MACIU 16

1Era sa qai lako mai na Farisi kei ira na Setoki, ka kerei koya, e na nodra via vakatovolei koya, me vakaraitaka vei ira e dua na i vakatakilakila mai lomalagi. 2Ia, sa qai sauma ga ko koya ka kaya vei ira, “Ni sa yakavi mai, dou dau kaya, ʻE na draki vinaka, ni damudamu tu na lomalagi,' 3ia, e na mataka lailai, ʻE na draki ca, ni damudamu tu ka loaloa mai na lomalagi.' Dou sa vakaibalebaletaka rawa na i rairai ni lomalagi, ia, dou sa sega ga ni kila rawa na veivakatakilakila ni veigauna oqo. 4Sa dau vakasaqara e dua na i vakatakilakila na i tabatamata ca ka dauyalewa oqo, ia, e na sega ni soli kina e dua na i vakatakilakila, na i vakatakilakila ga i Jona na parofita ” Sa qai biuti ira ko koya ka lako yani. 5Ni ratou sa yaco ki tai kadua na tisaipeli, e ratou sa qai kila ni ratou guilecava me ratou kauta tiko e so na kakana. 6Sa qai kaya vei iratou ko Jisu, “Dou raica matua, qarauni kemudou mai na nodra i vakatubu na Farisi kei na Setoki ” 7E ratou sa qai veivosakitaka vakai iratou na ka oqo, ka kaya, “Edatou sega ni kau madrai mai.” 8E kila ko Jisu na ka oqo ka kaya, “O kemudou na tamata lailai na nomudou vakabauta, na cava dou veivosakitaka kina na kena sega ni tu vei kemudou na madrai? 9Dou sa sega tiko ga ni raica rawa, se nanuma na i buli madrai e lima vei ira na lewe lima na udolu, kei na vica na sova dou a vakasinaita? 10Se na i buli madrai e vitu vei ira na lewe va na udolu, kei na vica na sova dou a vakasinaita? 11A cava beka dou sa sega ga ni kila rawa kina ni'u sa sega ni vosataka na madrai, na nodra i vakatubu ga na Farisi kei ira na Setoki, mo dou qarauni kemudou mai kina?” 12Era sa qai kila ni sa sega ni tukuna ko koya me ra qarauni ira mai na leveni ni madrai, ia mai na nodra i vakavuvuli ga na Farisi kei na Setoki. 13Ni sa yaco ko Jisu ki na yasayasa vaka-Sisaria-Filipai, sa qai tarogi iratou na nona tisaipeli, ka kaya, “Ko cei mada era kaya na tamata se ko cei na Luve ni Tamata?” 14E ratou sa qai kaya, “E so era kaya, ko Joni na Dauveipapitaisotaki, ka so, ko Ilaija, ka so tale, ko Jeremaia, se e dua tale na parofita ” 15Sa qai kaya vei iratou ko koya, “Ia, ko cei ga dou kaya ko i kemudou ni ko i au?” 16Sa qai sauma ko Saimoni Pita, ka kaya, “Ko i kemuni na Karisito, na Luve ni Kalou bula ” 17Sa qai sauma ko Jisu, ka kaya vua, “Ko sa kalougata, Saimoni na luve i Jona, ni sa sega ni vakatakila vei iko na lewe kei na dra na ka oqo, ia, ko Tamaqu ga mai lomalagi. 18Au sa kaya tale ga vei iko, Ko iko ko Pita, ka'u na tara e na dela ni vatu oqo na noqu i soqosoqo, ka na sega ni rawai mai na kaukauwa ni mate. 19Au na solia vei iko na i dola ni matanitu vakalomalagi: na ka kece ga ko sereka e vuravura e na sereki tale ga mai lomalagi ” 20Sa qai vakaroti iratou matua na tisaipeli me ratou kakua ni tukuna vua e dua ni sa Karisito ga ko koya. 21Mai na gauna ko ya sa tekivu vakaraitaka tiko kina ko Jisu vei iratou na nona tisaipeli ni sa dodonu me lako yani ki Jerusalemi ka vosota kina na veika rarawa e vuqa mai vei ira na qase, kei ira na bete levu, kei ira na daunilawa, ka me vakamatei, me na qai vakaturi cake tale e na i katolu ni siga. 22Sa qai kauti koya vakatikitiki ko Pita ka tekivu me vunauci koya, ka kaya, “Me kakua sara, Turaga. E na sega sara ni yacovi kemuni na ka oqo .” 23Ia, sa qai vuki ga ko koya ka kaya vei Pita, “Lako tani ki dakuqu, Setani! Ko sa ka ni veivakatarabetaki vei au, ni sa vakatamata ga na nomu vakasama ka sega ni vaka na vakasama ni Kalou ” 24Sa qai kaya vei iratou na nona tisaipeli ko Jisu, “Kevaka e dua sa via muri au, me sa kakua ni lewai koya vaka i koya, ia me colata ga na nona kauveilatai, ka muri au. 25Ni ko koya ga e via maroroya na nona bula e na vakayalia, ia ko koya ga e vakayalia na nona bula e na vukuqu e na qai kunea. 26Na cava li e na kena yaga vua na tamata kevaka e rawati vuravura taucoko, ka vakayalia kina na nona bula? Se na cava e na solia na tamata me i sau ni nona bula? 27Ni na lako mai na Luve ni Tamata e na i serau nei Tamana, kei ira na nona agilosi, ka na qai saumi ira yadua na tamata ko koya me vaka na dui nodra i valavala. 28Au sa kaya vakaidina vei kemudou, ni ra tu cake tu oqo e so era na sega ni tovolea mada na mate me yacova ni ra sa raica na Luve ni Tamata ni sa lako mai e na nona matanitu ”

will be added

X\