MACIU 17

1Ni sa oti e ono na siga, sa qai kauti Pita kei Jemesa, kei Joni na tacina, ko Jisu, ka kauti iratou cake vakatikitiki ki na dua na ulunivanua cecere. 2Sa qai vukici na kena i rairai e matadratou, ka serau na matana me vaka na matanisiga, ka vulavula mai na nona i sulu me vaka na rarama. 3Ia sa qai rairai mai vei iratou ko Mosese kei Ilaija, ka rau mai veivosaki kaya tiko. 4Sa qai kaya vei Jisu ko Pita, “Kemuni Turaga, sa vinaka dina na neitou tiko e ke; kevaka ko ni vinakata, au na tara e ke e tolu na vakatunuloa, e dua me nomuni, dua me nei Mosese ka dua me nei Ilaija.” 5Ni sa vosa tiko ga ko koya, sa vakarurugi iratou mai e dua na o lumilumisa, ka rogo e dua na vosa mai na o, “Oqo na Luvequ daulomani, au sa dau vinakati koya vakalevu, dou vakarogoci koya ” 6Ni ratou sa rogoca na tisaipeli e ratou sa cuva vakatoboicu ka rere vakalevu. 7Sa qai lako mai ko Jisu ka tarai iratou, ka kaya, “Tu cake, dou kakua ni rere .” 8Ni ratou sa tacake e ratou sa sega ni raica e dua tale, ko Jisu taudua ga. 9Ni ratou sa siro sobu tiko mai na ulunivanua, sa vakaroti iratou ko Jisu, ka kaya, “Dou kakua ni tukuna vua e dua na raivotu, me yacova ni sa tu cake tale mai na mate na Luve ni Tamata.” 10E ratou sa qai tarogi koya na tisaipeli, ka kaya, “Na cava era kaya voli kina na daunilawa ni sa dodonu me liu taumada mai ko Ilaija?” 11Sa qai sauma ko Jisu ka kaya vei iratou, “Sa lako kina mai ko Ilaija me vakavinakataka tale na veika kece ga. 12Ia, au sa tukuna vei kemudou, sa lako oti mai ko Ilaija, ka ra sega ni kilai koya rawa, ka ra sa cakava vua na ka ga era vinakata. E na vakarau vakararawataki vaka tale ga kina e ligadra na Luve ni Tamata ” 13E ratou sa qai kila na tisaipeli ni sa vosa tiko vei iratou ko koya me baleti Joni na Dauveipapitaisotaki. 14Ni ratou sa yaco mai vei ira na lewe vuqa, sa qai lako mai vua e dua na tamata, ka tekiduru e matana 15ka kaya, “Turaga, ni lomani koya na luvequ-tagane, ni dau tauvi-manumanusoni, sa dau vakaleqai koya sara vakalevu; sa dau bale vakavuqa ki na buka waqa, ka vakavuqa ki wai. 16Ia, ni'u sa kauti koya mai vei iratou na nomuni tisaipeli, e ratou qai sega ga ni vakabulai koya rawa.” 17Sa qai sauma ko Jisu, ka kaya, “A i tabatamata tawa vakabauta ka lako vakaca, me vaka e vei soti na dede ni noqu tiko voli kei kemudou? Me vaka e vei soti na dede ni noqu vosoti kemudou voli? Kauti koya mai vei au.” 18Sa qai vunauci koya ko Jisu, ka mani lako tani na tevoro mai vua, ka sa bula sara na gone e na gauna ko ya. 19E ratou sa qai lako mai vakatikitiki na tisaipeli vei Jisu, ka kaya, “Na cava keitou sa sega ni vakasavi koya tani rawa kina?” 20Sa qai kaya vei iratou ko koya, “E baleta ni lailai ga na nomudou vakabauta. Ni'u sa kaya vakaidina vei kemudou, kevaka e tu vei kemudou na vakabauta me vaka na sore ni musita, dou na kaya ki na ulunivanua oqo, ʻToro tani ki kea,' ka na toro tani, ka na sega na ka e dredre vei kemudou. 21[Ia, sa dau rawa me vakasavi tani na kena mataqali oqo e na dau masu ga kei na dau lolo.]” 22Ni ratou sa baci lako vata mai e Kalili, sa qai kaya ko Jisu vei iratou, “E na soli yani na Luve ni Tamata ki na ligadra na tamata, 23ka ra na vakamatea, ka na vakaturi cake tale e na i katolu ni siga.” E ratou sa qai lomabibi sara. 24Ni ratou sa yaco ki Kapenaumi, era sa qai lako mai vei Pita ko ira na daukumuni i vakacavacava soli me baleta na vale ni Kalou, ka kaya, “E sega li ni dau soli me baleta na vale ni Kalou na nomudou i Vakavuvuli?” 25A qai kaya ko koya, “O, io ” Ni sa curu ki vale, sa namaki koya mai ko Jisu, ka kaya, “A cava ko nanuma, Saimoni? Era dau kumuna mai vei cei ko ira na tui e vuravura na i vakacavacava se na soli? Mai vei ira na nodra lewe ni vanua, se mai vei ira ga na kai tani?” 26Ni sa kaya ko koya, “Mai vei ira ga na kai tani.” Sa qai kaya vua ko Jisu, “Era sa lalaga kina na noda lewe ni vanua. 27Ia, ni da sega ga ni via vakatarabetaki ira, lako mada ki matasawa, ka viritaka na siwa, ka yavia mai na i matai ga ni ika e katia mai, ni ko sa dolava na gusuna ko na kunea kina e dua na i lavo. Kauta oqori ka solia vei ira me nodaru i tavi ”

will be added

X\