MACIU 20

1“Ni sa tautauvata na matanitu vakalomalagi kei na i taukei ni vale ka sa sou vakamataka yani me la'ki kauti ira mai e so na tamata me ra mai cakacaka saumi e na nona loga-ni-vaini. 2Ni sa lomavata kei ira na tamata cakacaka me ra tauya dua na i lavo siliva dua na siga me kedra i sau, sa qai talai ira yani ki na loga-ni-vaini. 3Sa qai lako yani e na ciwa na kaloko ki na makete ka raici ira e so ni ra tu wale ga kina. 4Sa qai kaya vei ira, ʻDou lako tale ga ki na loga-ni-vaini, ka'u na saumi kemudou e na ka e rauta.' Era sa mani lako. 5Sa lako tale yani ko koya e na tinikarua kei na tolu na kaloko, ka cakava vaka kina. 6Ni sa rauta na lima e na yakavi, sa lako yani ki na makete ka raici ira e so tale era tu wale ga, sa qai kaya vei ira, ʻDou tu wale ga vakacava e ke e na siga taucoko oqo?' 7Era sa qai kaya vua, ʻNi sega e dua e soli cakacaka vei keimami.' Sa qai kaya vei ira ko koya, ʻDou lako tale ga ki na loga-ni-vaini.' 8“Ia ni sa yakavi mai, sa qai kaya na i taukei ni loga-ni-vaini vua na nona tamata, ʻKacivi ira mai na tamata cakacaka, ka saumi ira, tekivu yani vei ira na muri ka qai vakaoti vei ira sa liu.’ 9Ni ra sa lako mai ko ira ka saumi mai na lima na kaloko, era sa mai tauya dua na i lavo siliva. 10Ni ra sa lako mai ko ira era tekivu e liu era sa nanuma ga ni ra na taura vakalevu cake, ia era sa tauya dua tale ga na i lavo siliva. 11Ni ra sa taura era sa qai didi vua na i taukei ni vale, 12ka kaya, ʻO ira oqo era qai muri yani era cakacaka ga e na dua na aua, ia ko sa vakatautauvatataki ira kei keimami ka colata na bibi ni siga taucoko kei na todra ni siga.' 13Ia, sa qai sauma vua e dua vei ira ka kaya, ‘Noqu i tau, au sega ni veidabuitaki iko, e daru a sega li ni lomavata me kemu i sau e dua na i lavo siliva? 14Taura na kemu i sau ka lako; sa lomaqu me'u solia vei koya oqo ka sa muri na ka au sa solia vei iko. 15E sega li ni tara me'u lewa ga se cava au cakava ki na ka e noqu? Se ko sa vuvu ga ni'u sa rui lomasoli?' 16Era na liu vaka kina ko ira sa muri, ka ra na muri ko ira sa liu.” 17Ni sa lako cake ki Jerusalemi ko Jisu, sa qai kauti iratou vakatikitiki na tisaipeli mai gaunisala, ka kaya vei iratou, 18“Raica, tou sa lako cake tiko ki Jerusalemi; ka na soli yani na Luve ni Tamata vei ira na bete levu, kei ira na daunilawa, ka ra na lewai koya me mate, 19ka soli koya vei ira era kai matanitu tani; me ra vakalialiai koya, ka vakanakuitataka, ka vakota ki na kauveilatai, ka na qai vakaturi cake tale mai na mate ko koya e na i katolu ni siga ” 20Sa qai lako mai vua na tinadrau na luve i Sepeti, kei rau na luvena-tagane, ka mai cuva e matana, ka kerea vua e dua na ka. 21Sa kaya vua ko Jisu, “Na cava ko vinakata?” Sa qai kaya vua, “Mo lewa me rau tiko na luvequ oqo, e dua e na ligamuni i matau, ka dua e na ligamuni i mawi e na nomu matanitu ” 22Sa sauma ko Jisu, ka kaya, “Ko dou sega ni kila na ka ko dou kerea tiko: drau sa rawata li mo drau gunuva na bilo au sa vakarau gunuva?” E rau sa kaya vua, “Keirau rawata” 23Sa qai kaya vei rau, “Drau sa gunuva dina ga na mequ bilo, ia mo drau tiko e na ligaqu i matau se ligaqu i mawi, e sega ni noqu me'u solia, ia sa baleti ira ga sa vakarautaka tu ko Tamaqu me nodra ” 24Ni ratou sa rogoca na lewe tini, e ratou sa cudruvi rau sara na veitacini. 25Sa qai kacivi iratou ko Jisu, ka kaya, “Dou sa kila ni ra dau vakacolasau vei ira na kai veimatanitu tani ko ira na nodra i liuliu, ka ra dau lewa vakaukauwa vei ira ko ira na nodra turaga dokai. 26E na sega ni vaka kina vei kemudou, ia me dauveiqaravi ga vei kemudou ko koya e via yaco me levu vei kemudou: 27ka me nomudou tamata dauveiqaravi ko koya e vinakata me liu vei kemudou. 28Ni sa sega tale ga ni lako mai na Luve ni Tamata me qaravi, ia me veiqaravi ga, ka solia na nona bula me kedra i voli na lewe vuqa.” 29Ni ratou sa biuti Jeriko, era sa muri koya mai e dua na i lala levu. 30Ka raica, e rau sa dabe toka e yasa ni gaunisala e lewe rua na tamata mataboko, ni rau sa rogoca ni sa lako voli yani ko Jisu, e rau sa qai kacikaci mai, ka kaya, “Kemuni na Turaga, na Luve i Tevita, ni lomani keirau mai.” 31Era sa karaci rau ko ira na lewe vuqa me rau tiko lo, ia e rau sa qai kaci vakalevu cake ga, ka kaya, “Turaga, na Luve i Tevita, ni lomani keirau mai ” 32Sa qai tu vakadua ko Jisu, ka kacivi rau, ka kaya, “Na cava drau vinakata me'u cakava vei kemudrau?” 33E rau sa qai kaya vua, “Turaga, me rai rawa na mata i keirau ” 34E na loloma levu sa qai tara na matadrau, ka rau sa rai rawa sara ka muri koya.

will be added

X\