MACIU 2

1E a sucu ko Jisu mai Peceliema e Jutia e na gauna i Eroti na tui. E na gauna koya e ratou a yaco yani kina ki Jerusalemi e so na tamata vuku mai na tokalau, ka ratou kaya, 2“E vei ko koya sa sucu me nodra tui na Jiu? Keitou a raica na nona kalokalo mai na tokalau, ka keitou sa lako mai oqo me so-kalou vua.” 3Ni sa rogoca na ka oqo ko Eroti na tui, sa leqa na lomana ka vaka kina ko Jerusalemi taucoko. 4Sa qai vakasoqoni ira vata kece ga na bete levu kei ira na nodra daunilawa na tamata ka vakataroga vei ira na vanua me na sucu kina na Karisito. 5Era sa qai kaya vua, “Mai Peceliema e Jutia, ni a vola tu vaka oqo na parofita: 6ʻIa ko iko, Peceliema, e na vanua ko Juta,ko sa sega ni lailai sobu mai vei ira na veikoro e Juta ni na tubu mai vei iko e dua na turagame na liutaki ira na Isireli.’ ” 7Sa qai kacivi iratou lo na tamata vuku ko Eroti ka taroga matua vei iratou na gauna ka a rairai kina na kalokalo. 8Sa qai talai iratou ki Peceliema, ka kaya, “Dou la'ki vakasaqara matua sara na gone lailai; ia, ni dou sa kunea, dou qai tukuna mai vei au, me'u bau la'ki vakarokoroko tale ga vua.” 9Ni ratou sa rogoca oti na vosa ni tui, e ratou sa mani lako sara. Ia ni ratou sa lako tiko e ratou sa raica na kalokalo ga e ratou a raica mai na tokalau. E toso tiko ki liu na kalokalo ka la'ki tu vakadua donuya na vanua e koto kina na gone. 10Sa levu dina na nodratou marau e na gauna e ratou raica kina na kalokalo. 11Ia ni ratou sa curu ki vale e ratou sa raica na gone kei Meri na tinana. E ratou sa tekiduru ka vakarokoroko vua. E ratou sa qai dolava na nodratou taga ka cabora vua na nodratou i loloma; na koula kei na drega boi vinaka kei na mura. 12E ratou sa qai lesu tale ki na nodratou vanua e na dua tani tale na sala; me vaka ni a kaya vei iratou na Kalou e na dua na tadra me ratou kakua ni lako tale vei Eroti. 13Ia ni ratou sa lesu tale, sa qai rairai vei Josefa e dua na agilosi ni Turaga, ka kaya, “Mo cavutu, ka kauta na gone lailai kei tinana, ka dro ki Ijipita, ka mo tiko ga kina me yacova ni'u sa tukuna tale vei iko e dua na ka; ni sa vakarau oqo me vakasaqara na gone lailai ko Eroti me vakamatea.” 14Sa cavutu ko koya ka kauta na gone lailai kei tinana e na bogi, ka lako ki Ijipita, 15ka tiko kina me yacova na mate i Eroti. Sa yaco koya me vakayacori sara kina na vosa ni Turaga ka a kaya na parofita, “Au a kaciva na Luvequ mai Ijipita.” 16Ia ko Eroti, ni sa qai kila ni ratou sa vakaisini koya ko iratou na tamata vuku, sa cudru vakalevu sara. A vakarota me ra vakamatei ko ira kece na gone tagane lalai yabaki rua ka lako sobu mai Peceliema kei na veivanua vakavolivolita - ka yaco oqo me veidonui kei na gauna ka a vaqaqai iratou matua kina na tamata vuku ko koya. 17Sa qai vakayacori sara kina na vosa i Jeremaia na parofita, ni a kaya, 18“E rogo e dua na domo mai Rama, a qoqolou kei na tagi lagalaga, e tagicaki ira na luvena ko Rejieli; ka bese ni vakacegui kina, ni ra sa yali.” 19Ni sa mate ko Eroti, sa rairai vei Josefa e na tadra mai Ijipita e dua na agilosi ni Turaga, 20ka kaya, “Cavutu, ka kauta na gone lailai kei tinana, ka lako ki na nodra vanua na Isireli, ni ra sa mate ko ira era a via vakamatea na gone.” 21E sa qai cavutu ko koya ka kauta na gone lailai kei tinana, ka lako ki na nodra vanua na Isireli. 22Ia ni sa rogoca ni sa tui tiko mai Jutia ko Arikeleo me i sosomi kei Eroti na tamana, sa rere ni lako kina; ia ni sa vakasalataki kina e na tadra, sa mani lako sara ki na yasayasa vaka-Kalili, 23ka la'ki tiko e na koro ka yacana ko Nasareci, ka me vakayacori sara kina na vosa era a kaya na parofita, “E na vakatokai ko koya me kai Nasareci.”

will be added

X\