MACIU 21

1Ni ratou sa toro voleka ki Jerusalemi, ki Pecifaki e na Delana Veiolive, sa qai tala ko Jisu e lewe rua na tisaipeli, 2ka kaya vei rau, “Drau lako ki na koro lailai sa donui kemudrau, ka drau na raica sara e dua na asa ni vesu tu, ka tu vata kaya na luvena; drau sereki rau ka kauti rau mai vei au. 3Kevaka e mani vosa kina vei kemudrau e dua, drau kaya, ʻE vinakati rau mai na Turaga,' e na laivi rau sara mai kina ko koya.” 4A yaco oqo me vakayacori sara kina na vosa ka vosataka na parofita, ka kaya, 5“Tukuna vua na goneyalewa ni Saioni, Raica, sa lako mai vei iko na nomu Tui. Sa yalomalua ka vodoka e dua na asa, kei na asa lailai, na luve ni asa.” 6E rau sa mani lako na tisaipeli ka cakava me vaka sa vakarota vei rau ko Jisu; 7e rau sa kauta mai na asa kei na luvena, ka tevuka e deladrau na nodrau i sulu, ka sa vodo kina ko koya. 8Era sa lewe vuqa era sa tevuka na nodra i sulu e gaunisala. 9Ia ko ira na lewe vuqa era liu tiko kei ira era muri, era sa qai kacivaka, “Osana vua na Luve i Tevita! Me vakacaucautaki ko koya sa lako mai e na yaca ni Turaga! Osana e na veiyasana cecere sara!” 10Ia ni sa curu yani ki Jerusalemi, sa yavala kece ga na lewenikoro, ka kaya, “O cei li oqo?” 11Era sa qai kaya na lewe vuqa, “Oqo ko Jisu na parofita mai Nasareci e Kalili.” 12Sa qai curu ko Jisu ki Valenisoro, ka vakasavi ira kece ga era veivoli tiko e Valenisoro, ka vakavukica na nodra teveli na dauveisau i lavo, kei na nodra i dabedabe na volitaki ruve, 13ka kaya vei ira, “Sa volai tu, ʻE na vakatokai na noqu vale me vale ni masu,' ia dou sa cakava me nodra qara na daubutako.” 14Era sa qai lako mai vua ki Valenisoro ko ira na mataboko kei na lokiloki, ka sa vakabulai ira ko koya. 15Ia ni ra sa raica ko ira na bete levu kei ira na daunilawa na veika veivakurabuitaki e cakava tiko ko koya, kei ira na gonelalai era kacikaci tiko mai Valenisoro, ka kaya, “Osana vua na Luve i Tevita,” era sa cudru sara, 16ka kaya vua, “Ko sa rogoca na ka era kaya tiko ko ira oqo, se sega?” Sa qai kaya vei ira ko Jisu, “Io, dou sa sega beka ni wilika, ʻE na gusudra na gonelalai kei na gone dramidrami ko ni sa cakava kina na vakarokoroko me uasivi sara’?” 17Sa qai biuti ira ko koya, ka lako tani mai na koro vaka ki Pecani, ka moce kina. 18E na mataka lailai, ni sa lesu tale tiko ki na koro ko koya, sa qai via kana. 19Ni sa raica e dua na vunilolo, sa qai lako kina, ia sa sega ga ni kunea kina e dua na ka, na drauna wale ga. Sa qai kaya ki na vunilolo, “Mo kakua tale ni vua ka tawa mudu.” A mai malai sara yani vakasauri na vunilolo. 20Ni ra sa raica na tisaipeli era sa kurabui sara, ka kaya, “E malai vakasauri vaka e vei na vunilolo?” 21Sa sauma ko Jisu ka kaya vei ira, “Au sa kaya vakaidina vei kemudou, kevaka e tu vei kemudou na vakabauta ka sega ni vakatitiqa, dou na sega ni cakava wale ga na ka sa yaco e na vunilolo, ia kevaka dou kaya sara tale ga ki na ulunivanua oqo, ʻTacavu mai ka me la'ki biu ki na wasawasa, ' e na vakayacori ga. 22Ka kevaka e tu vei kemudou na vakabauta, dou na rawata na ka kece sara ga dou na kerea e na masu.” 23Ni sa curu ko koya ki Valenisoro, era sa qai lako mai vua ni sa veivakatavulici tiko, ko ira na bete levu kei ira na nodra qase na tamata, ka kaya, “E na lewa i cei ko vakayacora voli kina na veika oqo, se ko cei mada e solia vei iko na kaukauwa oqo?” 24Sa qai sauma ko Jisu, ka kaya vei ira, “Au na tarogi kemudou tale ga e na dua na taro; kevaka dou sauma vei au, ka'u na qai tukuna tale ga vei kemudou se e na lewa i cei au vakayacora voli kina na veika oqo. 25E vu mai vei na papitaiso nei Joni? Mai lomalagi, se mai na tamata ga?” Era sa qai veivosakitaka vakai ira ka kaya, “Kevaka eda kaya, ʻMai lomalagi,' e na qai kaya ko koya vei keda, ʻNa cava ga dou sa sega ni vakabauti koya kina?’ 26Ia kevaka eda kaya, ʻMai na tamata,' ia eda sa rerevaki ira na lewe vuqa ka ni ra nanuma kece ga ni a parofita ko Joni ” 27Era sa mani sauma kina vei Jisu, “Keimami sega ni kila.” A qai kaya vei ira ko Jisu, “Au na sega tale ga ni tukuna vei kemudou se e na lewa i cei au vakayacora voli kina na veika oqo. 28“Na cava dou nanuma e na ka oqo? Sa lewe rua na luvena-tagane e dua na tamata. Sa qai lako vua na i matai ko tamana ka kaya, ʻNa luvequ la'ki cakacaka edaidai ki na noqu loga-ni-vaini.' 29Sa qai sauma ko koya ka kaya, ʻAu bese,' ia sa qai veisau e muri na lomana ka mani lako. 30Sa qai lako vua na kena i karua ka vosa vaka kina. Sa qai sauma ko koya, ʻAu na lako saka,' ia ka qai sega ni lako. 31O cei vei rau na lewe rua e muria na loma i tamana?” Era sa qai kaya, “Na i matai ” A mani kaya vei ira ko Jisu, “Au sa kaya vakaidina vei kemudou, era sa curu tiko e liu vei kemudou ki na matanitu ni Kalou ko ira na dau kumuni i vakacavacava kei ira na dautagane. 32Ni a sa lako mai vei kemudou ko Joni ka vakaraitaka vei kemudou na sala dodonu, dou sa sega ni vakabauti koya; ia era sa qai vakabauti koya na daukumuni i vakacavacava kei ira na dautagane, ia ko i kemudou e dina ga ni dou sa raica, dou sa sega ni veivutuni kina e muri ka vakabauti koya. 33“Dou rogoca e dua tale na vosa vakatautauvata. E a tiko kina e dua na i taukei ni vale ka tea e dua na loga-ni-vaini, ka viribaita vakavolivolita ka taya e na vatu na i keli ni wai; ka tara na vale ni vakatawa, ka lisitaka vei ira e so na dauteitei, ka qai lako yani ki na vanua tani. 34Ia ni sa voleka mai na vula i matua, sa qai talai ira yani na nona tamata ki vei ira na tauri qele me taura mai vei ira na nona vuata. 35Ia era sa qai tauri ira na nona tamata ko ira na tauri qele ka mokuta e dua, ka vakamatea e dua, ka vakavirika e dua tale. 36Sa qai talai ira tale e so na nona tamata, era lewe levu cake mai vei ira era a liu, ia era sa qai cakava tale ga vaka kina vei ira. 37Na kena i otioti sa qai tala na luvena-tagane ka kaya, ʻEra na doka na luvequ.' 38Ia ni ra sa raica na luvena ko ira na tauri qele, era sa qai kaya vakai ira, ʻSa i koya oqo e na i taukei e muri. Mai, me da vakamatea, me da suguta na veika e na taukena.' 39Era sa qai tauri koya ka biuta ki na taudaku ni loga-ni-vaini ka vakamatea. 40“Ta ni sa na lako mai na i taukei ni loga-ni-vaini, na cava e na cakava ko koya vei ira na tauri qele?” 41Era sa qai kaya vua, “E na vakamatei ira vakararawa sara na tamata vakasevaki oqori, ka na lisitaka na loga-ni-vaini ki vei ira tale e so na tauri qele era na dau solia vua na vuana e na kena veigauna ” 42Sa qai kaya vei ira ko Jisu, “Dou sa sega beka ni wilika na i Vola Tabu? ʻNa vatu sara ga era sa cata na matai, sa qai yaco me kena i vakadei e na tutu ni vale. Oqo sa cakacaka ga ni Turaga, ka sa veivakurabuitaki e matada.' 43O koya gona au sa kaya kina vei kemudou ni na kau tani mai vei kemudou na mataniut ni Kalou, ka me soli ki na dua na matanitu e vuataka mai na vuana. 44O koya e na lutu ki na vatu oqo e na dasila kina vakalalai, ia vei koya e na lutuka e na vurumemea.]” 45Ia ni ra sa rogoca ko ira na bete levu kei ira na Farisi na nona vosa vakatautauvata era sa kila e vosataki ira kina ko koya. 46Era sa qai via vesuki Jisu, ia, era sa rerevaki ira ga na lewe vuqa, ni ra sa okati koya tu ga ni sa parofita.

will be added

X\