka kece ga, dou lako sara mai ki na magiti ni vakawati.' 5Ia era sa vakawaletaka ga, ka dui lako, e dua ki na nona i teitei, ka dua ki na nona cakacaka ni veivoli; 6ia ko ira na kena vo era sa qai tauri ira na nona tamata, ka vakacacani ira, ka vakamatei ira. 7Sa cudru sara na tui, ka qai tala yani na nona mataivalu ka vakamatei ira na daulaba ko ya, ka vakama na nodra koro. 8Sa qai kaya ko koya vei ira na nona tamata, ʻSa vakarau oti tu na magiti ni vakawati, ia sa sega ni ganiti ira ka a sureti, 9o koya gona, dou lako yani ki na i bili ni koro, ka sureti ira kece mai dou sota kaya ki na magiti ni vakawati.' 10Era sa qai lako yani ko ira na tamata oqori ki na veigaunisala, ka vakasoqoni ira kece mai era sa kunea, se ra vinaka se ra ca, ka sa sinai na vale levu ni vakawati vei ira era mai tiko me kana. 11“Ni sa curu mai na tui me raici ira era tiko me ra kana, sa qai raica kina e dua na tamata ka sega ni vakaisulu tu e na i sulu ni vakawati, 12ka qai kaya vua, ʻNoqu i tau, ko curu vakacava tu mai ki ke ni sega vei iko na i sulu ni vakawati?' Ia, sa vagagalu toka ga ko koya. 13Sa qai kaya na tui vei ira na nona tamata, ʻDou vesuka na yavana kei na ligana ka biuti koya ki na butobuto e tautuba; e na dau tagi kina ka vakasequruquru bati.’ 14Ni ra sa kacivi e lewe vuqa, ia ka lewe lailai ga sa digitaki.” 15Era sa qai lako na Farisi, ka ra bosea me ra coriti Jisu vaka e vei e na nona vosa. 16Era sa mani talai ira yani na nodra tisaipeli kei ira na i lawalawa i Eroti, ka kaya, “Na i Vakavuvuli, keimami kila ni ko sa dina tu ga, ka vakavuvulitaka vakadodonu ga na nona sala na Kalou, ka sega ni bau rerevaka tu e dua, sa ka wale ga vei iko na nodra i tutu na tamata. 17O koya gona mo tukuna mada kina vei keimami se cava na nomu vakasama. Sa dodonu li me da saumi i vakacavacava cei Sisa, se sega?” 18A raica rawa na ca ni yalodra ko Jisu, ka kaya, “Na cava dou veretaki au kina, dou dauveivakaisini? 19Vakaraitaka mai vei au e dua na i lavo e dau ka ni vakacavacava ” Era sa qai kauta mai e dua na i lavo siliva. 20Sa qai kaya vei ira ko koya, “A mata i cei kei na yaca i cei e volai tu oqo?” 21Era sa kaya, “A nei Sisa ” Sa qai kaya vei ira ko kaya, “Dou solia vei Sisa na ka sa nei Sisa, ki vua na Kalou na ka sa nona na Kalou.” 22Ia ni ra sa rogoca, era sa kurabui ga ka biuti koya ka lako yani. 23E na siga ko ya, era sa lako mai vua e so na Setoki, ko ira na dau kaya ni sega na tu cake tale mai na mate; ka ra qai tarogi Jisu e dua na taro, 24ka kaya, “Na i Vakavuvuli, e a kaya ko Mosese, ʻKevaka se mate e dua na tagane ka sega na luvena, me qai vakawatitaka na yada ko tacina, me vakawa kina me wili vua na tuakana.' 25Ia e tiko oqo vei keimami e ratou lewe vitu na veitacini; e a vakawati ko koya na i matai, ka mate; ia a sega na luvena ka laiva tu mai na watina vua na tacina. 26E a vaka kina na i karua, kei na i katolu, me yacovi koya sara na i kavitu. 27Ni ratou sa oti kece, sa qai mate na yalewa. 28Ni sa gauna ni tu cake tale mai na mate, e na qai wati cei vei iratou na lewe vitu ko koya? Ni ratou sa watina kece ” 29Sa sauma ko Jisu, ka kaya vei ira, “Dou sa sese, ni dou sa lecava ga na i Vola Tabu, se na kaukauwa ni Kalou. 30Ni ra sa na tu cake tale mai na mate, era sa na sega ni vakawati, se veimusumusuki, ka ra sa na vakataki ira ga na agilosi mai lomalagi. 31Ia me baleta na nodra tu cake tale na mate, dou sa sega li ni wilika na ka sa vosataka na Kalou vei kemudou, ni a kaya, 32ʻKo i au na Kalou i Eparaama, ka Kalou i Aisake, ka Kalou i Jekope.' O koya e sega ni nodra Kalou na mate, sa nodra ga na bula ” 33Ni ra sa rogoca na lewe vuqa, era sa kurabui sara e na nona i vakavuvuli. 34Ia ni ra sa rogoca na Farisi ni sa vagalui ira na Setoki ko koya, era sa qai soqoni vata mai, 35ka dua vei ira, e dua na daunilawa, sa qai taroga me vakatovolei koya, ka kaya; 36“Vakavuvuli, na cava na i vakaro levu duadua e na Lawa?” 37Sa qai kaya vua ko Jisu, “Mo lomana na Turaga na nomu Kalou e na lomamu taucoko, kei na yalomu taucoko, kei na nomu vakasama taucoko. 38Sa i koya oqo na i matai ka i vakaro levu duadua. 39Na i karua e vaka oqo: Mo lomana na kai nomu me vakataki iko. 40Sa vakatau ki na i vakaro e rua oqo na Lawa kecega kei ira na parofita.” 41Ni ra sa vakasoqoni vata tiko ga na Farisi, sa qai tarogi ira ko Jisu, 42ka kaya, “A cava dou nanuma me baleta na Karisito. Na luve i cei ko koya?” Era sa qai kaya vua, “Na luve i Tevita.” 43Sa qai kaya vei ira ko koya, “Ia sa qai vakatokai koya rawa ga vakacava ko Tevita e na Yalo Tabu, me Turaga? Ni a kaya, 44ʻSa kaya na Turaga ki vua na noqu Turaga, Ni mai dabe e na yasaqu i matau, me yacova ni'u sa vakatikori ira na nomu meca e na ruku ni yavamu.’ 45Kevaka sa vakatokai koya vaka oqo ko Tevita me Turaga, me qai luvena tale vakacava?” 46E sega e dua me kaya rawa vua e dua na ka, ka sega tale e dua e doudou me tarogi koya tale me tekivu mai na siga ko ya.

will be added

X\