MACIU 18

1E na gauna tiko ga ko ya e ratou sa lako mai kina na tisaipeli ki vei Jisu ka tarogi koya, “O cei e ka levu duadua e na matanitu vakalomalagi?” 2Sa qai kaciva mai e dua na gone lailai ko Jisu ka vakaturi koya e na kedratou maliwa, 3ka kaya, “Au sa kaya vakaidina vei kemudou, kevaka dou sega ni veisau mai ka yaco me vaka e dua na gone lailai dou na sega sara ni curu ki na matanitu vakalomalagi. 4O koya ga sa vakamalumalumutaki koya me vaka e dua na gone lailai vaka oqo sa i koya e ka levu duadua e na matanitu vakalomalagi. 5O koya tale ga e vinakata e dua na gone lailai vaka oqo e na yacaqu sa vinakati au. 6“Ia, o koya e vakavuna me cala e dua vei ira na lalai oqo, e vinaka cake vua me vakarubeci e domona e dua na i qaqi vatu levu ka vakadromutaki e na wasaliwa titobu. 7Sa kalouca ko vuravura e na vuku ni veivakacalai! Sa na dau yaco ga mai na veivakacalai; ia, sa ca vua na tamata e vakayacora na veivakacalai. 8“Kevaka e vakacalai iko tiko na ligamu se na yavamu, muduka tani ka biuta laivi: e vinaka cake vei iko mo curu ki na bula ka yava dua se liga dua ga, mai na nomu biu liga rua se yava rua ki na buka waqa tawa mudu. 9Kevaka e vakacalai iko tiko na matamu, vecuka tani, ka biuta laivi mai vei iko: e vinaka cake vei iko mo curu ki na bula ka mata dua ga, mai na nomu biu mata rua ki na buka waqa mai eli. 10“Dou qarauna mo dou kakua ni beca e dua vei ira na lalai oqo; ni'u sa kaya vei kemudou, ni ra sa dau raica tiko ga na mata i Tamaqu mai lomalagi ko ira na nodra agilosi. 11Ni sa lako mai na Luve ni Tamata me vakabulai koya sa yali.] 12“A cava na nomudou vakasama? Kevaka e dua na tamata e dua na drau na nona sipi, ka sa mani yali e dua vei ira, e na sega li ni biuti ira tu mai na ciwasagavulu kaciwa e na veidelana ka la'ki vakasaqarai koya sa yali? 13Kevaka e mani kunea, au sa kaya vei kemudou, sa na rekitaka dina vakalevu cake mai na ciwasagavulu kaciwa ka ra sega ni yali. 14E sega tale ga ni vaka kina na lomana na Tamamudou mai lomalagi, oya me yali e dua vei ira na lalai oqo. 15“Kevaka sa i valavala ca vei iko na wekamu, la'ki vunauca ni drau sa tiko vaka i kemudrau ga. Kevaka e rogoci iko, ko sa rawai koya na wekamu. 16Ia kevaka e bese ni rogoci iko, kauta yani e dua se rua tale me rawa ni vakadinadinataki na ka kece ga e na vosa ni lewe rua se lewe tolu na i vakadinadina. 17Ia, kevaka e bese ni rogoci iratou, tukuna ki na i soqosoqo ni lotu; ia kevaka e bese tale ga ni rogoci ira na i soqosoqo ni lotu, mo sa okata me vaka e dua na kai tani se dau kumuni i vakacavacava. 18“Au sa kaya vakaidina vei kemudou, ni ka kece ga dou vauca e vuravura e na vauci tale ga mai lomalagi, kei na ka kece ga dou sereka e vuravura e na sereki tale ga mai lomalagi. 19Au sa kaya tale ga vakaidina vei kemudou, kevaka e lewe rua vei kemudou e rau sa lomavata e vuravura me rau kerea e dua na ka, e na vakayacora vei rau ko Tamaqu mai lomalagi. 20Ni tikina ga e soqoni kina e lewe rua se ratou lewe tolu e na yacaqu, au sa tiko e na kedratou maliwa ” 21Sa qai lako mai vua ko Pita ka kaya, “Turaga me i valavala ca vakavica vei au na wekaqu ka me'u vosoti koya tiko mada ga? Me vakavitu?” 22Sa kaya vua ko Jisu, “Au sega ni kaya vei iko me vakavitu wale ga, me vakavitusagavulu na vitu, oqo e kena i balebale me kakua ni vakaiyalayala. 23O koya gona, sa vakatautauvatani kina na matanitu vakalomalagi kei na dua na tui ka sa via taroga nodra dinau na nona tamata. 24Ni sa tekivu vakatataro, sa qai kau mai vua e dua sa dinautaka tu vua e sivia e milioni na dola. 25Ia ni sa sega vua na ka me sauma kina, sa qai vakarota na nona turaga me volitaki ko koya, kei na watina, kei iratou na luvena, kei na ka kece ga e tu vua, me saumi kina. 26Sa qai cuva sobu na tamata ka vakamasuti koya, ka kaya, ʻMo ni vosoti au mada ga, au na sauma kece vei kemuni.' 27Sa qai tuburi koya na loloma na nona turaga na tamata ko ya ka mani sereki koya, ka laiva me sa kakua ga ni sauma. 28“Ia, sa qai lako ga ki tautuba na tamata ko ya ka raica e dua na nona i tokani dauveiqaravi ka dinautaka tu vei koya e vica wale ga na dola. Sa qai tauri koya ka kidomoka, ka kaya, ʻSauma mai na nomu dinau.' 29Sa qai cuva sobu na nona i tokani ki yavana, ka vakamasuti koya, ka kaya, ʻMo ni vosoti au mada ga, au na sauma vei kemuni.' 30Ia sa bese ga ko koya, ka lako ga yani ka biuti koya ki na valeniveivesu me yacova ni sa na sauma rawa na dinau. 31Ni ra sa raica ko ira na nona i tokani na ka sa caka, era sa rarawa dina vakalevu, ka la'ki tukuna sara vua na nodra turaga na ka kece ga sa yaco. 32Sa qai kacivi koya mai na nona turaga ka kaya vua, ʻTamata i vakarau ca, au a sereki iko mai na dinau levu ko ya, ni ko a vakamasuti au; 33e sega li ni sa dodonu kina vei iko mo yalovinaka vua na nomu i tokani me vaka na noqu a yalovinaka vei iko? 34Sa cudru sara na nona turaga ka soli koya yani vei ira ki na valeniveivesu me totogitaki kina me yacova ni sa na sauma rawa na dmau kece. 35E na cakava tale ga vaka kina vei kemudou ko Tamaqu vakalomalagi, kevaka dou sega ni dau vosoti ira na wekamudou mai na vu ni yalomudou.”

will be added

X\